[عادل صموئيل]

احبائى

اقدم لكم دويتو سيد درويش

على قد الليل مايطول

نسخة من رى لأن دى الاصلية وفرقة الموسيقى العربية بيعزفوها طبقة صغيرة ونسخة من دو عشان فيه ناس بتحبها من دو
عايز اشرح انا ليه طلبت كذا نسخة والكلام ده يهم الجميع ... اولا انا اتعلمت انى معرفش اكتب غير بدقة متناهية .. لسبب انتم عارفين انا بقدم خدماتى مجانا ولما بتنزل على المنتدى فيه ناس بتاخدها بتنقلها على عشرات المنتديات الاخرى انا معرفهاش بغختصار يعنى بتوصل ممكن لمايين من البشر فى جميع انحاء العالم ... ومن فضل ربنا ان بقا عندى جمهور عريض بيثق فى نوتاتى بحيث ان حى لو عندهم نوت قديمة لنفس اللحن بيشتغلوا من النوتة بتاعتى .. لذلك انا لما بدون لازم النوتة ما يطلعش فيها اى حاجة وحد يتلكك فيها .. اهم حاجة انا لما اسمع اللحن وانا بدون لازم يكون مضبوط الاداء 100% ما يباقاش فيه حاجة تخلينى اشك فى حرف لأن ده بيعطلنى وممكن نفسى تتسد وماادونش الحن او ادون منه جزء وابطل اكمل ... بالنسبة للتسجيل الاصلى كان ما ينفعش ادون منه لأن زى ماقلت تسجيل الاسطوانات الحجارى بتاعة التلاتينيات كانت الاول بيتسجل وش الاسطوانة على قرص شمع كان غالى جدا فى وقتها حتى وضعه على ماكينة التسجيل كان بياخد وقت طويل مش تشيل ده وتحط ده لو حد غلط يعنى ... لذلك كان ممكن تحصل غلطات ( والامثلة كتير ) وبيعدوها بالذات فى اللزمات الموسيقية وبالطبع انا ما اقدرش ادونها كده او انى ابتدى انا انقحها بس حتاخد وقت وبعملها ى حالة لما يكون اللحن مالوش تسجيلات حديثة منقحة ويكون مطلوب اوى اوى يعنى لأن العملية مزعجة جدا وبتدخلنى فى متاهة ان حد يكون حافظ اللحن ويلاقينى كاتب حاجة تانى يقول انا غلط .. لما جينا لتسجيل سيد مكاوى واسعاد يونس .. فيه مشكلة .. سيد مكاوى ملحن كبير ... وكارم محمود غنى برضو نفس اللحن .. وسيد مكاوى لازم انه يقوله احلى من كارم بالطبع لازم يضيف حليات ومشاكل ما ينفعش تتكتب .. ناهيك عن اسعاد يونس وربنا يبعدنا عن غناء الممثلات بإستثناء شادية طبعا ... يعنى بيقولوا حروف كتير نشاز وبعدين بتقول وخلاص .. يعنى ممكن غناها بيبقى بعد سكتة نوار وسكتة كروش مثلا تروح هى داخلة اى حاجة وخلاص .. قد تكون حلوة ف السمع لكن فى التدوين كارثية ... احسن تسجيل بتاع فرقة الموسيقى العربية ... الاستاذ عبد الحليم نويرة انا كنت بشتغل معاه ودونت حاجات كتير لفقة الموسيقى العربية هو له فضل كبير جدا جدا فى الحفاظ على التراث .. يعنى لحد منتصف الثلاثينات فى مصر مكانش فيه تدوين نوتة ... كان كل التراث بيتناقل بالحفظ والتلقين يعنى ده يحفظ من ده وطبعا كل ما حد ينقل اللحن ممكن تزيد حتة او تسقط حتة ... الاستاذ نويرة كان بيدور على المطربين العواجيز اوى اللى فاضلين من القرن الماضى كان بيسمع نفس الدور من كذا واحد وبيكون شكل بعدين بينقحه ويظبطه ايقاعيا ومقاميا ويتكتب نوتة بحيث انه يبقى مرجع للى بعد كده ... انا راجل اكاديمى .. فيه مشكلة خطيرة برضه فى كل الكليات ... لأن طبعا فى الكلية لازم يدرسوا عمل مضبوط .. اللى كان مضبوط عدد قليل جدا من الموشحات لأن كانت ميزان ثابت وملة بتتكرر كتير يعنى فى التناقل ماخضعتش اوى لعوامل التعرية والابادة .. والاساتذه فى الكليات مع الاسف كانوا موظفين يعنى ماحدش منهم كان ممكن يدور على دول قديم ويبتدى يظبط فيه وينقحه هم كانوا بياخدوا الجاهز ,,, وده خلا 99% من طلبة الكليات بيعرفوا قشور عن التراث
مع اطيب تحياتى