طلبات نوتة أ / عادل صموئيل الجزء الثانى

[نور الصباح]

الأخ العزيـــــــــــــز الفنان الكبير
الأســــــــــــــــــــــــــــــــــــتاذ
عـــــــــــــــــــــــــــــــــــــــــــــــــ ـــــــــــــــــادل باشــــــــــا صموئــــــــــــــــــــــــــــــــــــــــــــــ ــيل
سلام الله عليكم ورحمته وبركاته
وبعــــــــــــــــــــــــــــــــــــــــــــد :
كل عــــــــــــــــام وأنـــــــــــــتم بخي وصحـــــــــــــة جيـــــدة
بمناســــبة
(( عــــــــــــــــــــــــيد شم النســـــــــــــــــــــــــــيم ))
واســــــــــمح لنا أن ننتزعــــــــكم من ( المزاج العندلــــــــــــيبى )
إلى ( المزاج الشــــــــــــــــحرورى الصــــــــــــــــــــــــــــــبوحى )
وأطلب من جنابكم التكرم بتدوين الأغانى التالية للشحـــــــــــــــــــــــرورة
و الصبوحــــــــــــــــة { صــــــــــــــــــــــــــــــــــــــــــــباح }
1 ) - مال الهوى يا أمه
2) - مش فاكرة شوفتك فين
وهذه الأغنيات هى ولا يخفى على جنابكم من أجمل و أرق
ما غنت ( صـــــــــــــــــــــباح )
ومرفق طيه الملفات الصوتية
أما بالنسبة لشم النسيم
أحب أقول لك أن الفسيخ حلال و الرنجة حلال والسردين حلال
والملوحة الصعيدى برضة حلال
بس فين هى ؟؟؟؟؟
وشكرررررررررررررررررررررررررررررررا
أخوكم
نور الصباح

[عادل صموئيل]

احبائى

اقدم لكم من روائع عبد الحليم القديمة

مالك ومالى

وتحية الى الاخ العزيز نور الصباح لكن لى رجاء انت طلبت الاغنية دى من شهرين وكنت كل يوم تكرر الطلب
يعنى انا اى طلب انتم بتطلبوه لو حاجة عاجبانى بنزلها فورا بعدين بكتبها بالترتيب ولو حاجة مش عاجبانى او مش مستلطفها مش بكتبها زى ختم الصبر علينا انا كل ما اسمعها مش تعجبنى اكتر
يعنى انت لو طلبت طلب وانا نسيتو اكتر من شهرين مثلا ممكن تفكرنى
فيه سبب مهم تكرار المشاركات بيزود عدد الصفحات على الفاضى يعنى بنكون وصلنا 700 صفحة مثلا وهم فى الحقيقة اقل من كده بكتير بعدين فيه اخوة مشرفين بيعملوا تنقية للواضيع بيحذوفا المشاركات اللى مالهاش لازمة .. وخطورة حذف عدد كبير من المشاركات ( لأنو مش حا يبقى فاضى يحذف واحدة واحدة لأن الحذف عملية مزعجة يعنى بيعلم على المشاركة علامة بعدين ينقلها للمحذوفات ( شغلانة ) بعدين هو نفسه بيلاقى نفسو انتقل الى قسم المحذوفات بعدن بيرجع للصفحة الرئيسية بعدين بيدخل ع النوت الموسيقية بعدين بيدخل على القسم بتاعنا ده بعدين بيدور على هو كان فين شوفوا اللفة مزعجة اد ايه ......
لذلك هم بيعملوا ايه ؟؟؟ بيوفروا جزء من العذاب ده وبيعلم على كذا مشاركة مع بعض بحيث انو بدل مايلف اللفة دى 45 مرة يلفها مثلا 6 مرات لكن خطورة الحكاية دى انو ممكن وسط الزحمة يحذف نوتة وهو مش واخد بالو وطبعا دى خسارة كبيرة للمنتدى او للأعضاء اللى يكونوا لسه ماشافوهاش ... والاخطر جدا فى حالة الحذف الجماعى ان ممكن يتحذف الموضوع كلو وحصلت مرة قبل كده والمشكلة الاكبر ان المرة السابقة لما وصلنا لعدد 1000 صفحة الادارة قفلت الموضوع لأن ماحصلتش موضوع يوصل 1000 صفحة واضطريت افتح الموضوع التانى اللى احنا فيه
يعنى يا اخى العزيز انت الناردة طلبت اغانى لصباح انتظر لحد سنة 2016 ... او بلاش لسنة 2015 الساعة 11 صباحا ماشى ؟
مع اطيب تحياتى

[عادل صموئيل]

احبائى

اقدم لأخى العزيز وائل علوى نسخة من

ليلة القبض على فاطمة

من درجة لا واعتقد دى اسهل درجة ممكن اللحن ده يتكتب منها
هى المشكلة زى ما انا قلت اول مرة ان اللحن ده بيعتمد على التوزيع بنسبة 90% لذلك انت لما تعزفه على عود منفرد او اى آلة تانية مش حاتستسيغه التوزيع فى الالحان اللى بتعتمد على التوزيع فقط مفيهوش ميلودى متميز بيبقى زى سفرة عليها الوان من الاطعمة كلهم بتاكلهم مع بعض ولو تعزف اللحن لوحده كانك بتاكل حاجة واحدة فقط يعنى زى الخبز الحاف فقط مثلا ... وفيه مثال فى معزوفاتى المتواضعة لو تشوفها كلها تلاقينى عمرى ما اعزف هذا النوع من الالحان لنى حاحس انى فاضى بعكس ما اعزف لحن من النوعية اللى انا بعزفها بحس انى فرقة

مع اطيب تحياتى

[mahmoud feteih]

أؤيدك فى موضوع النوتات اللى بتحبها بتكتبها على طول واللى متبتحبهاش مابتكتبهاش وده حقك لانه مش دوا لازم تاخده غصب عنك كذلك بالنسبه للعضو النوته اللى عاجباه حايحملها ويعزفها انا مثلا بانزل كل النوتات وباعزفها اول ماحملها وفيه نوتات بانزلها ولا اعزفها لانى مش حاببها بس باقول اهى موجوده ع الجهاز زى السوبر ماركت الكبير لازم يكون عنده كل البضاعه حتى لو مفيش عليها طلب وفى الاونه الاخيره بطلت انزل نوتات لان مش كل اغانى الزمن الجميل حلوه ولقيتها مش على هوايا بالمره وده لاينقص من قدرها انما الحاجه الحلوه لايختلف عليها احد اما موضوع الالحاح فى الطلب وكلمات المديح والثناء وانت تستحق اكثر من ذلك عندما تأتى بنتيجه فوريه يترك ذلك اثر سلبى على باقى الاعضاء واكيد بياخدوا على خاطرهم وانا واحد منهم لكن كلمة حق انا مدين لك بالفضل وربنا يعينك على طلباتنا

[وائل علوي]

المشاركة الأصلية كتبت بواسطة basma2265

مساء الخير يا استاذ عادل كنت محتاجه اغنيه بالاحضان لعبد الحليم حافظ

اتمنى تفي هذه النوتة بالغرض لحين تدوينها من استاذنا وانا شخصيا عزفتها من هذه النسخة وهي مضبوطة
مع اطيب تحياتي

[المنير]

السلام عليكم
شكرا للأستاذ عادل على نوتة "ليلة القبض على فاطمة".
هدية بسيطة نسخة جديدة لبرنامج يعجب الباشا

[عادل صموئيل]

المشاركة الأصلية كتبت بواسطة المنير

السلام عليكم
شكرا للأستاذ عادل على نوتة "ليلة القبض على فاطمة".
هدية بسيطة نسخة جديدة لبرنامج يعجب الباشا

اخى العزيز

يعنى انا مش عارف اشكرك ازاى واشكر كل اخ عزيز بيهدينا برامج , لأن المشكلة اللى حصلت معايا الشهر الماضى وكانت حاتعطلنى وقت طويل عن التدوين كان حلها فى البرنامج ده بالذات انى حليت عليه المشكلة وعملت فونت جديد او على الاصح انشأت ملف جديد نقلت داخله محتويات الفونت القديم وحفظته بحيث انو مايعطلش تانى
وطالما انت بتحل المشاكل الصعبة دى عندك فكرة عن برنامج يجلب السيريال او الكراك لأى برنامج ؟ بس المطلوب يكون فعال
انا بدخل على النت وببحث لكن نزلت 3 برامج طلعت عقيمة جدا جدا وحتى لو نزل سيريال او كراك بيكون لبرامج قديمة جدا اكل عليها الزمان وشرب طبعا الموضوع ده ممكن يستفيد منه اعضاء اعزاء كتير
مع اطيب تحياتى عادل صموئيل

[المنير]

اخى العزيز الأستاذ عادل
هناك برنامج معروف لجلب السيريالات يدعى "craagle" مجاني و متوفر على النت.لقد وجدته الان لكن شك فيه الأنتيفايروس Kaspersky. بالنسبة لبرنامج الخطوط الذي أهديتك إياه فإنه مرفق بالكراك (نقل الكراك إلى ملف البرنامج ب programme files بالنسبة للمبتدئين).
تحياتي

اخى العزيز اشكرك
ملحوظة للمتدئين
اول حاجة بعد تسطيب البرنامج تقفل البرنامج بعدين تعمل تعطيل للأنتى فايرس لأنه بيقرأ الباتش كانه فايرس ويحذفه
بعدين افتح ملف الباتش وانسخ الباتش وضعه فى ملف البرنامج فى البروجرام فايلز ثم اعمل ok للباتش ومبروك
وفيه نصيحة مهمة جدا جدا اى برنامج عندك يكون يحتوى على كراك او باتش
دائما احتفظ به فى ملف مضغوط وانقله على سى دى خارج الجهاز
لأنك لو فتحت الملف المضغوط دون ان تعطل الانتى فايرس .. الانتى فايرس حايحذف الكراك او الباتش ووجود البرنامج مضغوط بيحافظ لك على الكراك فى المستقبل لو حبيت تشيل الويندوز وتنزلو تانى
مع اطيب تحياتى

[عاصم المنشاوى]

الأصدقاء الأعزاء

شئ حزين مانراه اليوم ...وقد أنتشر على ال"يوتيوب"...أن الموسيقى حرام
ورجس من عمل الشيطان...مش متخيل الناس دى بتفكر أزاى؟...والغريب انه يوجد الكثير ممن هم متعاطفين مع هذا التيار الدينى ....الموضوع بكل بساطة ان أفلام الكرتون للأطفال....تم أعادة نشرها على اليوتيوب...بعد "أسلمتها" كما يقولون ...فالأسلام-من وجهة نظرهم- يحرم الموسيقى ...أكتب (توم وجيرى أسلامى ) بدون موسيقى بل أصوات -بالطبع رجالى - فصوت المرأة عورة ....تم حذف الموسيقى وأستبدالها بهذه الأصوات المنفرة ....ومش كده وبس...لكن دخلوا على (بوجى وطمطم)...وكما يقولون "تم حذف كل ماهو غير أسلامى ويسيئ للأسلام ومنها الموسيقى...حتى لايتربى النشء على الخلاعة).......لاتعليق...خاصة ممن يتعاطفون مع هذا التيار وفى الأنتخابات يعطونهم اصواتهم....

اخى العزيز
هى المشكلة ان اسرائيل ومن وراءها عايزين يستولوا على المنطقة .. ومش عايزين يكرروا اللى حصل لهم فى فلسطين يعنى يحتلوا بلد فيها شعب موجود وصاحى ويفضل يقاوم فيهم ويقلق منامهم وتتعاطف معاه بلد عظيمة زى مصر وتحارب عشانهم ومرة ينتصروا ومرة يتهزموا ... هم عايزين لما يحتلوا اى بلد جديدة ( فى المشروع القومى اسرائيل الكبرى من الفرات الى النيل ) انهم يستولوا على بلاد تتحول اولا الى خرابات ووتكون مدمرة اقتصاديا وشعب جوعان مش لاقى ياكل العيش ولا دوا ولا شىء يعنى شعوب تبقى عبيد ماتقاومش .. والخطة هو تمكين الاخوة اللى مستعدين يبيعوا اى حاجة عشان يمسكوا السطلة لكى يرجعوا البلاد العربية الى العصر الحجرى
يعنى يخليوهم الاول يفجروا كل حاجة بعدين بالتدريج يوصلوهم للحرب بالسيف بعدين يضربوهم بالصواريخ .. والموسيقى يا اخى العزيز من الاشياء اللى بتفتح المدارك بتاعة الانسان وعلى الاقل بتريح مخه وجسمه بعد يوم شاق من العمل عشان يروح يشتغل بمزاج تانى يوم وينتج ... يعنى ايه الفرق بين الموسيقى والمخدرات مثلا ؟
الموسيقى بتغذى الروح وتفتح المخ لكن المخدرات بتدمر المخ والروح والجيب معا
يعنى انا اتوقع انهم ممكن يوزعوا المخدرات على الشباب ببلاش يعنى يخسروا شوية فلوس الاول بس بعدين حايكسبوا كتير ,,, واما عن موضوع المرأة ومحاولة طمسها من الحياة ( بعد ما اتعلمت وبقت فى اعلى المناصب وظهر نبوغها وانها ( كما قالت سعاد حسنى البنت زى الولد ماهيش كمالة عدد ) كيف قضى على المرأة ؟ انك تتلكك لها يعنى شكلها عورة يبقى لازم تغطيها بحاجة سوداء عشان ماتظهرش .. ولو اتغطت ما ليها صوت تعالى نكتم صوتها كمان بالدين ونقول ان صوتها عورة
ولو رجعوا للدين اللى بينتحلوه انا اعرف قصص كتير عن سيدنا محمد صلى الله عليه وسلم منهم قصدة عن السيدة عائشة انه قال : خذوا نصف دينكم من هذه الحميراء
معناها انهم يسمعوها تتكلم وتشرح لهم ومعنى ذلك ان صوتها مش عورة
والكلام عن سيدنا محمد اللى ما اعتقدش حد لا من المسلمين ولا المسيحيين ولا حتى البوذيين حايعترض على كلامه او يزايد عليه وخد من ده كتير
مع اطيب تحياتى

[basma2265]

مساء الخير كنت محتاجه اغنيه عظيمه يا مصر

الاخت العزيزة
تحت امرك لكن انا من كتر عدد النوت اللى بدونها بنسى دونت ايه ومادونتش ايه
وهنا الاخوة الاعضاء الاحباء واللى بيساعدوا بعض اللى عندو بينزلها سواء كانت من تدوينى او من تدوين اى حد تانى
ولو نزلو نوتة من تدوين حد تانى انا اكيد بشوفها وانا طبعا بحكم خبرتى مع مدرسين الموسيقى اكتر من 30 سنة بعرف اذا كانت النوتة مكتوبة سهلة يعنى انتى تطليعيها بسرعة وتريحك اما اذا كانت مكتوبة انا احس انها صعبة عليكى طبعا بدونها تانى بطريقتى يعنى انا بنتظر يومين تلاثة وان شاء الله حتكون عندك النوتة وهى للعلم سهلة مفيش مشكلة يعنى انا ممكن اكتبها دلوقتى فى ساعة بس حصلت كتير انى دونت النوتة وتطلع انا مدونها ومجودة من قبل
مع اطيب تحياتى