عرض مشاركة واحدة
  #16  
قديم 11/02/2011, 23h56
الصورة الرمزية يوسف عوض الباري
يوسف عوض الباري يوسف عوض الباري غير متصل  
عضو سماعي
رقم العضوية:566525
 
تاريخ التسجيل: février 2011
الجنسية: سودانية
الإقامة: السعودية
المشاركات: 52
افتراضي رد: الاناشيد و الاغاني الوطنية السودانية

قصة ثورة (الملحمة)

كلمات الشاعر هاشم صديق
لحن محمد الأمين

غناء: محمد الأمين، عثمان مصطفى، خليل اسماعيل، بهاء الدين أبوشلة، أم بلينة السنوسي وآخرين

لما الليل الظالم طول
وفجر النور من عينا اتحول
قلنا نعيد الماضي الاول
ماضي جدودنا الهزموا الباغي
وهدو قلاع الظلم الطاغي

وفي ليلة وكنا حشود بتصارع
عهد الظلم الشب حواجز شب موانع
جانا هتاف من عند الشارع
قسما قسما لن ننهار
طريق الثورة هدى الاحرار
والشارع ثار
والكل يا وطني حشود ثوار
وغضب الأمة اتمدد نار

وهزمنا الليل وهزمنا الليل
والنور في الآخر طل الدار
والعزة اخضرت للاحرار

وطني أنحنا سيوف امجادك
نحن مواكب تفدي ترابك
ولسه الشارع بشهد لينا
في يوم الغضبة حصاد ماضينا
مشينا نعطر حقل الثورة
بدم نفديه بلادنا الحرة
وكان أكتوبر فجر الغضبة
كسرنا قيود الماضي الصعبة
لما مشينا مواكب صامدة
تهدر وتغلي وتهتف راعدة

الرصاص لن يفنينا
الرصاص لن يفنينا

وسال الدم في أرض الوادي
فدينا النور بالروح يا بلادي
وكانت صفحة حكاها العالم
وفجر أكتوبر طل وسالم

وهزمنا الليل هزمنا الليل
والنور في الآخر طل الدار
وهزمنا الليل هزمنا الليل
والعزة اخضرت للاحرار

كان في الجامعة موكب هادر
صمم يجلو الليل السادر
وكان الليل السادر غادر
فجر غضبه سموم دخان

الشعب الثائر صمم هادر
يصرع ليلنا الداجي الطول

وكان القرشي شهيدنا الاول
وما اتراجعنا
حلفنا نقاوم ليلنا وسرنا
وما اتراجعنا

للشمس النايرة قطعنا بحور
حلفنا نموت أو نلقى النور

وكان في الخطوه بنلقي شهيد
بدمه بيرسم فجر العيد

يا أكتوبر انحنا العشنا ثواني زمان
في قيود ومظالم وويل وهوان
كان في صدورنا غضب بركان
وكنا بنقسم بالاوطان
نسطر اسمك يا سودانا

بدمانا السالت راوية الساحة
حلفنا نسير ما نضوق الراحة
شهرنا سيوف عصيانا المدني
وكانت وحدة صف يا وطني
وايد في ايد حلفنا نقاوم
وما بنتراجع وما بنساوم
خطانا تسير في درب النصر
هتافنا يدوي يهز القصر

كسرنا حواجز
ازلنا موانع
صفنا واحد
عامل وطالب وزارع وصانع
يا ساحة النصر يا حقل النار
يا واحة بتحضن روح اصرار

روينا ورودك دم ثوار
وشتلنا فضاكي هتاف أحرار
خطينا ترابك أحرف نايرة
بتحكي سطور أيامنا الثايرة

وشلنا الشهدا مشينا ونهتف
الرصاص لن يفنينا
وجرح النار في قلوبنا بينزف
الرصاص لن يفنينا
سجينا الشهدا وجينا نقاوم
الرصاص لن يفنينا
ما بنتراجع وما بنساوم
بينا وبينك تار يا ظالم
وفجأة ونحن صفوف بتصمم
زغرد فجر الغضبة الحالم

وهزمنا الليل هزمنا الليل
والنور في الاخر طل الدار
وهزمنا الليل هزمنا الليل
والعزة اخضرت للاحرار

قسماً قسماً يا أكتوبر
نحمي شعارك نجني ثمارك
ونرفع راية الثورة الغالية
عاليه ترفرف فوق السارية
عليها شعار الثورة الأكبر
ورسمو النادر زاهي واخضر
ولسه بنقسم يا أكتوبر
لما يطل في فجرنا ظالم
نحمي شعار الثورة نقاوم
ونبقى صفوف تمتد وتهتف
لما يعود الفجر الحالم
يا أكتوبر
الملفات المرفقة
نوع الملف: mp3 الملحمة.mp3‏ (22.71 ميجابايت, المشاهدات 26)
رد مع اقتباس