[ftahwaz]

--------------------------------------------
--->>> الگلايد <<<---
هذا النمط الشعري يتشكّل من خمسة عشر شطراً أو أكثر . قوافي البند الأوّل كقوافي البند الأخير . يشبه للبحر الطويل . هذا نموذج من مبدعه ، الشاعر ملّا إبراهيم الديراويّ ، الشاعر الأعمي المحمّري :

احبّ ايّامنا الراحت ترد ترجع مثل اوّل
احب بيتي صخر لو طين احبّه مطرّز بچندل
احبّ ايّامنا الراحت ترد و ايّامي هذي اتزول
احبّ اتشابگ اويا الكوخ كوخ الامل طول بطول
احبّ اتوسّد الحلفا لو دوشگ من العاگول
تحت فيّ الگصب و البردي و الچولان داير حول
احبّ امضيفنا المفروش حِصران و نمد و بلول
و الحطب يمّه تلول مثل اوّل
احبّ اتنشّگ ابدخّان ذاك اسراينا المشعول
احب ديواننا الليل و نهار الكل وجه محلول
احبّ اتصنّت لدگّات هاوننا يرن شيگول
احبّ المرفعة و ذيچ الحبوب و ضحچة الكشكول
احبّ اهلي النشامه البالحصاد اتگوم
احبّ احزام ابوي الچان من خوص النخل مفتول
احب رحّاتنا او خبز الشعير الكل وكت مبذول
احب ياوننا و المهباش و المنجل و الناعور و الياييم
و المشحوف و التنبل مثل اوّل
احب ديرة هلي امّ الخير احب اربوعنا الخضره
احب شطنا و سواجينا احب موجاته السمره
سواجينا الغطاها الزود زود الضيم و الحسرة
او شطنا الطمّتّه اهموم السنين او دثّرت صدره
احبّ اشكال ابوي الچان باسم كل وكت ثغره
احب سالوفة اللگّاح احب غنّاوة الشگره
او رفيف البردي و ضحچة اعثوگ النخل للگمرة
احبّ اسگيهن بيديّ السگاهن والدي بعمره
احبّ ارجع و اشمّ اتراب ارضنا الچالمسچ عطره
و اشابگهن ابفروند الامل و العشگ و العشرة
و اگلّ الهن يا نخلاتي الشتلتن بالگلب جمرة
انا ردّيت لا تبچن بعد مو خلصت الهجرة
و اريد اغسل ابدمعاتي عقيق ادموعچ الصفره
و اجاچ الماي يتهاده او خوصچ بعد لا يذبل
خل تترادف السعفات خلّ الگلب يتدلّل
مثل اوّل مثل اوّل
---
محمّري : أهل المحمّرة و المحمّرة مدينة في محافظة خوزستان إيران . أودّ أن أشرح لكم أن الأهواز يقع في جنوب غرب إيران و هو عاصمة محافظة خوزستان الّتي كانت تسمّي عربستان قبل ثمانين عاماً ( عربستان تعني أرض العرب في الفارسيّة كمحافظة كردستان و محافظة أذربيجان و محافظة بلوشستان الّتي تعني أرض الكرد و الأذري و البلوشي . كلّ هذه القوميّات تشكّل وحدة إيران و هم يعيشون برفق و سلام معاً ) . لمحافظة خوزستان ثغور مشتركة مع العراق و لذا تكلّم أهلها يشبه تماما لتكلّم أهل جنوب العراق خصوصاً البصرة و العمارة و ذي قار .
الچندل : خشبات طويلة كانت تستخدم لبناء سقف البيوت و المضايف من أشجار تسمّي الصندل
اتشابگ : أتعانق
الحلفا : نبات شوكي
دوشگ : دوشك
العاگول : العاقول ، نبات شوكي صحراوي يحبّ أكله الجمل
فيّ : ظلّ ، فيء
البردي : نبات ينبت في الأهوار في في ضفاف البركات
الچولان : نبات يشبه البردي في المواصفات
حصران : ج الحصير
یمّه : عنده
اسراي : اسراج : سراج
اتصنّت : أستمع
شيگول : ماذا يقول
النشامه : الأجواد و الشجعان
رحّاة : الرحّي
المهباش : أداة لهبش الحبوب
الناعور : أداة تدور كدولاب الهوا و تنقل الماء من النهر إلي السواقي
الياييم : الجاجيم ، من المنسوجات
المشحوف : من الزوارق
التنبل : صنف من البنادق القديمة يستخدم فيه البارود
ديرة هلي : مدينة أهلي
اربوع : المراتع
سواجينا : سواقينا
الضيم : الجور و الظلم
الشگره : جنسيّة من الفرس الأصيلة ، الشقراء
اعثوگ : عذوق
الچالمسچ : الّذي كالمسك
فروند : أداة تستخدم لصعود النخل ، يسمّي " التبليّة " أيضاً

--------------------------------------------
--->>> القصيدة <<<---
لها أوزان خاصّة و كثيرة و أنماط خاصّة في النظم . تسمّي عند بدو الأهواز بـ " الگصيد " .
هذا نموذج من شاعر عبّاداني حين رجع لبلده ، عبّادان في محافظة خوزستان ، بعد إتمام حرب إيران - العراق التحميليّة من قبل حزب البعث و رأي أن بلاده و مولده تحطّمت و خربت . فأنشد هذا الشعر و الدموع تسيل علي وجناته :

الله يا ديرة هلي يالماكو مثلچ ديرة
الله يا جيراننا اهل الوفا و الغيرة
الله يا ديرة هلي يالبيچ شفت الراحة
الله يا ذاك النخل لو حل وكت سبّاحة
الله يا ذاك العنب يا مدلّي ابسبّاحة
و الخوخ المدد و اشم ذاك الورد ارياحه
الله يا موجات النهر مدّه و يزر روّاحة
شذّكّر ايّامي المضت اعبر الشط اسباحة
و اسمع الطير اعلي الشجر شيجي و يرف بجناحه
و اسمع البلبول الصبح يشفي الگلب بصفيره
الله يا ديرة هلي يالبيچ نمرح چنّه
يا الريحتچ ريحة ورد يوري الگلب شفّتّه
الله يا سعف النخل شمرة ذوايب چنّه
و البرحي المدلّي الرطب يشبه اثمار الجنّة
و الماي يجري من الصبح يسگي الورد و الحنّه
الله يا طير السعد وجه الفجر لو غنّه
يفتره گلبي و افتخر و اتذكّر و اتمنّه
كل مسلم يعيش بهنا و كل وكت يكثر خيره
الله يا ديرة هلي يالماكو مثلچ ديرة
الله يا ديرة هلي عندي شكثر محبوبة
يالچنتي حرّة مخدّرة و من الخطر محجوبة
الله يا مضيف اليسر گلب اللي يجبل صوبه
يلگي الدلال امسطّرة بوياغها و منصوبة
و الهاون يرنّ الصبح كل يوم عدنا نوبة
و اطفالنا بذاك الصبح متونسة تلعب طوبة
بالليل نلتم عالگمر نلعب لعب اطفيرة
الله يا ديرة هلي يالماكو مثلچ ديرة
الله يا ذاك النهر بيه چنت اذب هيّالة
امرار وي طرة الفجر انزل و بيدي الفالة
الگي الشباب اعلي النهر كل من و شبچ احذاله
و اتعنّي للمدّة البحر و النهر يتعنّي له
و بالمدّة يتعدّي السمچ الله اليعرف اشكاله
برزم و شبّوط و شِعِم و البنّي و چندالة
و نصيد لو قلّ الوكت كل من يرد لعياله
فرحان و محمّل سمچ و نفض علي اهل الديرة
الله يا ديرة هلي يالماكو مثلچ ديرة
الله يا ديرة هلي امّ الخير من شفناها
الله يا ديرة هلي يالبالوفا عرفناها
الله يا ديرة هلي بارواحنا اشريناها
الله يا ديرة شكثر شبّان ضحّيناها
الله لو تدري الارض من دمنا حنّيناها
الله يا ديرة هلي يالمن غصب عفناها
غصباً عليّ مفارگچ فيتچ عليّ چبيرة
الله يا ديرة هلي يالماكو مثلچ ديرة
الله يا ديرة هلي الله يصيبه الصابچ
الله يا ديرة هلي فدوة رحت لترابچ
الله يا ديرة هلي و الله من اشيل اعتابچ
اتذكّر ايامي المضت و الشجر ذاك الشابچ
تعتبين حگّچ و النّبي يصعب عليّ اعتابچ
ظلّيتي ظلمة و خالية آه و تفرّگت احبابچ
و الله من اشوفچ خالية گلبي يزيد ازفيره
و الله يا ديرة هلي يالماكو مثلچ ديرة
---
يالماكو مثلچ ديرة : يا ما لا توجد بلدة مثلك في العالم
يزر : جزر
ورد يوري : ورد جوري
ذوايب : ذوائب
چنّه : كأنّه
البرحي : من أصناف التمور الحالية جدّا
يجبل : يقبل
بوياغها : بوجاغها : بموقدها
و الهاون يرنّ الصبح كل يوم عدنا نوبة : الهاون يرنّ صباحا و في كلّ صبح نوبة لشخص ؛ هذا الشطر يشير إلي تقليد . إذا سمع أهل الريف رنين الهاون يجتمعون حول من يرنّه عندما يهبش القهوة و يستضيفون عند صاحب القهوة لشربها . و لكلّ مضيف رنين خاصّ و يسمّي هذا الرنين بـ " مكاسر الهاون " .
متونسة : مستأنسة
لعب اطفيرة : من الألعاب الليليّة
هيّالة : شبك لصيد الأسماك
الفالة : أداة لصيد السمك تتشكّل من خشبة طويلة تنتهي به أشواك معدنيّة حادّة
برزم و شبّوط و شعم و البنّي و چندالة : من أصناف الأسماك
زفيره : أنينه

--------------------------------------------
يتبع إن شاء الله تعالي