طلبات نوتة أ / عادل صموئيل الجزء الثانى

[muhamadibra]

المشاركة الأصلية كتبت بواسطة muhamadibra

يعني يا ما يسترو انت كتبت النوتة ؟ ولا لقيتها صعبة جدا - كما تفضلت و بالتالي الافضل عدم التدوين لخلو اللحن - ولكثرة التوزيع؟ - حضرتك كاتب العنوان اقدم لكم مع جزيل الشكر للتوضيح الذي اهتم به شخصيا واستمتع بالتحليل الفني
د محمدإبراهيم

اخى العزيز شكرا للتنويه
اصل النت قطع وانا بنزل الموضوع انا نزلت النوتة دلوقتى

مع اطيب تحياتى عادل صموئيل

ايوه تمام وصل يا مايسترو - عظمة علي عظمة - ربنا ما يقطعلك نت ابدا

[خالدموسى]

انا احاول تعلم العزف على الاورغ و اتابع منذ فترة قصيرة هذه النوت الموسيقية الجميلة وهذا المجهود الرائع الذى تبذله لكى تسعد محبينك ربنا يخليك

[piano_piano_d]

المشاركة الأصلية كتبت بواسطة عادل صموئيل

احبائى
اقدم لكم من اعمال الفنان عمار الشريعى

تتر مسلسل زيزنيا

نوعية الاغانى دى من النوعية اللى انا مش بحب اكتبها لأنه غرقان توزيع وده بيأثر ويطمس اللحن الاساسى ... مع ان الغناء جميل اوى اوى ... ولما نحلل جزء جزء عندك 3 سطور فى المقدمة معمولة سريعة ومعقربة بحيث ان مش اى عازف ممكن يعزفها لازم يكون محترف اوى ... يعنى انا شخصيا وانتم عارفين عزفى معزفهاش مش عشان معرفش لكن لأن اللى بيسمعك لازم بيكون اصلا سمعها من التسجيل اللى فيه كذا صوت ماشيين فوق بعض وانا لما اعزف بعزف صوت واحد منهم .. اللى يسمعنى يحس انى فاضى لأن فيه حاجات ناقصة ... والاخطر فى الغناء تحتها زحمة توزيع فظيع ومافيش كمنجات بتغنى مع محمد الحلو لدرجة تحس انو فى حتت مش مدوزن مع الموسيقى .. والازعاج الخدير فى التدوين للنوعية دى انى مركز فى اللحن الاساسى لكن طول الوقت التوزيع مغلوش عليا يعنى حاسس حاجات رايحة وجاية والمفروض انى وانا بدون ابقى سامع الشىء اللى انا بدونه فقط عشان التون مايروحش منى .. يعنى لو عبد الوهاب هو اللى عامل اللحن ده اول حاجة حايعمل مقدمة سهلة مفهومة لعامة الشعب ومع الغنا لازم كمنجات ولو عايز توزيع يبقى شعرة كده تبرز جمال اللحن اكتر مش تغلوش عليه .. واكرر للمرة المليون لما تطلب نوتة لازم تكون نوتة انت تقدر تعزفها بآلة واحدة زى النوعية المنتظمة اللى انا بكتبها لن اللى حايسمعك حايحس انك بتوقل اللحن كله مش بتقول حاجة من وسط كذا حاجة وحاتبقى فاضية
مع اطيب تحياتى

أشكر حضرتك جداً على المجهود الكبير الذي تقدمة من أجل أعضاء المنتدي .. ورغم صعوبه تدوين اللحن فقد أتممت تدوينة .. جزاكم الله كل خير

[piano_piano_d]

المشاركة الأصلية كتبت بواسطة عادل صموئيل

احبائى

اقدم لكم من اشهر روائع ام كلثوم الوطنية

والله زمان ياسلاحى

وجدير بالذكر ان الموسيقة بتاعة النشيد ده كانت هى السلام الجمهورى بتاع جمهورية مصر العربية طول عهد الرئيس الراحل جمال عبد الناصر ... ولما جه الرئيس السادات وبعد نصر اكتوبر العظيم ثم اتفاقية السلام .. يعنى قلنا خلاص مش عايزين نحارب تانى وعايزين نبنى البلد عمل السلام الجمهورى بلادى بلادى .. وجدير بالذكر ان اسم وزارة الحربية اتغير بعد اتفاقية السلام واصبح وزارة الدفاع ...
مع اطيب تحياتى

من الأغاني الوطنية الجميلة جداً .. جزاكم الله كل خير .. حقيقي حضرتك بتلبي كل طلبات أعضاء المنتدي .

[waleed_shelly]

[QUOTE=عادل صموئيل;680720][CENTER][SIZE=5][COLOR=Blue]احبائى

اقدم لكم من اشهر روائع ام كلثوم الوطنية

والله زمان ياسلاحى
اشكرك يا استاذ على هذه النوته الجميلة و اتمنى من حضرتك تدوين اغنية فايزه احمد ليه يا قلبي ليه واذا كنت حضرتك دونتها من قبل ارجو ان يدلني احد زوار المنتدي عليها .. ولك منى جزيل الشكر

[basma2265]

شكرا استاذ عادل علي اهتمام حضرتك
مش عارفه اشكر حضرتك علي المجهود الرائع في المنتدي
الف شكر لحضرتك

[مهدي01]

الف تحية الف شكر ليك يا استاذ يا هرم
دائما في الموعد لتلبية الاذواق
شكرا على نوتة انشودة انت عوني
اطال الله في عمرك وحفضك لاولادك

[غواص النغم]

جمعة سعيدة أستاذ عادل صموئيل

من كم يوم رفع للمنتدى الدكتور غسان بعض اغاني إسطوانات وتسجيلها جميل جدا ياترى هناك فرق بين الاستماع للاسطوانة والشريط والكاسيت.والسي دي الان؟

من ضمن الأغاني التي رفعها اغنية شادية إيرما لادوس تفاجأت أن الأغنية فيها مقدمة موسيقية غير الفيلم؟ هل يوجد فرق في اغاني الأفلام والاسطوانات وممكن الملحن يضيف في تسجيل الاسطوانة وهل تبقوا عارفين كموسيقيين عازفين أن الأغنية هذه لفيلم كدا..؟
http://www.sama3y.net/forum/showpost...&postcount=519

الأغنية جميلة جدا كموسيقى تشعر أن اللحن غربي يعني ممكن اي مغني أجنبي يغنيه مع ان اشعر ان الأغنية مش سهلة الأداء يعني سهل ممتنع
وزيها عمل لهدى سلطان غنوة حلوة هي حبيتك ليه
http://www.sama3y.net/forum/showpost...98&postcount=5

وعلى سيرة السهل الممتنع لاحظت أن محمد فوزي عمل لشقيقته هدى سلطان الحان جميلة مثل مكتوب الهوى.. هل عزفت معها؟

http://www.sama3y.net/forum/showpost...30&postcount=3

وعمل لصباح في فيلم فاعل خير اغنية فين اللي شاغل قلبي روعة
http://www.sama3y.net/forum/showpost...11&postcount=3

ومن نفس الفيلم غنى روحي وروحك.. جميلة ايضا
http://www.sama3y.net/forum/showpost...07&postcount=6


ارجو ان تكون اختياراتي نالت اعجابكم


اخى العزيز
اشكرك لأسئلتك المفيدة للجميع لأن طبعا عندى اجابات مش ممكن يحصلوا عليهما من حد تانى ..
لما نتكلم عن الاسطوانة .. اول ماظهرت الاسطوانة وهى كانت ال 78 لفة وبيسموها الحجارى بتاعة الفونوغراف .. كان طبعا صوتها ردىء جدا لأن التسجيل زمان كان بدائى جدا .. والاسطوانة كانت بتعمل خروشة يمكن اعلى من صوت المغنى ناهيك ان كان وجه الاسطوانة مدته 3 دقائق ونصف بس فى وقتها طبعا كانت اعجوبة من اعاجيب الزمان .. ولما تطورت التقنية ظهرت الاسطوانة ال 45 لفة ودة كان صوتها حلو ونقى فى نفس الوقت كان جهاز التسجيل المنزلى الشرائط البكر يظهر فى الافق بس كان عند علية القوم فقط لنه كان غالى جدا ... بعدين ظهرت الاسطوانة ال 33 لفة ودى زمنها فى الاذاعة ساعة .. ومع الاجهزة الهاى فاى كان صوتها رائع وافضل شىء تنقل منه .. بعدين ظهر الكاسيت المنزلى شيئا فشيئا ... لما ظهرت كل التقنيات دى كان الفيصل فيها للصوت الاجود بس لما ظهر الكمبيوتر ووصل الى اعلى التقنيات طبعا يغنيك عن كل الكلام ده يعنى انى عندى هارد واحد عندى كل الاغانى والى لو على شرائط يملوا عشر حجرات
اما عن اخاتلاف اغنية من فيلم لتسجيل ان الفيلم بيبقى محدد الزمن والزمن ده بيحدده كاتب السيناريو مع المخرج يعنى افرض مثلا عايزن المطربة تغنى على طول هنا حاجة من اتنين لو الاخراج يسمح ان نعمل مقدمة ويطون صوتها واطى بعدين يعلا الصوت ساعة ما المطربة تغنى او نعملحاجة صغيرة جدا وللعلم دى بتحصل يوم تسجيل الاغنية فى الاستوديو يعنى ممكن مرة بمقدمة كبيرة وممكن مرة تانية زى ما هى عايزنها للفيلم وهم يتصرفوا فيهم بعدين .. عادة العازف المحترف لما يكون حايسجل اغنية مباشرة فى الاستوديو من غير بروفات انا باخد موعد يوم كذا الساعة كذا فى استوديو كذا لو الاستدويو سينمائى يبقى اللى حاسجله حاجة لفيلم اما لو استديو من بتوع الاذاعة يبقى اما اغنية عادية او لمسلسل .. انا بعرف دى بتاعة ايه لما يكون مكتوب عليها يعنى مثلا انا سجلت مع وردة اغنية اسمها انا عندى بغبغان ماكنتش اعرف دى بتاعة ايه ما يهمنيش اسألأ وبعدين اكتشفت انها لمسلسل اسمو اوراق الورد وهكذا
اما اختاراتك حلوة بس انا بحب ابتدى بالاغنية الاكثر شهرة مع الجمهور
مع اطيب تحياتى عادل صموئيل
شكرا استاذ عادل على كل الإجابات فعلا صعب نلاقيها عند حد ثاني غيرك

[ملحن مصري]

بتسأليني بحبك ليه - محمد عبد المطلب

لينك الأغنيه

https://www.youtube.com/watch?v=utDbwKigTmc

[سليم العباس]

بعد التحية أستاذ عادل :

أغنية / لو تعرفوا / للفنانة أصالة نصري قد تكرر طلبها بشكل كبير من الجيل الحالي و أيضا من عشاق الطرب القديم .
هل من أمكانية لتدوينها ؟ خاصة أن اللحن الجميل من توقيع الموسيقار سيد مكاوي .
و هل الاستخدام المبالغ فيه للعرب الصوتية عند أصالة يحول بشكل نهائي دون تدوينها .
مع أطيب التحيات .

اخى العزيز
اولا اللينك اللى هم منزلينه مافيهوش صوت حاولت اشغله ونزلته عندى مالوش صوت لذلك معرفتش اسمعها عشان يمكن اغير رأيى فى اصالة .. اما موضوع الاستخدام المبالغ فيه فى العرب ( وانا سعيد انك موافقنى ع الموضوع ده عندها ) حقول تعليلين فى منتهى الاهمية والخطورة فى الموسيقى ... انت لما تسمع ام كلثوم مثلا بصفتها مدرسة اى اغنية فى حفلة طولها ساعة حتلاقى ام كلثوم بجلالة قدرها وكل عبقريتها مش ممكن حتقول اكتر من عربة واحدة فى الكوبليه وهنا لما تيجى واحدة وتقول فى الجملة الواحدة من 7 عرب او اكتر هنا هل هى اشطر من ام كلثوم ؟ وللعلم كان زمان فيه مطربة اسمها منيرة المهدية كانت سلطانة الطرب ولما طلعت ام كلثوم انتزعت منها العرش بأقصى سرغة لعدة اسباب اولها واهمها كانت منيرة المهدية بتقول فى الجملة عشرين عربة .. كانلو اى حد عايز يدندن اللى هى بتقوله مش حايعرف لأنها كانت محترفة اوى اوى .. ومن هنا لما طلعت ام كلثوم وغنت الغناء السهل والوضح المفتوح لبجمهور لقا نفسه بيدندن اللى هى بتقوله وبيفهمه ... الحاجة التانية واللى هى الاهم والاخطر بالنسبة لشغلى دلوقتى ... انظر لأى نوتة من تدوينى ودقق اوى فى مازورة ثم المازورة اللى بعدها ... حتلاقى ( طالما عندك ثقة انى بكتب صح ) انا كتب العلامات الايقاعية داخل المازورة من واقع اللحن الاصلى الصح من صاحبه الاصلى لأنه اصح الصح .. انا بدون اللى انا سامعه يعنى نوار بعدها كروشين بعدها نوار منقوط بعدها كروش اللحن كده او مربوط حاجة فى المزورة اللى بعدها ... ليه بكتب صح ؟ عشان سامع حاجة محددة ... ولازم المدون اللى زيى لما يسمع اى حاجة بيكون فاهمها بأقصى سرعة ... اما لما نيجى عند اصالة العرب والتطويل اللحن بيحصل لأذنى لخبطة يعنى لازم اقعد فى المزورة الواحدة عشر دقائق لأنى كل ما اكتب حاجة اسمع تانى تطلع حاجة تانية فى نفس الوقت نفس المازورة لو سمعتها من حد مضبوط ايقاعيا ( بيسموه فى السوق فى مصر وحدجى يعنى ملتزم اوى بالوحدة ) المازرة ممكن تاخد منى اقل من دقيقة وبدون مراجعة لأنى سامع شىء محدد وكتبته وللعلم كل العازفين اللى من جيلى لما بتيجى سيرة اصالة بيقولوا اعوذ بالله مش انا فقط لننا متعودين نسمع شىء محدد

مع اطيب تحياتى عادل صموئيل