ده بأف مين
كلمات بديع خيري و تلحين سيد درويش
ده بأف مين اللي يألس
على بنت مصر بأنهي وش
و النبي يجري يتليس
ماطلع كلامه طظ! فش!
النوه النووه
هي هي هيه
شغل البكش ده يا أختي
مابقاش ينفعنا دلوقتي
دي المصرية كتّر خيرها
في التربية سبقت غيرها
يا سيدي إنت
البنت تفضل محبوسة
قال جوه بيتها يكون أظبط
لحد ما تبقى عروسة
بدال ما تفضل تتنطط
العفو العفو
يا سلام
يا سلام يا إخوانا دي العبرة
ماهيش في جوة و لا برّة
عمر الحرة ما تبقى عرّة
عمر العرّة ما تبقى حرة
يا سيدي إنت
باردون يا فندي بالذمة
إيه بس عيب المصرية
الدنيا ضاقت بيك لما
ماتاخدش غير الأفرنجية
إفهم
و إعقل
يا أهبااال
يا أهبل ليه غيرنا يفارقنا
ماتخلي زيتنا في دقيقنا
دي المصرية تبيض وشك
الأفرنجية عينها في قرشك
يا سيدي إنت
اللي ماتكتبش و تقرا
الدجالين قالعين عنها
وتو ما تقع البقرة
مالحق ما تكتر سكاكينها
إخه إخيه ..إخييييه
تفوا عالجهل ميت تفة
يالا نكسر وراه شقفة
من تعليمنا أهلنا خايفة
واقعين ليه من قعر القفة
يا سيدي إنت
خليها دي حلقة في ودنك
من قبل ما تقري الافتحة
أول كلام تقوليه لابنك
وطنك مافيش زيه دحه
م النيل إمبوه
حبووووه
حبه يا نونو بالأكتر
من بابا و ماما والسكر
منه الـتسة و منه المما
إوعك تنسى فرض الأمة
يا جدع إنت
أنت تأمر يا هيثم بيه ، استعنت بالصديقة سامية جاهين (عضو فريق اسكندريللا الذي يعيد غناء أعمال سيد درويش ) في تصحيح بعض الكلمات و تكملة بعض الأجزاء التي لم أستطع تفسيرها بالاستماع. أظن معنى الأغنية أصبح واضح بعد الكلمات، بس لو فيه أي حاجة مش واضحة إنت تأمر يا جميل.
بالنسبة للمقطع باللون الأزرق فهو غير واضح في أغنية السيدة حياة صبري و قالت لي سامية أنهم قرروا غناءها مثلما في ديوان بديع خيري و كتاب الأعمال الكاملة لسيد درويش و هذا هو المكتوب فوق. المقطع الذي تقوله السيدة حياة صبري حاولت الاستماع اليه مراراً و بصعوبة شديدة استطعت تمييز التالي :
البنت تفضل محبوسة
قال جوه بيتها يكون أظبط
و اللي يقولوا عليه أوسة
إن جه يكون ###و ###
أظن أن المقصود بـ "اللي يقولوا عليه أوسة" هو العريس الذي ترشحه العائلة للفتاة المحبوسة في بيتها، و الفراغات اللي أنا مش قادر أملاها هي ذم في هذا العريس المنتظر.
و الله أعلم !