الى كل الاخوة الجزائريين من بينهم الأساتذة مختار حيدر ومجدي وعثمان دلباني لدي هذا التسجيل لاغنية المرسم حفل خارجي (الهواري بن شنات) أظنها لمطربها الأصلي فاذا تعرفتم عليه المرجو نقل الملف الى مثبث الخاص تحياتي
السلام على الجميع
اسف لم اجد اين اضع شعر هذه الاغنية
المرسم
يقال أن صاحب المرسم هو الشيخ الميلود من بوحنيفية و المتوفى سنة 1930.
استخبار الأغنية هو لشاعر أخر الشيخ الحاج خالد بن احمد
القصيدة و الاستخبار من كتاب كلام الجد و كلام الهزل الذي جمعه الأستاذ احمد أمين دلاي ص ص 153ـ 157
خمس صفحات لان الأستاذ دلاي قدم ترجمة القصيدة و الاستخبار باللغة الفرنسية.
أحسن من أدى هذه الأغنية طبعا هذا يبقى اختيار شخصي بلاوي الهواري الشاب خالد و نوري الكوفي نعم نوري صاحب الحوزي و الاندلسي.
الاستخبار الحاج خالد بن أحمد
نعيد لك معرفة بفصالها يا صاحب العقل يا عارف ذا القول
معرفة الرجال لخيار تنالها راحة وبسط عند حبيبك مكمول
معرفة الكتب خزاين باقفالها إذا قريت خذ الكنز المقفول
معرفة النساء تندم آخر حالها معلوم من همل ما يبقى مهمول
من طيحه بليس ما عين يعبالها و إذا رضاه ربي عيبه يزول
سبحان من عطاني حكمات صلاح القلب طالبي و الراس كتابي
و العقل خزنتي و لساني مفتاح فالسر بهم نسلك وجابي
من كان هكذا ما لازمه طياح يرضاوه العباد و يقولوا متربي
و يجيح من تربى بين الجياح و يقول هجرتي من فقد صحابي
هديت شورهم صبت علامي طاح عفت الطبايع و حدثني قلبي
في بيت عمي ما يثقب مصباح للطرش كي تعيد سر مخبي
من جاء غريب كيفي كيفاش يقول
المرسم الشيخ الميلود
يا ذا المرسم عيد لي ما كان وين المرو اللي قبيل هنا
نبيتك بحديث لفظ اللسان بكوش أبكم ما تواجبنا
يا ذا المرسم زدت لي تشطان فيك أنا و الريم جمعنا
من عهدك ما ريتها بأعيان حجروا يمينة الحبنانة
ناس أختي ولاوا لي عديان و على تاج الغيد كرهونا
ما نعشق من دونها نسوان غير كان عشرت الجبانة
غير كان ضحيت في الأكفان أخرة الحيين للفانة
طبت طياب الجير فالفران مزيلف قلبي من المحنة
و تبدل لوني و راه شيان و توحشت جماعة الزينة
حالي حال اللي خرج الأوطان براني معزول من القانة
غاب النيف و غابت الاخوان رجونا لاحكام للهانة
قاضي البحث مع البريزيدان و حكام السيفيل ذلونا
سلبوني ثنيثين جاوا قران راهم شق جبال بعدونا
كادوني من دونهم لوطان يا راجل وشتى يوصلنا
يدي لهم غير شلو حصان مدوب شقر زين فالصحنة
القول يواتي على الربعان مولاهم ما يرضى هانة
مرسول أختي ما ظهر ما بان ما رسلت بخبار يونسنا
كسرت ذا الطفلة اللي تزيان تسوى شكري طولة الزانة
دير جميلك يا بن الورشان توصل لي للريم يمينة
تخبر ولفي صفاوة الومان يطرح قلبي و يتهنى
قول لتاج الغيد بنت فلان عيب اللي يجفى بلا قمنة
وين حديثك وين دهر زمان واك حنا زعمة تعاهدنا
والعاهد بيناتنا لامان في وعدك ما زلت نتنى
خرجت في وعدي بلا ختلان نعنقها بسلام و بكينا
الدموع على خدها ويدان بكوا الحب بكيت حتى أنا
الميلود ناظم ذا الغيوان على تاج الغيد يمينة