[عادل صموئيل]

احبائى

اقدم لكم بمناسبة الاعياد وشم النسيم

ليلة القبض على فاطمة

طبعا القبض ده المفروض انى اقدمه فى عيد الشرطة ولكن الاحوال كلها اتلخبطت عندنا يعنى لازم يحصل نكد ايام الاعياد
واكتر نكد السنة دى هو تحريم اكل الملوحة والفسيخ فى شم النسيم عن طريق الايحاء والاشاعات ان الملوحة والفسيخ تم تسميمهم بسم زعاف اول ما يوص فم الانسان , مع ان الملوحة والفسيخ دول من 7000 سنة اكلة مصرية شهيرة وبالذات من طقوس شم النسيم المهمة واللى بيمثل عيد قومى لكل المصريين ولكن المقصود طبعا هدم ومحو مصر وهية مصر وتراث مصر من اول الغاء السلام الوطنى لأنه حرام مرورا بمحاولة الغاء المرأة ومنجزاتها من الحياة العامة واللى عازين يهدموا الهرم وابوه الهول .. وقناة السويس حتى برج القاهرة ماسلمش من الفيروس واراهن على ان اللى حايشتراه ( ان ماكانش اشتراه فعلا من ورانا ) , انو حايهدمه هو كمان لأنو بيمثل عنوان من عناوين حضارة مصر الحديثة وبيمثل خازوق فى عين كل من يكره مصر وشعب مصر وحضارة مصر وهوية مصر
ولما نتكلم عن اللحن ده انا بصراحة مش عاجبنى يعنى ما اعزفوش لسبب لأنو مافيهوش ميلودى يعنى تركيبة هارمونية
بمعنى ان يتسمع فقط يعنى انت لما تسمعو بتسمع كذا حاجة مع بعض بيكملوا بعض لكن بآلة منفردة مافيهوش لحن له قيمة , يعنى مثلا من الحان عمر خيرت اغنية فيها حاجة حلوة .. انا احب اسمعها لحد آخرها كل ما تيجى فى التليفزيون لأن فيها ميلودى جميل .. واحب اقول لكم على سر المشكلة لما مخرج او منتج بيطلب من موسيقار موسيقى تصويرية لو بيطلب من عبد الهاب المفروض انو بينتظره ان شاء الله لحد 3 سنين لن اسم عبد الوهاب كفاية على العمل لكن اى موسيقار آخر لو ماجابش الموسيقى بعد شهر بالكتير المنتج بيشوف موسيقار تانى ... وهنا المشكلة ان اى ملحن مش بيمسك العود ويلحن ( طبعا الملحنالمحن يعنى اللى بيعمل ميلودى حلو ) ولكن بينتظر لحد ماييجى الوحى والالهام .. وتحت الحاح المخرج هنا الموزع الشاطر بيتصرف .. بيعمل جملة اللى تطلع معاه وبيكبرها بالتوزيع
بتبقى زى الطاووس منظر لكن مفيش لحم ... لذلك تلاقى كذا موسيقى لموسيقار واحد منها اللى فيه ميلودى حلو ومنها اللى بيعتمد على التوزيع ... ومشكلة الالحان الموزعة عموما انك ماتقدرش تعزفها منفردا لن حايبقى حاجات كتير ناقصة للمستمع ... لكن انا شفت اعجاز وهو متواجد عند الاخوين رحبانى .. يعنى احنا كنا بنقابلهم فى مهرجان دمشق الدولى كل سنة وكنا بننزل معاهم فى نفس الاوتيل وطبعا طول النهار كنا متصاحبين عليهم اتكشفت فيهم ميزة خطيرة مش موجودة عند حد تانى ... كان عندهم غزارة لحنية جميلة زى المحيط يعنى حتى الالحان الموزعة كانت الجمل الموسيقية جميلة جدا كان عندهم امكانيات ان عندهم فلاقة موسيقية شرقية واوركسترا سيمفونى بيشتغلوا عندهم ولما بيعملوا لحن موزع كانت الفرقة عشان معاهم على طول حافظاهم يعنى حافظة ستايلهم لذلك كان الشغل بيطلع حلو بدون مجهود .. الميزة الخطيرة اللى فيهم ان كان اى لحن موزع 12 صوت كان ممكن الرحبانية يعملوا منو لحن صوت واحد ويتعزف على الفررقة الشرقية وتلاقيه كمان حلو .. لأنه كان لو حفلة فى لبنان ممكن يحط ع المسرح 150 عازف ولما يسافر الخارج الفرقة بتبقى محدودة ب 20 موسيقى و20 فنان بين راقصين وممثلين وخلافه
وهنا كان اللحن الموزع لازم يعمل منو نسخة لفرقة صغيرة
من مميزات عمر خيرت انه بيشتغل على فرقة واحدة يعنى تعرف من الالات النحاسية الغليظة ان ده عمر خيرت بيبقى طبعا فاهمين الاستايل بتاعه وده بيخلى الشغل يطلع فى وقت قليل لكن زى ماقلت مايقدرش هو يطلعع المسرح يسمعك اللحن ده اول مرة ولكن لازم تكون انت شايف المسلسل 30 حلقة وسامعه من قبل عشان تستوعب اللى بيحصل
مع اطيب تحياتى