رد: شاعر الالف اغنية احمد الحريري
قصيدة : ولدي نشدني
ولدي نشدني :كيف نبدا معاهن
يا بوي راني قليل خبرة وشان
يا هل ترى نخضع ونمشي وراهن
ونصير تابعهن ف كل مكان
ولا نضم كواغطي ونخطاهن
ونوزن خطاوي العمر بالميزان ؟؟!
ونحير إما نتركه يالاهن
ويشوف ويجرب بلى النسوان
والا يروم مشاكله وينساهن
يقفل عليهن باب لوحه زان
ويعودلي عقلي نقول بلاهن
ولا النوم في عازة وفي حرمان
يا ولد جربهن وضوق غلاهن
لكن اختار الورد والريحان
وابعد على اللي شوكهن خلاهن
بين الخرب نبتن حطب عطشان
نا بوك ما نرضاش تحيا كاهن
ولا تكون زير لحافته مليان
أضحك وقول الشعر ديمه وداهن
يبدن يجن عندك أشكال ألوان !!
واختار ما تقعدش كابي واهن
روح المرا في حر ما ينهان
***
ولدي نشدني : كيف كنت مداير
قدامهن يا بوي كيف تقيس ؟!
ونتوه في جوابي ونقعد حاير
أصل النسى يا ملايكة يا بليس !!
فيهن اللي تعطيك وجهاً ناير
وفيهن اللي تخليك أكبر تيس
فيهن الحرة بنت فارس تاير
وفيهن سبط عافن وشوك وديس
وفيهن وفيهن شيء عادل جاير
علقم عسل ناير حداه طميس
وانت عليك تعيش ديمه تخاير
بين الحليب الكي ولا الميس
روز الذهب واعرف عياره وكاير
واخطف الحجرة اللي يكون نفيس
لا تسحرك أم الغثيث ظفاير
ولا من ذهبها رابطاته ف كيس
ولا عين برني في العلالي طاير
ولاقد فيه الشبه من بلقيس
شقرا وسمراء وعلج حاير باير
بيضة وسوده داكنه وما تيس
وانت عليك اتكون ديمه زاير
خليك ديمه كيف حادي العيس
لين يرزقك ربي بعتبة بشاير
تحميك وتصونك بلا تخنيس
جرب وشوف وضوق تلقى الماير
راهن عجب كرديس عالبرديس
****
ولدي نشدني : كيف درت احكيلي
يا بوي والدنيا تجارب شوق ؟؟!
وبنخبره حقيقتي يا ويلي
من كثر ما جربت طبق النوق
جاريت واجد لين هدن حيلي
وشربت من وديان تحت وفوق
وعرفت ما منهن ( بنات فيلي )
واجد عرفت وضقت نار الشوق
وردة وماريا وليزا وليلي
والدايخه اللي لسانها مطلوق
عربي على هندي على برازيلي
باباك خمخم لين دار شدوق !!
لكن البنت الصح.. لو ترعيلي
نفهم اللي راني صعيب انضوق
هاديك في الدنيا تكون دليلي
مش كيف هاللي تجعلك هيدوق
بنت العرب في الأصل تحمي جيلي
وما عمرها تصبح بضاعت سوق
حتى إن خطت في الأخرة توليلي
تجي بالوفى وقليبها محروق
دمك حياتك وافهمه تحليلي
جنسك العربي يجعلك مرموق
جرب وشوف وعودلي وادويلي
وانشاء الله بختك معاك يروق
من ديوان :خمسنية صائد الرياح
|
العرض العادي
