طلبات نوتة أ / عادل صموئيل الجزء الثانى

[نور الصباح]

احبائى
اقدم لكم من اغانى فايزة ( وشكلها حاتبقى سنة فايزة )
على وش القمر
SSSSSSSSSSSSSSSSSSSSSSSSSSSSSSSSSSSS

[غواص النغم]

مرحبا استاذ عادل

اعتقد ان الكروان فايزة احمد كان عندها حلم ان تصل اغانيها الي العالمية واعتقد ان الموضة وقتها كانت كده هي طموح الفنانين للوصول للعالمية كان حلم بيراودهم فعمل حليم توزيع جديد لاغانيه مثل اهواك
فحبت فايزة ان تقدم نفسها في اغاني عالمية مثل داليدا مثلا
فعمدت الي التدرب على الصولفيج تدريب شديد حتى تتخلص من البحة التي في صوتها عند مدام رطل ((أكيد بتعرفها )) وحتى انها استطاعت ان تخفي الكثير من هذه البحة كما قال الناقد كمال النجمي وعاتبها على هذا الفعل وقال ان احلى مافي صوت فايزة هي البحة وهي كانت تعتبر ان هذه البحة عيب وليست ميزة في صوتها !!
ثم طلبت من سلطان ان تقدم الحان دون الربع تون وتكون سريعة وبدون اعادات فقدمت عدة اغاني من هذا اللون القصير السريع مثل على وش القمر ، احنا اصحاب ،ولانعرف من الذي ادخل هذه الفكرة في راسها حتى انها سجلت هذه الاغاني في التلفزيون على طريقة الاغاني الاوروبية ...ويعلق سلطان عن هذه الاغنيات بقوله :

لم تكن فايزة ضد التطور ولكن بشرط أن يتم بطريقة صحيحة. لقد تعرضنا للهجوم أنا وهي حين قدمنا مجموعة من الأغنيات القصيرة والسريعة مثل: "حبيتك وبداري عليك"، "إنساني" "دنيا جديدة"، و "على وش القمر" واتهمونا بإدخالنا الدرامز والآلات الحديثة، فماذا يقول من هاجمنا أيامها عما يسمعه اليوم؟ أعتقد أنها لو عاشت لقدمت كل ما هو عصري ومتطور في إطار الذوق الشرقي حتى لو استفادت من تكنولوجيا الغرب.



لفايزة اغنية جميلة كانت تتمنى ان تعيد غنائها وتعطيها حقها مرة اخرى لانها غنتها في بداياتها وهي اغنية النار القايدة او المعروفة بإسم اقول له ايه من الحان كمال الطويل ويبدوا انها كانت تريد من كمال الطويل ان يتشجع ويلحن لها مرة اخرى بعد انقطاعه عن التلحين لها ولكن لم يمهلها القدر ان تعيد غنائها لحن الطويل لفايزة ثلاث اغنيات النار القايدة واغنية انا اللي تنسانس انا واغنية ياما قلبي قال لي لا
هل فايزة احمد كانت تفكر في توزيع اغانيها القديمة وتعيدها مرة اخرى ؟هل كانت تحرص على تسجيل اغانيها الطويلة تسجيل استديو لان هناك عدة اغاني لها يوجد لها تسجيل حفل فقط فهل كانت تحرص ان تسجل اولا تسجيل الاستديو ثم تغني الاغنية في حفل كما كانت تفعل كوكب الشرق ام لا ؟

تحياتي

ملاحظة:

اغنية حدوتة كلمات صلاح جاهين الحان سيد مكاوي وغناء قنديل الغناء العربي محمد قنديل
موجودة بجودة عالية على هذا الرابط تفضل :
http://www.sama3y.net/forum/showpost...&postcount=511

***************
اخى العزيز
اشكرك على ردك وانا متفهم كلامك ولكن الموضوع اخطر من كده
لما يكون الفن عظيم جدا بيبقى حاجة حضارية او حلجة تراثية او حاجة تاريخية ومن هنا لازم نحافظ عليه كما هو
يعنى التطور بيبقى حاجة زى رشى الملح فى الطعام لها حدود وإلا ....
يعنى مثلا هرم خوفو لو انا عايز اطور فيه حاجة محظور المسه ولكن التطوير يبقى تمهيد المكان اللى حواليه بس برضو بحيث انى ما أغسرش المعالم الحضارية التاريخية
الفن الاصيل عامل زى الاكل الخاص بكل دولة يعنى بيبقى من تراثها يعنى عندنا فى مصر الملوخية مثلا ما اقدرش اطورها واحط عليها كاتشب او مايونيز لكن اقصى تصوير هو اضعها فى طبق اجمل او اخلى شكل المائدة جميل لكن مع التحذير بعدم المساس بالملوخية والتى يعرفها المصريين من مئات السنين
بالنسبة لفايزة الاغانى اللى انت ذكرتها دى تعتبر اسوأ اغانى فايزة ... يعنى انت هات 20 اغنية من اغانى فايزة التقليدية واسمعهم كويس حاتحس بعد كل اغنية بإشباع كأنك واكل ديك رومى .. ولو تلاحظ ان كل اغنية لها ابداع خاص جدا ومتميز جدا .. وانا فايزة كانت صديقة شخصية لى يعنى حاظها شخصيا ومش ممكن تكون طلبت من اى ملحن انو يعمل لها اغانى مافيهاش ربع تون ... يعنى فايزة كان لها منطقة خاصة هى الملكة بتاعتها فى العالم العربى واتحدى حد يطربك بهذه الدرجة فى العالم ولا حتى ام كلثوم ... المنطقة دى كانت بياتى الحسينى وبالذات نغمة السى نصف بيمول اللى تحت المدرج وتلاقيها فى معظم اغانيها انا لما بسمعها كانت بتسطلنى
يعنى كل مطرب عظيم له حرف منفرد كده ... اما بالنسبة للصولفيج ومدام رطل .. فايزة كانت بتعزف عود عزف رائع وفاهمة جدا جدا كل مقام لذلك لو تلاحظ ان كل اغانيها الطويلة فى كل جملة الجملة التالية بيبقى فيها علامة تحويل اما بتروح مقام تانى او بتلمس مقام وتلاقى النقلات دى سهلة وصحيحة وتنساب كالماء فى الجدول لن فايزة خبيرة فى المقامات .. وللعلم كانت بتشترك مع محمد سلطان فى التلحين يعنى زوجته وعايشه فى البيت وبالطبع بتشوفه وهو بيلحن لها واميد بتتحشر فى كل جملة .. ودى بيلاحظها اى مدون بيروح لهم البيت يدون لهم تلاقيه مش بيتعامل مع ممد سلطان وفايزة بتكون بتطبخ فى المطبخ ( ولبنى وبينك كان طبخها رائع روعة غناها ) ولكن بتبقى موجودة وتتكلم فى كل حرف بيمليه محمد سلطان للمدون على العود ... اما موضوع ان فيه اغانى لها حفلات فقط مالهاش تسجيل استوديو دى مستحيلة يعنى احنا عادتنا لازم اللحن يتسجل فى الاستوديو الاول بعدين الملحن بياخد نسخة من الشريط مع كلمات الاغنية ويسجله بأسمهم فى جمعية المؤلفين والملحنين بتاريخ اليوم .. عشان بعد كده ما يجيش حد يسرق اللحن ويقول ده بتاعى .. ولكن اختفاء التسجيلات دى ممكن يكون لخبطة فى مكتبة الاذاعة
او اللى بيعمل خريطة اذاعة الاغانى واحد مش بيفهم فى الاغانى اصلا ...
لما نيجى لكلمة العالمية ... انا اللى يشهرنى فى العالم هو الشىء اللى انا متفرد بيه مش اللى زى كل العالم مابيعمل ( دى كلمة خبراء ) يعنى لو فيه مسابقة طبخ وانا حشترك فيها ابقى معتوه لو اقدم لهم هامبورجر مثلا
لأن كل العالم بيعمل هامبورجر لكن اقدم لهم حاجة مصرى صميمة هم مايعرفوهاش
ولو اى حد المانى مثلا سمع اغنية على وش القمر بالنسبة له عادى ماهى زى اللى ىبيسمعو لكن لو سمع غريب يازمن مثلا ولا ياما انت واحشنى اكيد حايتجنن هو طبعا مش فاهم الموسيقى الغريبة دى ايه بس اكيد هايذهل من حلاوتها وانا حصلت معايا كتير يعنى عزفت مئات المرات قدام اجانب بتعمد اعزف لهم حاجة بياتى مثلا عشان يحسو انى مختلف وانا لو عزفت لهم حاجة زى الغربى بتاعهم مش حايحسوا بقيمتى
التطور زى ماقلت لازم يبقى رشة ملح يعنى مثلا ام كلثوم لما دخلت الجيتار عمل ايه حتة صغيرة تبين احنا اهه متطورين لكن باقى الاغنية تسمع ام كلثوم
اما كارثة اعادة تسجيل الاغانى بتوزيع حديث دى مصيبة استدرجوا فيها كارم محمود مثلا واعاد بعض اغانيه وكان الناتج زبالة وكمان خلوه يصورها فيديو ولبس باروكة وجاكيتات حمرا وكان شكلو زى الزفت يعنى قضى على تلك الاغانى ولا انكر عبد الحليم جربها مرة واحدة ولما سمع التسجيل امر بحرقه .. وما طلعش الا بعد وفاة عبد الحليم
مع اطيب تحياتى عادل صموئيل

[عادل صموئيل]

احبائى

اقدم لكم من اشهر روائع تراث فايزة احمد

بتسأل ليه عليا

مع اطيب تحياتى

[salhi_haithem]

السلام عليكم
حقيقة قمة المتعة أغاني فايزة وتشكر على الجهد الجبار و لو ممكن و عندك وقت أستاذ عادل ممكن تدون الأغاني الطويلة شوية لأنه فيهم موسيقى حلوة و أغاني ذو قيمة فنية مع كمية طرب مثل أغنية "خلينا ننسى"
أو أغنية " ايوه تعبني هواك " كلمات عمر بطيشه وألحان محمد سلطان
أو أغنية " نقطة الضعف " عبد الوهاب محمد ألحان محمد سلطان
و فيه أغنية " رسالة من إمرأة " كلمات نزار قبانى تلحين محمد سلطان
و فيه أغنية "حبيبي يا متغرب " كلمات عبد الرحيم منصور وألحان بليغ حمدي
و فيه أغنية " علمتني الدنيا " حسين السيد الحان محمد سلطان
و فيه أغنية " صعبان علينا " كلمات عبد الرحمن الابنودى الحان محمد سلطان
وفيه أغنية " بصراحه " كلمات مأمون الشناوى تلحين محمد عبد الوهاب
و فيه أغنية " لا يا روح قلبي أنا " حسين السيد و ألحان رياض السنباطي
و أختر ما شئت
مع أطيب تحياتي هيثم
عزيزى هيثم
اتفق معاك جدا ان فايزة بالذات اغانيها الطويلة كلها حلوة من اولها لآخرها يعنى وانا كنت بعزف معاها كنت بستمتع طول الوصلة الغنائية بعكس الحان اخرى طويلة بيبقى الحلو فيها نصفها الاول والباقى تحس انو متكلفت يعنى الملحن بيخلص باقى الاغنية وخلاص بإستثناء عبد الوهاب والسنباطى طبعا
والمقصد ان مش اى ملحن يقدر يلحن اغنية طويلة 13 او 14 صفحة وتفضل حلاوة الاغنية كامل اللحن ومحمد سلطان كان بيتميز بالميزة دى يعنى كل كوبليه بيبقى بنفس الحلاوة والقوة وبيساعده على ذلك حلاوة الكلمات اللى كان بينتقيها هو وفايزة بعناية فائقة ... ان شاء الله ادونهم كلهم قريبا بس لى عندك رجاء الاغانى بتاعة فايزة اللى انا دونتها فى الفترة الاخيرة معلش تتعب لما تكون فاضى وتحطها فى الفهرس
لأن الفهرس بتاعك ده انا بعتبره المرجع بتاعى لأنى من كتر التدوين ممكن انسى وادون الاغنية تانى لذلك لما بحب ادون اغنية برجع للفهرس بتاعك اولا
مع اطيب تحياتى عادل صموئيل

[سليم العباس]

سؤال بمناسبة النوتات الجميلة للفنانة الكبيرة فايزة أحمد ، أستاذ عادل :

- في سورية و أظن في بلاد الشام عموماً لا تحظى الفنانة الكبيرة فايزة أحمد بشعبية مماثلة لغيرها من المطربات القديرات مثل وردة الجزائرية - نجاة الصغيرة - ميادة الحناوي - شادية .

و أنا سأقول رأيي في هذا كمستمع :
أعتقد أن مستوى الألحان التي قُدمت لفايزة أحمد كانت أقل قيمة من التي قدمت لوردة أو ميادة مثلاً ، لأن الملحن محمد سلطان لم يصل إلى مستوى محمد عبد الوهاب أو بليغ حمدي في كثير من أعماله ، و بالطبع هذا لا ينفي أن ألحاناً رائعة خالدة موقعة باسمه .
لو غنت فايزة أحمد نفس الأغاني التي قدمتها نجاة أو وردة أو ميادة ، لكانت حققت نجاحاً باهراً ، يتجاوز ما حققته بأشواط بعيدة .

أود معرفة رأي حضرتك ، وشكرا لك على منحنا فرصة طرح الأسئلة .

اخى العزيز
وانا اشركم على الاسئلة لأنها بتحرك جوايا كلام كتير مخزون وانا مش بكتب مقالات الايام دى بمعنى انى انا افتح موضوع واتكلم فيه لكن لما حد بيسأل بيبقى عايز يعرف معلومة وانا احب كده اكتر من انى اكتب كلام ممكن مايستهويش ناس كتير
انا طبعا كلامى يختلف عن كل الناس ( واكتر واخطر شىء الصحفيين اللى بيكتبوا فى الجرائد فى المواضيع الفنية اللى مش بيفهموا فيها ) وانا شخصيا عزفت مع كل المطربين دول .. عندنا فى مصر منبع الفن ومن اهم اسباب ازدهار الفن ان الجمهور عندنا زمان كان ذوقه وتذوقه عالى جدا جدا جدا .. والموضوع ده هى اللى بيشهر فنان او بيخفس بيه الارض بمعنى ان كان زمان لما بتشترى شريط بتختار مطربك المفضل من ضمن كذا مطرب دلوقتى بيشتروا الشريط وخلاص اى حاجة تعمل دوشة
لذلك لما نقيس على ذوق المصريين فايزة غنت ونجت وفرقعت والمصريين بيموتوا فيها واكرر كانوا بيحبوا نجاة وبيحبوا وردة لكن بيموتوا فى فايزة .. وكل عشر حفلات كنت بعزف فيهم كان واحدة لنجاة واتنين لوردة و7 لفايزة وده احصاء سنوات طويلة ... وللعلم كنا بنسافر دول عربية كتير مع فايزة وكان الجمهور بيبقى اكتر من خمسين الف متفرج وحيموتوا عليها واقول لك على سر ماحدش يعرفوا
انا مرة كان عندنا بروفة مع وردة فى الفرقة الماسية .. وكان فيه موضوع يتطلب انى اروح مع وردة بيتها اخد منها حاجة قالت لى اركب معيا سيارتى وبعدين السواق بتاعى يرجعك مكان سيارتك .. ركبت جنبها وكان السواق مشغل كاسيت السيارة على اغنية لقيتك فين بتاعة فايزة ( انا اعرف انهم ما بيحبوش بعض ) فوجئت ان وردة بتغنى معاها حافظة الاغنية وقال بصوت عالى الله عليكى يافيزة كذا مرة وياروحى عليكى يافايزة يعنى تحس انها معجبة بيها جدا
ولعلمك وردة وفايزة ممكن يكونوا قامات متساوية لكن ميادة الحناوى اقل منهم كتير طبعا ... اما ان عندكم فى سوريا بيفضلوا وردة وميادة اكتر انا تحليلى حاجة
ممكن يكون الشعور ده مش فى كل سوريا يعنى محافظات محافظات
كمان فيه حاجة عندنا فى مصر اسمها عقدة الجواجه يعنى لو فيه سلعتين واحدة مصرية وواحدة مستوردة المواطن بيشترى المستوردة لدرجة ان عندنا مصانع شرابات رجالى مثلا بتعمل التيكت اللى ع الشراب كلو مكتوب بالانجليزى الجهلاء اللى مايعرفوش انجليزى بيشتروه على انو مستورد وبيكون صناعة رديئة جدا
وفيه قول ماثور زمان : لاكرامة لنبى فى وطنه
زمان كان الافلام العربية بتاعتنا بيجيبوا ممثل من لبنان لو دور لبنانى فى الفيلم كان بيبقى حاجة زى الفاكهة .. وشعور زمان كنت بحسو وانا صغير لما كنت اشوف الأجانب فى الشارع كنت بحس انهم حلوين اوى مخلوقات جايين من الفضاء نفس الشعور لما باخد احفادى نقعد فى خان الخليلى بيشوفوا الاجانب بإنبهار كانهم معمولين من جاتوه مش مخلوقات زينا
ورأيى الشخصى فى محمد سلطان الحانه رائعة واقل سبب انو كان بيعمل الالحان دى فى عصر لسه عبد الوهاب والسنباطى بيلحنوا وفايزة غنت لهم من قبل واخيرا غنت وقدرت تهجر عشان الجمهور مايحسش ان الحانو اقل منهم
وآسف للإطالة مع اطيب تحياتى عادل صموئيل

[نور الصباح]

احبائى
اقدم لكم من اشهر روائع تراث فايزة احمد
بتسأل ليه عليا
مع اطيب تحياتى
SSSSSSSSSSSSSSSSSSSSSSSSSSSSSSSSSS

[عمرو الهنداوي]

الف شكر يا استاذ عادل ربنا يكرمك

[غواص النغم]

أشكرك على الرد الجميل استاذ عادل بستفيد من كل ماتكتب واتمنى ماتخلصش ربنا يحفظك ويبارك في عمرك
متفق معاك طبعا ان الاغاني ((المستحدثة )) التي قدمتها فايزة كانت لا تليق بصوتها الكبير
بالنسبة لانبهار الغرب بالموسيقى العربية اذكر لقاء اذاعي مع ابنة الموسيقار احمد صدقي تحدثت مرة عن واقعة اثناء تسجيل
لحن حلو ياللي ماشي من الحان والدها احمد صدقي لفايزة انه كان في عازف ايطالي كان معهم في الفرقة وكان مش فاهم الموسيقى العربية او جديدة عليه وكان بيقلل من قيمتها وواخذ المسألة هزار فاخذه الموسيقار احمد صدقي على جنب وقعد يتكلم معاه على اللحن وعلى المقامات وانه لكل لحن خطة مقامية مدروسة وايقاع معين وبعد انتهاء الفرقة من العزف وتسجيل الاغنية اعتذر العازف الايطالي من الفرقة والملحن و قال لم اكن اعرف ان الموسيقى العربية بهذا الثراء ..

عجبتني معلومة ان لكل صوت زمان كان له منطقة مقامية بتسلطن والصوت يجود فيها ياريت تعطينا امثلة عن الاصوات الاخرى

وسعيد ايضا من معلومة ان كل اغاني فايزة الطويلة مسجلة استديو ممكن ان نطلبها للاذاعة .

تحياتي
اخى العزيز وانا سعيد اكتر منك من الكلام معاكم لأن المشكلة الخطيرة ان الشباب اليومين دول مايعرفوش الكلام ده
فيه مشكلة اسمها المنشأ يعنى لما تروح حديقة الحيوان بيبقى فيه نبذة على كل قفص بإسم الحيوان اهم حاجة فيها موطنه الاصلى يعنى طباعه وصفاته
لذلك تلاقى مثلا الدب القطبى عاملين فى القفص حنفيات مياه شديدة بحيث ان الدب يفضل مبلول على طول لأن جسمو متعود على الجو البارد ولو من غير المياه دى الدب يموت بعد 24 ساعة
لما نيجى لكلمة المنشأ بالنسبة لنا انا اتولدت سنة 1950 بالطبع سمعت او اتربيت فى الراديو على صوت المطربين بتوع الوقت ده
لكن الشباب اللى اتولدوا فى الثمانينات وبعدها سمعوا محمد منير وعمرو دياب ومابعدهم لذلك بقى ده طربهم وهو طبعا لاطرب ولا حاجة ده دوشة يرقصوا عليها وخلاص بمعنى شوف اد ايه طبول وإيقاعات والمغنى نفسو بيخاول يستثير الجمهور انو يصفق ويرقص اكتر يعنى الحفلة بتبقى معمعة تلاقى فى الصالة 200 بنت طالعين فوق الكراسى وبيرقصوا بالطبع مين حايسمع هنا ؟
بعكس زمان كانت الفرقة صوتها هادىء وجميل ومنخفض يعنى السماعات تسمع منها كان عندك راديو كبير صوته حلو مش مزعج ختى لما كان الجمهور يصقف اوى كان المطرب ينتظر لما يسكت بعدين يغنى
اما بالنسبة لموضوع الموسيقار الايطالى انا بقارن نفسى بيه لما بسمع الاغانى الهندية مثلا بلاقى تركيبات انا ماكنتش اعرفها وايقاعات غريبة لكن بدون معلومات هى حلوة فى السمع .. لكن انا فى نقاشى مع الموسيقيين لاوروبيين فهمتهم ان موسيقاهم مقامين فقط يعنى السلم الكبير والصغير وحلاوة موسيقاهم فى حلاوة التوزيع وايقاعاتهم محدودة لكن فى موسيقانا عندنا 47 مقام وايقاعاتنا لاسبيل لحصرها بالتحديد وان موسيقاهم بتعتمد على التوزيع اولا ثم حلاوة الجملة اللحنية ثانيا اما موسيقانا بتعتمد على حلاوة الجملة اللحنية ولو احب اقول لهم قول يغيظهم
لو موسيقار عايز يعمل سيمفونية بيبقى محتاج 8 جمل موسيقية ومش شرط يكونوا حلوين يجننوا يعنى ممكن يكونوا متوسطين .. السيمفونية 4 حركات كل حركة بيستعمل جملتين .. ويفضل يوزع فيهم لذلك بتسمع الجملة اكتر من خمسين مرة بتوزيعات مختلفة اما لو ملحن عايز يعمل اغنية زى انت عمرى مثلا لازم يعمل مش اقل من 200 جملة موسيقية ولازم يكونوا كلهم احلى من بعض يعنى كل جملة تسمعها وتقول الله ولازم اهم شرط ان الجمل دى تكون ما اتسمعتش من قبل ولا تشبه اى حاجة بحيث ان اى جملة فى المنتصف تسمعها تقول دى انت عمرى
عايز اقول لك مثل على المنطقة الصوتية اقول لك فريد الاطرش يقتلنى
فى منطقة الكرد على الدوكاه المطعم بالبياتى يعنى المقام كرد بيطلع وينزل على مى بيمول يروح عمل واحدة مى نصف بيمول زى اغنية ادى الربيع وفين حبيبى اللى رمانى من جنة الحب لناره بيقتلنى ...
عندك عبد الوهاب مثلا لو مناطق كتير زى هل تذكرين بشط النيل مجلسنا
وزى آه لو كنت معى نختال عبره
وافضل امنى الروح برضاه
المطرب العبقرى بيبقى عارف ان دى ملعبه لذلك تلاقيه بيستعمل المقام ده فى المكان ده كتير .. بيبقى عامل زى لاعب كرة متميز بيجيب هدف من منطقة معينة فى الملعب بتبقى وظيفة زملائه انهم فقط يوصلوا لو الكورة فى المنطقة دى وهو يشوط على طول تيجى هدف
مع اطيب تحياتى

[عامر أبو نبيل]

الله يعطيكون العافية
شكر خاص للاستاذ عادل على المجهود الكبير

ويعطيك العافية اخى العزيز وتحياتى الى كل اهل سوريا الاحباء
مع اطيب تحياتى عادل صموئيل

[منذر44]

الاستاذ المحترم عادل صموئيل
ارجو لو تتكرم بكتابة نوتة أغنية أين حبي للموسيقار رياض السنباطي