احبائى
اقدم لكم من روائع ام كلثوم
حانة الاقدار
الملفت فى اللحن ده انك تسمعه تحسه سهل لكن لما نيجى ندونه نلاقة صعب جدا جدا ,
السبب ان ام كلثوم بتجود جدا جدا واللزمات الصغيرة معقدة شوية , انا من وجهة نظرى فيه سببين السبب الاول ان فيه عفريت بيفزع الملحن لما يكون فى نفس العمل ملحن كبير جدا جدا ومتخصص فى النوع ده من الغناء واقصد الشعر الصعب , يعنى كانت الاغانى دى لفيلم رابعة العدوية وكان الشعر صعب جدا وكان فيه فى نفس الفيلم اغانى لرياض السنباطى العملاق المتخصص اول فى ام كلثوم وثانيا فى القصائد الصعبة وكان الموجى بيعتبر جديد على ام كلثوم الى حد ما .. وده كان بيخليه دايما بيحاول يغير فى اللحن او فى الاخراج
السبب الثانى والمتميز مع ام كلثوم انها كانت مش بتشتغل بالنوتة الموسيقية .. وده شىء بيجعل الملحن بعد ما الفرقة تحفظ ييجى عند لازمة يقول لهم قولوها كده .. وكده دى سهلى فى السماعى لكن فى النوتة ممكن ماتتكبش او يبقى شكلها معقد ماحدش يعرف يقراها بسهولة
المهم لما نيجى للتدوين كان ضرورى انى احاول اعمل نوتة بسيطة بدرجة معقولة بحيث انو يبقى عمل ممكن اى حد يقراه لكن التأكيد انك لازم تكون حافظ الاغنية جدا بحيث تشغل الاذن مع القراءة ,, من اصعب الحاجات فى اللحن ده بالذات تغيير الموازين والسرعات
اتمنى لكم التوفيق مع اطيب تحياتى