طلبات نوتة أ / عادل صموئيل الجزء الثانى - الصفحة 465

**كمال العرباوي** · #**4641** 30/12/2015, 06h04

صباح الخير استاذ عادل
ألف شكر على ما تقدمونه لخدمة الفن الأصيل
عندي مشكلة مع برنامج"pdftomuisic"
اصبح يقرأ النوتة ثم يصل الى بعض العلامات
مثلا "الكودا" او" السينيو" ويتوقف او يتشنج
للعلم البرنامج عندي مفعل
افيدونا بارك الله فيكم

اخى العزيز
انا حقول رأيى وطبعا موضوعك كل الاخوة الاحباء حايقروه وممكن حد يفيدك اكتر منى ... انا طبعا ما استعملتوش الا لما اتزنقت اوى يعنى حبيت استرجع ملف قديم مالقيتش الانكور وكان اللحن 15 صفحة وعشان انا دايما بحب البى طلبات كل منكم اضطريت استخدمه لمرتين فقط .... طبعا ملحوظاتى ( او فكرتى عنه بطالة جدا يعنى ) مش بيقرا حاجة غير الحروف الموسيقية يعنى انا عندى لا قرا المرجعات ولا اى حاجة ... وهو اكيد لما بيشوف اى حاجة غير الحروف الموسيقية بيحصل لو لخبطة ... والبرامج دى كلها فاشلة اسمع كلامى لو محتاج برنامج يقرا لك النوتة نزل انكور واكتبها عليه تانى يعنى الكتابة حتزود مهارتك فى القراءة والاحساس بالنغمات يعنى حاتستفيد اوى اوى وساعتها البرنامج حايقراها لك صح ... حتى لو مش عايز تكتب الاغنية كلها اكتب الجملة اللى تحسها صعبة واجيب لك من الآخر ... البرامج اللى بتقرا نوتة من pdf معمولة اصلا عشان النوت الغربية اما النوت الشرقية بتاعتنا بتعمل لها دوار بحر
مع اطيب تحياتى عادل صموئيل

**wahidfarid** · #**4642** 30/12/2015, 12h22

بمناسبة حلول السنة الميلادية الجديدة آتمنى لكل الأعضاء سنة سعيدة و أخص بالدكر الآستاد عادل و أشكره على كل عطائاته و مجهوداته و أتمنى له الصحة لكي يواصل مشواره الفني

**عادل صموئيل** · #**4643** 30/12/2015, 13h40

احبائى

بمناسبة السنة الجديدة اقم لكم عمل متميز جدا

موسيقى الليالى الحلوة

عزف على الكمان احمد الحفناوى بالاشتراك مع عمر خورشيد من الحان محمد عبد الوهاب طبعا كاتبها بدون التقاسيم لن زى ما قلنا من قلب التقاسيم ماتتكتبش
ملحوظاتى ان لو المقطوعة دى مش عازفها احمد الحفناوى يعنى عازفها حد تانى ماكنتش افكر اتكبها نهائيا بسبب ايه ... هى طبعا ما اتعملتش قدامى لكن بخبرتى وعلاقتى بكل من اشترك فيها اللحن اللى انت تسمعه ده هو تلحين عبد الوهاب بالحرف ... ماعدا التقاسيم عبد اولهاب بيترك للحفناوى جزء يطلع فيه اللى جواه ... والحفناوى رحمه الله وكان صديقى يعنى كان لما بيبقى عندنا حفلة فى اسكندرية كنا بعد الحفلة بنسهر سوا دايما ... كان رحمه الله مدرسة ... فى بساطة الاداء بحيث ان اى حد من عامة الشعب يفهمه ... وبيؤدى اللحن زى ما الملحن عايز بالضبط او زى ماهم متفقين ... يعنى كان ممكن الحفناوى يروح عند عبد الوهاب البيت لوحده ويكونوا الصولو مع بعض وبعد ما يتفقوا على حاجة خلاص كده انتهى الموضوع مفيش حرف لازيادة ولا انقص ... وروعة وحلاوة الحفناوى كمان ان الصولو الشهير بتاع ام كلثوم بيبقى الجمهور خلاص حفظة وبيتمتع لما يسمعه زى ما هو ولو ام كلثوم عملت عشرين حفلة بيبقى نفس الاداء عشان ما يطيرش السلطنة من الجمهور ... الحفناوى له الفضل فى ان ملايين من الناس يحبوا الكمان واللى ربنا اتاح له الفرصة انه يتعلمها كان بسبب الحفناوى ( وانا واحد منهم ) يعنى بسمع صولو جميل زى العسل والناس بتصفق له ويعيد تانى ... واتمنيت ابقى زيه ... بعكس اللى بيعزفوا صولوا بعده ... تلاقى النوتة مكتوب شىء وهو بيعزف شىء هلامى مالوش لا هيكل عظمى ولا عامود فقرى بحيث ان المستمع ما يفهمش منه حاجة ... او واحد شاطر بيستعرض عضلاته يعمل فزلوكة كده يعنى فى وسط الجملة يروح عامل سلمين يطلع اوكتافين ورا بعض يعمل لك حاجة عفاريتى ولو عبد الوهاب سمع ده مكانش يخليه يعزف صولو
اتمنى ان تستمتعوا بيها وتكون السنة الجديدة كلها ليالى حلوة
مع اطيب تحياتى

**كمال العرباوي** · #**4644** 30/12/2015, 14h20

ألف شكر استاذ عادل على ردكم الكريم ..
طبعا رأيكم عزيز علينا
بس انا مبتدا ..وبحب اسمع النوتة كذا مرة من البرنامج عشان استطيع ان اعزف ما تيسر منها
الف شكر استاذ

**amrnabmans** · #**4645** 30/12/2015, 19h59

شكرا لحضرتك على تلبية طلبي

كل سنة وانت طيب وربنا يعود الايام عليك بكل خير وصحة

**خليل سليم** · #**4646** 31/12/2015, 00h30

تحية إجلال واكبار للاستاذ الكريم عادل المحترم على ما قدمتم وما تقدم من اعمال كبيره للخالدين وكل عام وانتم وأعضاء المنتدى الراقي المحترمين بخير

**حمدي محمد أحمد** · #**4647** 01/01/2016, 08h50

المايسترو القدير عادل بك صموائيل

كل سنه وحضترتك طيب جعل الله كل لياليك حلوة

ممكن لو تكرمت نوته محمد رشدي ميتا أشوفك ولك جزيل الشكر

**عادل صموئيل** · #**4648** 01/01/2016, 16h16

احبائى
اول يوم فى السنة الجديدة بيبقى يوم متميز حبيت اقدم لكم حاجة غاللية جدا جدا هى انطلبت من فترة وانا فعلا دونتها لكن كنت مخليها ليوم مشهود او مناسبة كبيرة
فى اول يوم فى السنة نقول كل سنة وانتم طيبين وعام سعيد وكل الكلام ده لكن اغلى شىء فى الوجود نقول له كل عام وانت بخير هو الوطن ... لما اقول كل سنة وانت طيب ياوطنى بدعو لكل سكان الوطن بالخير

اقدم لكم رائعة ام كلثوم من الحان السنباطى

ياحبنا الكبير

النشيد الرائع ده بأجمل كلماته وحلاوة لحنه ام كلثوم غنته فى عيد الثورة فى منتصف الستينات بحضور الرئيس الراحل عبد الناصر .. لكن مع الاسف النشيد ده اتظلم يعنى ما اتذاعش بعدها ما اخدش شهرة زى باقى اغانيها الوطنية ويمكن كتير منك ما يعرفه او عمره ما سمعه .. يعنى اللى سمعه فقط عشاق كل اغانى ام كلثوم اللى عاصروا وقت ماغنته .. ومن اهم مميزات النشيد ده انه مش محدد لبلد ما يعنى هو باللغة المصرية العامية لكن مألوفة فى كل الدول العربية يعنى ممكن فى اى حفلة فى اى دولة مطرب او مطربة تغنيه حايبقى للوطن اللى بيتغنى فيه اتمنى لكم ان تستمعوا به
مع اطيب تحياتى

**هشام بيه** · #**4649** 01/01/2016, 16h19

السلام عليكم
شكرا على هذا المنتدى الرائع. وقد بدأت اتصفحه يوميا تقريبا باحثا عن نوتات اعزفها على الجيتار
انا ابحث عن نوتة اغنية عطشانة لبهيجة ادريس شكرا لكم

اخى العزيز
ممكن تنزل لى الملف الصوتى او رابط يوتيوب اسمعها اذا كنت اقدر ادونها او لأ
مع اطيب تحياتى عادل صموئيل

**كمال العرباوي** · #**4650** 01/01/2016, 18h09

ملايين لكن في حبك ***كلنا اهل وارايب
وكذلك هم رواد منتدى ""سماعي" في محبتك يا استاذ عادل
تدوينة جميلة ... مش غريبة على استاذنا عادل صموئيل
الـــــــــــــــــــــــــــف شكر