[قصي الفرضي]

الاخوه الاحبه
السلام عليكم

من بغداد الحزينة الى كل العراقيين

أحس روحي غريـبـة هنا من يـوم إلتركتــوني
تانيـــت سنيــــن ودهـــر حتى ترجعــولي
ثاري العمر كله إنكضـه وإنتم هجــرتـوني
وبثـوب الحزن غنيــت يا لرحــتو سمعـوني
بغــداد ذكروني إبوكت وجلمة إكتبـوني

مريت وكت العصر ،، متعني يم حمود
خدرلي جاي وبجه ،، وسولف سوالف سود
كال انته من ياسلف ،، كتله عراقي الجود
دورته بالخارطة لن الوطن مفقود


ومريت للمدرسة اتامل الطلاب
شو شفت طالب بجه وحط بين اديه كتاب
بي خارطه للوطن وعيونه كلهه عتاب
كتله ابني كافي البجي بالصف تره ممنوع
يابويه بعدك طفل وتبجي بجي مفجوع
كال انه بالخارطه الكيت الوطن مبيوع


متواعد ويه الفرح والوعد فات سنين
لا مر علي بحلم ولا شفته شوف العين
ناشدت وين الفرح؟ كالولي متأسفين
ممنوع هسه الفرح ،، عن كل العراقيين


عموري ابني طلع مارد اله يومين
سالت كل البشر عموري ابني وين
كلمن يجاوب شكل زين الجواب وشين
واحد يكول معتقل يطلع بعد سنتين
واحد حجالي عمر اعرف طريقه منين
وداني للمشرحه وكلي دورعلى ابنك هين


ولكيت 100 عمر ولكيت 100 حسين
ولكيت كل الوطن يلطم على الخدين
مادام نبجي سوه منهو الكتل الاثنين
مادام نبجي سوه منهو الكتل الاثنين


يكلولي بس الموت هذا العراق عنده
اموت بحضن العراق تره ماكو وطن بعده
لا والله ماكو وطن بعده
لا والله ماكو وطن بعده


احلى وكت بغداد لمن يصير غروب
تتمشى فوق الجسر اوكايد المحبوب
ودجله تحضنك حضن وتحس العمر مافات
وشكد حلوه لمة هلك وياهم تتعشى بالكريعات


ولو تجي تفتر وبعد تدخل على المنصور
طيبة وحنان وعشك وطيوراحلى من طيور
والعيد عدنه حلو الله ياعيدي
خوان نلتم سوه وايدك تشبك بايدي
برج ايفل وبك بن وكل تكساس
يرحون فدوه ونذر لشارع ابو النواس

تحياتي
قصي الفرضي / العراق بغداد