احبائى
اقدم لكم اغنية من العيار التقيل جدا جدا
للسنباطى ونجاح سلام
عايز جواباتك
انا كنت متردد لكتابة الاغنية دى اولا لأنى مش حافظها خالص ومش متداولة يعنى
هى مشكلة الحان السنباطى انها لما بتكون لأم كلثوم مهما كان اللحن صعب لن اغانى ام كلثوم بتكون واخدة حقها وزادة فى خريطة الاغانى على كل الاذاعات لذلك تلاقى اى مستمع بيلاقى نفسه حفظها من ير مايحس
لكن الاغانى اللى زى دى بتتظلم لنها يمكن بتتذاع مرة فى السنة وعشان المستمع يستوعبها الاول بعدين يتذوقها ويحفظها لازم يسمعها كتير وده مش بيحصل
انا افتكرت حاجة فيه برنامج فى الاذاعة المصرية مشهور من خمسين سنة اسمه مايطلبه المستمعون .. وده طبعا بيكون عادة اغانى شائعة ومحفوظة ... فيه عندنا موسيقار وعالم موسيقى وكاتب صحفى اسمه المرحوم الدكتور يوسف شوقى عمل حاجة غريبة .. عمل برنامج اذاعى اسمه : ما لا يطلبه المستمعون .. حاول فيه يسلط الضوء شوية على الاغانى الجميلة والصعبة والمهضوم حقها اللى زى الاغنية دى
اما بالنسبة للأغنية دى انا شغلتى الاساسية انى بغنى بالكمنجة بس عمرى ما اعزف الاغنية دى لنها بتخالف انها اغنية كلامية مش موسيقية ... ولازم المستمع يكون حافظها صم بحيث يبقى فاهم اللى بيتغنى ايه
واقصد انها محتاجة تتغنى من مطرب مش تتعزف من عازف فقط
عندى رجاء خاص لو سمحتم فى الردود اكرر ممكن لما ترد خد اسم الغنوة فقط ومافيش داعى نكرر الكلام اللى انا كاتبه ده كله لأن حايبقى تكرار مالوش لازمة وبيملى الصفحات على الفاضى بمعنى ان لو خمسة ردوا بإقتباس حتلاقى 3 او اربع صفحات اتملوا من غير داعى دى بتعمل مشكلة ان اللى بيبحث عن النوت الموسيقية بيدوخ وسط الزحمة .. والاخطر ان فيه مشرفين شغلتهم تنظيف وتنقية الصفحات من المشاركات او الحاجات المتكررة ودى خطيرة جدا ممكن وسط الزحمة لأنو مش فاضى يمسح واحدة واحدة .. بيمسح مجموعة مع بعض ممكن يمسح نوتة وماياخدش باله .. وفاكرين اول مرة قسم طلبات النوت اتمسح كله فى حركة زى دى
واى مشاركة فيها طلب نوتة انا بشوفها وآخد بالى منها من اول مرة مفيش داعى تتكرر 35 مرة احيانا لن فيه اغانى انا بكتبها على طول واغانى بتكون انا شخصيا مش عاجبانى او محتاجة وقت تانى عشان افكر اكتبها
مع اطيب تحياتى