ولعلم حضرتك الفكره دى جت فى تفكيرى من اخر مقابله كنا فيها مع بعض وخصوصا لما اتكلم الالاتى عن القطعة الابداعية (حلاوة زمان ) وقال فيها كلام كبير وكتير وهانشرها هنا باذن الله
الله الله على عن الجزء ده بالذات
الصورة الغنائية ( سوق بلدنا ) من أحب الصور إلى قلبي
و كلها روعة لكن بمجرد ما تبدأ الكمنجات فى عزف الجملة الشهيرة ليبدأ قنديل فى غنائه
بلاقي نفسى اتنقلت لعالم تاني
بتخيل نفسي الواد الصغير اللى بيبص للحلاوة و نفسه فيها
و اسمع كده قنديل و هو بيقول ( تعالى لعمك و دوق الحلاوة .. و عيـّط لأمك علشان الحلاوة )
و الله حاجة تفتح النفس حتى لو بيبيع ايه
لو في حلواني بالصوت ده كان زمانه أغنى حلواني في بر مصر
-
( و آن الأوان تدوق يا ولد )
الجملة دي شايفها أعمق من مجرد واحد هياكل حلاوة
لأ ده واحد أخيراً هينول كل اللي نفسه فيه بعد طول انتظار
اخى محمد السلامونى
والله انت فنان وحساس
تصدق ان نفس الكلام ده بالظبط ونفس المواضع دى وخصوصا
وان الاون ودوق ياولد
هى اللى كانت محور المناقشه بالذات لحجم الطرب والشجن اللى فيها
القلوب والافكار عند بعضها اخى محمد
وورد بخاطرى فعلا زى ماخطر ببالك ان لو فيه واحد بياع يملك هذا
الصوت وبيبع انشالله سم هانشتريه منه ونشربه كمان
تحياتى ياذا الذوق العالى الحساس بالابداع
منتظرين مشاركاتك لتعلمنا مواضع الابداع
السلام عليكم يا حسن باشا
و انا ما قلتش حاجة تستحق الكلام الحلو ده
و مين اللي يعلم مين ؟ دا انا التلميذ و انتم الأساتذة
- -
النهاردة بقى جايبلك مقطع ، يا رب يعجبكم .. و أكون عند حسن ظنكم
- -
المقطع من أغنية : شباكين ع النيل
غناء : محمد قنديل
ألحان : بليغ حمدي
للأسف دي من الأغاني القليلة اللى جمعت بينهم !
و الكلمات للشاعر عبد الحمن الأبنودي
الكلمات
يا حبيبتي يا حبيبتي
شفت فى العين الشمال .. المناجل و الغلال
يا حبيبتي يا حبيبتي
شفت في العين اليمين .. المكن و الشغالين
و المدارس و العيال .. و السفاين و القنال
شفت مكنة الطحين .. و الحصاد و الفلاحين
و المصاطب و القمر .. ع المناجر و الشجر
شباكين بيطلّـوا ع الليلة الجديدة
اللي نجمتها ما صبحتش بعيدة
شباكين ع النيل عنيكي
الكلام بسيط .. صور التقطها الشاعر بتعبر عن حلمه بالمستقبل المشرق
و لحن بليغ حمدي فى غاية الجمال
أما محمد قنديل فهو ده الطبيعى بتاعه ، مفيش كلمة بتعدي من غير ما تاخد حقها
اسمعه و هو بينوّع فى طبقات صوته و كل كلمة لها احساسها و لها طبقتها
يعنى مثلاً إزاى رفع صوته فى كلمة المدارس ..و بعدها على طول ،
خفض صوته شوية فى كلمة ( العيال ) و قالها بكل حنية كإنه بيطبطب على عيل منهم
و على العكس قال ( السفاين و القنال ) بكل شموخ
مع إنه نفس اللحن لـ ( المدراس و العيال )
و بكل جدية قال " الفلاحين " و بكل رقة " القمر " و بعاطفة عالية " يا حبيبتي "
و هكذا ..
لو مطرب صوته جميل و حاول يوصل للمستوى ده من الأداء
لازم يسجل كل كلمة لوحدها !
* ملحوظة : المقطع اللى رفعته حذفت منه صوت الكورال و التكرار
شوف يا عم حسن
أولا حكاية الزعل دي .. إنساها خالص
أنا شفتك وعرفتك وكلت معاك عيش ومانجة
يعني لو حصل إيه إن شاء الله مافيش زعل
وأنا فعلا باشاكسك وباعكسك مش أكتر
فكرة حضرتك جميلة ، وهي غير مختلفة نهائيا عن فكرتي السابقة
الإثنان لهما نفس الهدف
وأنا فاهم قصدك كويس جدا
وبأييدك كمان
صدقني أنا كنت باهزر فقط وقلت أفكرك بكلامك بتاع زمان
طيب .. ليه أنا باقول إن الفكرتين زي بعض ؟؟؟
لإن هدفهم واحد
ولإنهم لن يضروا بشيء ..
فعندما أخذنا بعض أغاني الصور الغنائية
لم نضر الصورة الغنائية بشيء ..
لإنها زي ما هي .. موجودة كاملة متكاملة ..
وفي نفس الوقت الأغنية التي خرجت منها أيضا لها كيانها .. ولم يمسسها سوء .
ولو كان هناك تحفظ أو ضرر .. لكان وقع على كل أعمال الأخ عادل سيد في كنوز السينما
والذي قام بقص أغاني أكثر من 300 فيلم ..
وها نحن نستمتع بأغاني الأفلام سواء المصورة وغير المصورة ..
وهل في فكرتك هذه حين نقُصّ قطعة معينة من أغنية أو مقطوعة موسيقية .. أدنى ضرر على الأغنية الأصلية .. أو على المقطوعة التي قُصّت .
بالطبع لا ..
وزي ما حضرتك قلت إن فكرتك لها هدف أن تبرز للمستمعين لمحة جمالية داخل أغنية معينة سواء في الموسيقى أو في صوت المطرب ..
أيضا كانت فكرة استخراج أغاني الصور الغنائية وهدفها إبراز هذه الأغاني للمستمعين الذين لا يسمعون الصور الغنائية من الأساس ..
أو المستمع الذي لم يأخذ في باله هذه الأغنية حينما استمع للصورة ..
وحتى الأخوة السميعة التقال .. هناك العديد والعديد من الأغاني التي لم يستمعوا لها ، لإنها داخل بعض الصور الغنائية ..
فلما لا يكون لدينا نسخة من الأغنية منفصلة ، غير النسخة التي بداخل الصورة الغنائية ..
عموما ..
فكرتك جميلة يا عم حسن ..
وأنا أول ما قرأتها كنت هاشارك فيها على طول بقطعة من أغنية ..
ولكن قلت أعاكسك الأول بالكلمتين دول .. اللي أخذتهم Copy من كلامك السابق ..
**
نقطة أخيرة ..
بالنسبة لقانون عدم رفع أغاني في الصالون ..
أعتقد أن المقصود به الأغاني التي يمكن رفعها في مثبتها الأصلي ، والإكتفاء بوضع رابطها فقط هنا ..
أما في حالات معينة ..
مثل : شرح وتحليل الأغاني لعم محمد الالاتي .. والتي قد يحتاج فيها رفع قطع معينة من أغنية ما ..
وحالة مثل التي نحن فيها الآن ..
وأي شيء يستدعي رفع بعض الملفات ..
فلابد أن يكون الرفع مباح .
خالص تحياتي واحترامي ومحبتي
وهو فيه أحسن ولا أفضل من القطعة اللي ذكرتها أنت وأخي محمد السلاموني
***
على بركة الله
من الصورة الغنائية سوق بلدنا
حلاوة زمان
***
تعالوا نتناولها جميعا
ونشوف كده رأي الناس كلها
السلام عليكم ورحمه الله
هتعبك معايا يااستاذ حسن
لانى مش باعرف اقطع الاغانى
لكن انا عندى مقطع من دويتو انا بحبه جدا بين ليلى مراد ومحمد فوزى وهو اخر دويتو فى فيلم ورد الغرام اسمه" ياللى شغلتى القلب"
والكوبليه اللى اقصده هو الكوبيليه الوحيد اللى غنته ليلى مراد فى الدويتو ياريت حضرتك تقدر تجيبه
بالاضافه لكوبليه لمحمد فوزى فى اغنيه طير بينا ياقلبى وهو اللى بيقول فيه الورد من يوم وحدتى خاصم حبايبه كلهم سابنى لنصيبى وقسمتى ليكون نصيبى زيهم لاخر الكوبليه ده
حاضر يااستاذه لولو
بس اسمعى معانا المقطع البديع ده لاسمهان - ونشوف الاعجاز فى طبقات صوتها العليا - شوفوا بتوصل لاى مستوى
ياترى صوتها احلى ولا صوت الطيور
اما العظيمه ام كلثوم
فاسمعوا المقطع ده من اغنية
قصة الامس
يسهر المصباح والاقداح والذكرى معى
ولماذا هذا المقطع
لان ام كلثوم تؤديه - تماما كما يجود كبار القراء القرآن الكريم
نفس الطريقة تماما - كأنى ارى ام كلثوم تلبس عمامة المقرئ
وتضع يدها على اذنها ولا تغنى ولكن تقرأ القران - مع الفارق فى الكلمات
اسمعوا - كيفية استعارة رياض السنباطى طريقة ألاداء من قرآءة القران