يسقط قطن الدولة...
ارمي حمولك ع الفلاح
خلـّيه يخسر باقي الجوْله
علشان يهتف كل صباح
يسقط يسقط قطن الدولة
يزرع لب عشان يرتاح
بُكره نشوفوا عمّي صلاح
جنب أخوه عبدالفتاح
ع الزراعيّة بيلعبوا طاولة
ونقدر نهتف كل صباح
يسقط يسقط قطن الدولة
,,,,
حتى الرز عليه غرامات
ما احنا دخلنا ف أزمة مايّه
إوعاك تزرع عود كُرّات
أحسن تلبس أحلى قضيّة
والمسئول مش سائل فيك
وحيات أمّك لا يربّيك
ابصُم كل يومين على شيك
موت فى البنك وفى الجمعيّة
أصل وزيرك واد مرتاح
غاوي يهزّر غاوي مزاوله
وعايزك تهتف كل صباح
يسقط يسقط قطن الدولة
,,,,
اوعه يا بعزق تزرع غلـّه
وازرع كل الارض لبان
وزيرك خللا الناس تتسلىّ
وعملوا طابور عند الدكان
وابكي يا نيل على أرض العيلة
ابكي وقول النيل بقى نيله
ابكي وقول لطويل التيلة
عمري ما ح انسى ليالي زمان
بكره تشوفوا الدهب الابيض
بيخصّمكم عند المولى
يا الليّ هتفتم من مكاتبكم
يسقط يسقط قطن الدولة
يسقط قطن الدوله
العرض العادي
