عبد الرحمن الأبنودى

[الدكتور]

عم عبد ( الرحمن ) مصري معجون بطينة الوادي الطيب ..... وأي طينة؟!!! طينة الفقراء والغلابه
والمهمومين برزق يومهم وليس الغد. فالتفكير في الغد يصبح ترفا بالنسبة اليهم لا يقدرون عليه.....
المدهش في هذا الصعيدي الضارب بجذوره في عمق الصعيد الفقير انه يمزج السخرية المرة بكلامه عن
الفقر والفقراء. حتي اننا نتخيل ان حياته كانت سهلة وجميلة لأنه يحكيها بهذا الشكل المرح الذي تختلط
فيه الدموع بالضحكات من نوادر الأفراد والحياة............ أمر اخر يعجبني في هذا الشاعر الكبير عمنا
وخالنا عبد الرحمن . فهو ومع طول اقامته في المحروسة وسكنه بأحد الشقق الفاخرة وزواجه من مذيعة
تلفزيونية جميلة وبيضاء وبناته حوله خريجات الجامعة الأمريكية وحتي تدخينه للسجائر المفتخرة
( قبل عملية القلب ) وبالتأكيد كان بإمكانه شراء علبة سجائر كاملة يضعها في جيب قميصه الأزرق الذي
لم يعرف أبدا ان يغلقه حول رقبته برباط عنق حريري فهو علي عداء مستحكم بالكرافتات . وكأن الكرافته
تذكره بالهوة الواسعة بين الفقراء والأغنياء ...... علي كل وبالرغم من كل ذلك فخالي عبد الرحمن
لم يتنكر يوما لناسه ولغته وظل محافظا علي لسانه بكرا يقطر عذوبة ومرحا ومحافظا علي وروح الطفل
الصعيدي الشقي الذي يكدح من أجل لقمة العبش ومن أجل الفهم ايضا . فهم الحياة وفهم
الناس الغلابة وحقهم في غد مشرق يحلمون به .

[عصفور طاير]

إحدى روائع الأبنودي

الموت على الإسفلت

أماية ... وأنتي بترحِّي بالرّحي ..
على مفارق ضحى
وحدك وبتعدّدي
على كل حاجة حلوة مفقودة
ما تنسينيش يا أمة في عدُّودة
عدّودة من أقدم خيوط سودا في توب
الحزن
لا تولولي فيها ولا تهللي
.. وحطي فيها اسم واحد مات:
كان صاحبي يا أمه ..
واسمه ناجي العلي
***
يا قبر ناجي العلي.. وينك يا قبر
يا قبر معجون بشوك مطلي بصبر
الموت يقرّب عليك .. يرتد خوف
وإذا ما خافشي الموت .. يرتد جبر
***
يا قبر ناجي العلي.. يا دي الضريح
كان ميِّتك للأسف وطني صريح
تحتك فتى ناضر القلب .. غضّ
كان قلبه .. أرض مخيّمات الصفيح
***
الأرض متغربة .. والحلم ملْكْ
خريطة شبه الوطن محاصرها سلك
واقف وراها شريد عاقد إيديه
حنّ الوطن ذلك .. للأرض تلك
غشيم في حب الوطن .. طبعا غشيم
ياللي تحب الوطن من الصميم
على طريقة العرب في الحب عيش
وَليْ.. نقي.. متقي.. لكن لئيم
***
ناجي العلي في الأغنية
هلّ عليْه
زي الغزالة البرية
ماسك رسمة
...........
والرسمة فيها دمع وضحك
وأرض مِلك
وابن واقف خلف السلك
قصاد رسمه
................
والرسمة فيها يهود... بحاخام
والأنكل سام ..
وعرب لطاف عايشين في سلام
جوه الرسمه
.............
رسم الكفوف زي الصبّار
حنظل بمرار
صبي قصير واقف محتار
قدامه رسمه
............
رسما لا نعرف تتحادق
ولا بتنافق
نايب ناجي إنُّه عاش صادق
عاش للرسمة
...............
كان زييّ.. يائس يأس مميت
لكن عفريت
دخل لأعدائه في البيت
شايل اسمه
..................
والرسمة ما فيهاش سما وبيوت
لكن لها صوت
يا ناجي.. كان لا بد تموت
برّه الرسمة
..................
قتلت ناجي العلي لما رسم صورة
يواجه الحزن فيها براية مكسورة
لما فضحني ورسمني صورة طبق الأصل
ما عرفشي يكذب ولا يطلع قليل الأصل
الناس بترسم بريشة وهوه ريشته نصل
فضح رموز الرواية وهيّه عَ المسرح
قتلته بأيدي وإيد غيري في آ خر الفصل
يا بلادي ..
ما تزعجيش نفسك عشان صورة !
أهلي لا أهلك . ولا أهلك ساعات أهلك
ما تحكليش ع اللي قتلك ..
مش حاخد لك تار
ما ملكش غير أحسدك خالص على قتلك
قتيل في غربة .. بيفرق عن قتيل الدار
يا ماشي للنور.. ومش ماشي على مهلك
واحنا خطاوينا يمّ الموت .. تجيب العار
أنا الموساد .. والفساد.. قاتل كتير قبلك
كمال .. وغسان .. واسأل ماجد أبو شرار
وحاموت .. لاشفتك .. ولا حاعرف في يوم قبرك
لا حاحُط زهرة عليه ولا حأغرس الصبّار
حاولت قتل الجهل طلع الجهل متعلّم
وأهه قتلك
وحولك وأنت واضح . . سر من الأسرار
***
أمايه..
وأنتي بترحِّي بالرحى
على مفارق ضحى
وحدك .. وبتعددّي
على كل حاجة حلوة مفقودة
ما تنسنيش يامّه في عدوُّدة ...
عدوّدة..
من أقدم خيوط سوده في توب
الحزن
لا تهّللي فيها ولا تولولي
وحطّي فيها اسم واحد مات
كان صاحبي يامه ..
واسمه ناجي العلي..
***
أطفالك البؤسا.. قاموا هناك ورا الشباك
بيفتحوا بالضوافر.. فكرة الشباك
مين أول اللي رسمهم في الصحف إلاّكَ؟
قلعوا الهدوم القدام .. وطلعوا بهدومك
إصحى يا ناجي العلي.. قامت القيامة هناك
***
قامت قيامة ثمانية وأربعين .. غارفة
في طريقها ذل السنين العاقر الناشفة
إصحى يا ناجي العلي.. أهي صحيت الضفة
يقشعروا الأرض .. إصحى جاوب الهزة
سنّ القلم من جديد وارسم بنات غزة
غزة اللي حضنت سلوكها وعشقت الحزة
ماماتتش..
طب ما انت مت...

عرفت تتوفى؟!

عدى النهار.. رائعة أخرى للأبنودي

عدّى النهار .. و المغربية جايّة
تتخفّى ورا ضهر الشجر
و عشان نتوه في السكة
شالِت من ليالينا القمر
و بلدنا ع الترعة بتغسل شعرها
جانا نهار مقدرش يدفع مهرها
يا هلترى الليل الحزين
أبو النجوم الدبلانين
أبو الغناوي المجروحين
يقدر ينسّيها الصباح
أبو شمس بترش الحنين؟
أبداً .. بلدنا للنهار
بتحب موّال النهار
لما يعدّي في الدروب
و يغنّي قدّام كل دار
و الليل يلف ورا السواقي
زي ما يلف الزمان .. وعلى النغم
تحلم بلدنا بالسنابل و الكيزان
تحلم ببكرة .. و اللي حيجيبه معاه
تنده عليه في الضلمة وبتسمع نداه
تصحى له من قبل الأدان
تروح تقابله في الغيطان
في المصانع .. و المعامل .. و المدارس .. و الساحات
طالعة له صحبة .. جنود
طالعة له رجال .. أطفال .. بنات
كل الدروب واخدة بلدنا للنهار
و احنا بلدنا للنهار
بتحب موال النهار
لما يعدي في الدروب
و يغني قدّام كل دار

وهيبة.. رائعة أبنودية

تحت السجر يا وهيبة .. ياما كلنا برتقان..
كحلة عينيك يا وهيبة .. جارحة قلوب الجدعان ..
الليل بينعس ع البيوت وعلى الغيطان ..
والبدر يهمس للسنابل والعيدان ..
يا عيونك النايمين ومش سائلين ..
وعيون ولاد كل البلد صاحيين ..

تحت السجر .. واقفة بتتعاجبى ..
دى برتقانة ولا ده قلبى؟
قلبى طرح .. نور فرح ..
لما رأيت رمشك سرح ..
كحلة عينيكى يا وهيبة .. جارحة قلوب الجدعان ..
******

يا عايقة يا انتى .. يا نجمة الصبحية ..
خلخال برنة يرقّص الجلَابية ..
والعقد خلا الرقبة كهرمانية ..
والطرحة بالترتر ..
ملالية ملالية..

تحت السجر .. واقفة بتتعاجبى ..
دى برتقانة ولا ده قلبى؟
قلبى طرح .. نور فرح ..
لما رأيت رمشك سرح ..
كحلة عينيكى يا وهيبة .. جارحة قلوب الجدعان ..
******
تحت السجر ..
طل القمر يا لالالى ..
شافنى حزين ميل عليا وقاللى ..
عين الجميل منك بقى اتهنى ..
تحت السجر راح تضحك الجنة ..

تحت السجر .. واقفة بتتعاجبى ..
دى برتقانة ولا ده قلبى؟
قلبى طرح .. نور فرح ..
لما رأيت رمشك سرح ..
كحلة عينيكى يا وهيبة .. جارحة قلوب الجدعان ..
تحت السجر يا وهيبة .. ياما كلنا برتقان.

[ابو يحيي]

الاخوة الي طلبو الاستعمارالعربي
القصيدة موجودة علي هذا الربط
http://www.sama3y.net/forum/attachme...2&d=1181501680
وعلي فكرة الجزء المسجل باسم
ياعنكبوتة هوة جزء من ديوان
الاستعمار العربي
مع خالص تحياتي

[ابو يحيي]

عبدالرحمن الأبنودي شاعر شعبي مصري
ولد في قرية أبنود في محافظة قنا في صعيد مصر عام 1938

كتب أغاني للعديد من المطربين ومن أشهر أغانيهعبد الحليم حافظ : المسيح عدى النهار
أحلف بسماها وبترابها إبنك يقولك يا بطل
أنا كل ما أقول التوبة ، الهوى هوايا ، وغيرها .

محمد رشدي : تحت الشجر يا وهيبة ، عدوية ، .

فايزة أحمد : يامّا القمر ع الباب ، يمّا يا هوايا يمّا .

نجاة الصغيرة : عيون القلب .

شادية : آه يا اسمراني اللون .

صباح : ساعات ساعات .

وردة الجزائرية : طبعًا أحباب .

ٌٌٌُمحمد منير : شوكولاتة ، كل الحاجات بتفكرني ،
من حبك مش بريء ، برة الشبابيك ، الليلة ديا
مؤلفاته
الأرض والعيال
الزحمة -

عماليات
جوابات حراجي القط،
الفصول،
أحمد سماعين

وجوه على الشط،
سيرة بني هلال،
المشروع والممنوع،
الجزر والمد،
موت خيال المقاتة،
صمت الجرس،
الموت على الأسفلت،
الاستعمار العربي،
أنا والناس،
بعد التحية والسلام،
بغداد

[ابو يحيي]

رائعة الابنودي
عيون القلب
عيون القلب سهرانة ما بتنامش
لانا صاحية ولا نايمة ما بقدرش
يبات الليل.يبات سهران.على رمشي
وانا رمشي ماداق النوم . وهو عيونه تشبع نوم
روح يانوم من عين حبيبي .روح يانوم

*

حبيبي اه من حبيبي.عليه احلى ابتسامة

.

لما بتضحك عيونو.بقول يالله السلامة
لما يسلم عليي. ولا يقول لي كلام
عايزة ورا كل كلمة.اقوله يا سلام.ياسلام
دا قال لي في يوم.يا حبيبتي خدي القمر
ورحت معاه .وما اداني الا السهر

وانا رمشي ماداق النوم . وهو عيونه تشبع نوم
روح يانوم من عين حبيبي . .روح يانوم

*

تقولي كلام.وافرح بيه.انا افرح بيه
اسيب النوم. وافكر فيه .انا افكر فيه
انت تقول وتمشي .وانا اسهر مانامشي
ياللي ما بتسهرش.ليلة ياحبيبي
سهرني حبيبي.حبك يا حبيبي
بكتب عالليالي.اسمك يا حبيبي
دا قللي في يوم يا حبيبتي خدي القمر
ورحت معاه وما اداني الا السهر

وانا رمشي ماداق النوم . وهو عيونه تشبع نوم
روح يانوم من عين حبيبي .روح يانوم

*

حبيتك يا حبيبي من غير مااسال سؤال
وحاسهر يا حبيبي مهما طال المطال
انا بس اللي محيرني وما خلانيش انام
ازا ي انا اقدر اسهر وازاي تقدر تنام
واقول له حبيبي
كل ما فيك حبيبي
وحلو. صوتك حلو . وقلبك حلو
وحتى لما تتعبني واسهرلك سهرك حلو

وانا رمشي ماداق النوم . وهو عيونه تشبع نوم
روح يانوم من عين حبيبي .روح يانوم

[ابو يحيي]

الشاعر عبد الرحمن الابنودي
الليله المحمدية
كتبها عام 1990
غناها الفنان عبد الله رويشد بالاشتراك مع الفنانة سعاد عبد الله

يالله

أشكو إليك .. أشكو إليك يا واهب النعم

يا أقدم القدم
إنت اللي اعلم باللي فيا من الم
بلدي إنظلم .. بلدي إنظلم
والي ظلمني ولاد عمومه ودين ودم
كانوا مع الشيطان يا ربي على ميعاد
وأللهم لا إعتراض .. أللهم لا إعتراض
أللهم لا إعتراض .. أللهم لا إعتراض

يالله

ومدام يا ربي خلقتلي دمعي
من حقي ابكي .. من حقي ابكي
انشاله ابكي دم
ومدام يا ربي خلقتلي صوتي
ومدام يا ربي خلقتلي صوتي
حاصرخ لو العالم .. حاصرخ لو العالم
حجر أصم
حاصرخ لو العالم حجر أصم
حاصرخ لو العالم حجر أصم

يالله

يا أمة الإسلام .. خلص مني الكلام

يا أمة الإسلام .. خلص مني الكلام
لا عين شايفه حق .. ولا شايفه ملام
لا عين شايفه حق .. ولا شايفه ملام
بيتي وبيقول بيته .. بيتي وبيقول بيته
اللي جه يعتدي
ومسجد لله بنيته .. ومسجد لله بنيته
بيقول ده مسجدي
بيتي وبيقول بيته .. بيتي وبيقول بيته
اللي جه يعتدي
ومسجد لله بنيته .. ومسجد لله بنيته
بيقول ده مسجدي

يالله

سامحني يا الله .. حاتشق قلبي الآه
سامحني يا الله .. حاتشق قلبي الآه
الباطل الواضح .. الباطل الواضح
في مسلمين تابعاه .. على دمي ماشيه وراه
في مسلمين تابعاه .. على دمي ماشيه وراه
إخوتنا في دينا .. إخوتنا في دينا
لقوا سكة الجنه في أحلام الطغاه
إخوتنا في دينا .. إخوتنا في دينا
لقوا سكة الجنه في أحلام الطغاه
سامحني يا الله وهاوديني يا آه
سامحني يا الله وهاوديني يا آه
أنا في واد يا ربي وبلادي في واد
أنا في واد يا ربي وولادي في واد
أنا في واد يا ربي وفؤادي في واد
سامحني يا الله وهاوديني يا آه
سامحني يا الله وهاوديني يا آه
أنا في واد يا ربي وبلادي في واد
أنا في واد يا ربي وولادي في واد
أنا في واد يا ربي وفؤادي في واد
وأللهم لا إعتراض
أللهم لا إعتراض
أللهم لا إعتراض

[MAAAB1]

مساء الورد

بعد التحية والسلام ـ أشعار مصرية ـ عبد الرحمن الأبنودي

من سلسلة مطبوعات الشعب

الصادرة عن مؤسسة دار الشعب للصحافة والنشر والطباعة والتوزيع

الطبعة الأولى ـ ١٩٧٥

[د أنس البن]

عودا طيبا وحميدا يا دكتور منتصر مع الخال الأبنودى
وأنتهز هذه الفرصه لأكررإعتذارى الشخصى لكم عن الملفات التى فقدت بالخطأ أثناء النقل .. إنت عارف بأه زحمة الطريق والإشارات , ربنا يسلم
المهم يا ريت تتكرم وتتفضل برفع ما فقدناه من ملفات قبمه وشكرا مقدما

[MAAAB1]

المشاركة الأصلية كتبت بواسطة د أنس البن

عودا طيبا وحميدا يا دكتور منتصر مع الخال الأبنودى

وأنتهز هذه الفرصه لأكررإعتذارى الشخصى لكم عن الملفات التى فقدت بالخطأ أثناء النقل .. إنت عارف بأه زحمة الطريق والإشارات , ربنا يسلم
المهم يا ريت تتكرم وتتفضل برفع ما فقدناه من ملفات قبمه وشكرا مقدما

مساء الورد
ولا يهمك ياأستاذنا الكبير
سنحاول رفعها مرة أخرى ، ونرفع معها أيضا كتب أخرى لم يتم
رفعها على النت ، لتبقى مكتبة منتدانا متميزة دوما بمحتواها وجديرة
بمقام أعضاء المنتدى وزواره الكرام ... تحية ومحبة .

[محمود الطائر]

ان الحياه بدون الشعر تكون جافية