رد: طريقة صنع الكمان وبالصور
اخى العزيز المنير
تحياتى
انا من وجهة نظرى اختلف معاك فى ان صناعة العود اصعب من صناعة الكمان وطبعا اى كلام انا بقوله بيبقى بالأدلة
يعنى احنا فى مصر لحد هذه اللحظة يعنى الايوم 27 يناير 2012 عندنا صناعة عود رائعة مازالت فى مصر
يعنى فى شارع محمد على بالقاهرة يوجد عدة ورش بتصنع العود وعلى اختلاف درجات جودته يعنى ممكن عود للتعليم يبدأ ب ما يساوى 40 دولار .. وممكن حسب الطلب عود بآلاف الجنيهات وكله موجود .. لكن العود الغالى الثمن والعالى الجدودة بيبقى بالطلب .. وبيكون للموسيقيين ولخبراء العود .. يعنى انت لو اتيت القاهرة وتقول للصانع مواصفاتك المطلوبة وهو بيقول لك على السعر ..
لكن صناعة الكمان كانت موجودة فى مصر لفترة محدودة جدا فى الثلاثينيات والاربعينيات كان عندنا واحد اجنبى اسمه ماركو .. وماركو هذا كان صانع كمنجات شهير عالمياً وعمل عدة كمنجات فى مصر واليوم تلك الكمنجات لاتقدر بثمن .. لكن كان فيه مشكلة ان الخشب الذى تصنع منه الكمنجات بيعتبر نوعه سر ماحدش يعرفة غير العائلات التى كانت تصنع الكمان فى امانيا والنمسا بالذات .. لذا اعقد 100% ان ماركو كان فيه علاقة بينه وبينهم وهم بيوردوا له الخشب .. لأنه اعتقد انه مش موجود فى أى مكان فى العالم غير فى غابات تلك المنطقة من اوروبا .. وكان جابى الشهير بيشتغل صبى عند ماركو ولقط منه الكثير من الاسرار لكنه مع الاسف لم يعلم احدأ من صبيانة تلك الصنعة الرائعة والمنقرضة .. والورش التى فى مصر حاولوا صنع الكمان ولكنها كانت رديئة جدا جدا وانا طبعا شفت كذا واحدة منها بسبب نوع الخشب كما قلت , وانت لو رحت شارع محمد على تلاقى الورش بتعمل العود بكميات كبيرة يعنى لما بيعملوا بيعملوا مثلا خمسين عود مع بعض وتلاقى دائما فى مراحل التصنيع اعودا كتير جدا ,, لكن الكمان لازم تتعمل كمنجة كمنجة ودى من الناحية التجارية تكلفتها حتكون غالية جدا جدا لن الصانع بيستغرق فيها وقت كبير جداً يعنى لو انت راجعت كل الفيدوهات من اول مرحلة لصنع الكمان لحد آخر مرحلة حتلاقى العملية تاخد شهور فى كمنجة واحدة ,, والمشكلة ان كل مرحلة من صنع الكمان محتاجة ( زى ماشفت فى الفيديو ) الى صانع خبير جدا جدا وفنان اصلا انت شفت ان وجه الكمان له وزن وبيتوزن على ميزان حساس ,, لكن صناعة العود محتاجة خبير واحد ومعه عشرات المساعدين مش شرط يكونا خبراء ولكن بيعملوا تحت إشراف الخبير
والمشكلة انك اليوم فى العالم العربى كله لو بحثنا عن خبراء فى اصلاح الكماناو الصيانة قد لا تجد فى كل الدول العربية عدد يساوى عدد اصابع اليد الواحدة ... اولاً لأن الصناع المهرة ماوتا ولم يطلع لهم خلفاء وثانياً العرض والطلب .. يعنى اليوم كل العازفين اصبحوا بيعزفوا اورج وجيتار وتركوا الآلات الوترية .. بمعنى ان تاجر الاورج فى الشهر ممكن يبيع 100 جهاز وتاجر الكمنجات لو تواجد مش جايببيع كمنجة واحدة كل 6 شهور
اما فى اوروبا الصيانة مازالت موجودة لن هناك الآلة الوترية مازالت تحتفظ بقيمتها الادبية وجبروتها .. يعنى صاحب المحل بيكسب كويس جدا جدا لذلك بيحافظ على المحل ... يعنى من افظع الكوارثعندنا فى مصر وبسبب انحسار الآلات الوترية وطغيان الآلات الكهربائية .. عندنا كان فيه مكانين مهمين فى مصر تلاقى فيهم محلات آلات موسيقية .. المكان الاول اسمه شارع الفجالة وهو بجوار ميدان رمسيس فى القاهرة .. وكان فيه سنى 1960 مش اقل من عشر محلات كبيرة جدا . تجد فيهم كل شىء الآلات وقطع غيارها والاوتار بجميع انواعها الرخيص والغالى .ومع انتشار الآلات الكهربائية اصيبت تلك المحلات بكساد رهيب جعل اصحاب المحلات ام يغيرون النشاط او يبيعوا المحلات ويستفيدوا من ثمن المحل المرتفع جدا فى تلك المنطقة .. واليوم لو نزلت هذا الشارع ستجده اصبحمستمعرة للدوات الصحية ولن تجد فيه محل موسيقى واحد .. اما الشارع الثانى وهو شارع محمد على الشهير .. كان مستعمرة الموسيقى فى مصر .. يعنى فيه مش اقل من 100 محل موسيقى وورش لصناعة العود بالذات .. اليوم مع الكساد الاقتصادى وانحسار استعملا الآلات الوترية انخفض عدد المحلات إلى اقل من عشر محلات فقط .. ومازالوا يتناقصوا ... اليوم من اخطر المشكلات التى تواجهنى انا لو محتاج فرسة الاول كان سهل اشترى 100 فرسة من افخر الأنواع .. اليوم صعب جدا لازم اعمل اتصالات مكثفة مع الباقى من اصدقائى يعنى واحد يكون جايب معاه كذا واحدة من الخارج وبالطبع بدفع فيها اضعاف ثمنها .. بإختصار العود مازال بيزدهر والكمان مع الاسف ممكن بعد من خمس لعشر سنوات حاينقرض فى مصر كما انقرض البيانو
يعنى انا اليوم لو حابب اشترى اغراض للكمان وقطع غيار لازم اروح اوروبا
مع اطيب تحياتى
|