[عادل صموئيل]

احبائى

اقدم لكم من اغانى الفنانة وردة الحديثة




حرمت احبك




الاغنية دى انا دونتها لنها انطلبت بس مش عاجبانى .. انا حسيت بخبرتى انها بداية التصحر فى الموسيقى العربية .. والتصحر يعنى ارض زراعية خصبة بيزحف عليا عوامل جوية او طبيعية يعنى يسرح فيها املاح مثلا بتخليها بالتدريج تبقى غير صالحة للزراعة وتبقى صحراء , انا كنت بسمعها عادى بس حسيت انها وحشة واى مرة كنت راكب تاكسى فى مشوار طويل والسواق مشغل محطة الاغانى وكانت بتذيع كذا اغنية من اغانى الزمن الجميل ورا بعض لحن انا ما اتسلطنت .. وفجأة ذاعوا الاغنية دى ... لما تسمعها لوحدها ماتحسش اوى بالموضوع لكن لما تسمعها بعد كذا اغنية تحس بالفرق ... اول حاجة الزمن الجميل اى ملحن لما كان بيعمل اوفرتيرة او افتتاحية الاغنية بتبقى موسيقى حلوة جدا وسهلة يعنى ممكن يستوعبها عامة الشعب ... زى انت عمرى ومال حياتى ... الخ .. لأن انا ما ابقاش موسيقار عبقرى واعمل حاجة ما يفهمهاش غير واحد فى ال 1000 من الناس بالعكس ابقى شخص معقد وفاشل .. المهم اول الاغنية شىء ماخبط وسريع جدا ومش مفهوم وانا ما كتبتوش اولا لنى لم اسوتعبه بعد ما سمعته كذا مرة وثانيا انى عشان اكتبه هو بتاع سطرين ممكن آخد فيهم طول اليوم وماحدش حايعرف يقراهم من صوعوبتهم وكمان حاجات متداخلة يعنى ما ينفعش تتعزف على آلة واحدة منفردة .. بعكس انت عمرى مثلا ممكن واحد عازف عود متوسط يقولها من اولها لآخرها ... والحاجات دى بتتعمل فى استوديو بييجى عازفاورج شاطر يسجل تراك وبعدين يفضل يزود عليه تراكات لحد ما يزهق ... اخطر شىء فى اغانى الزمن الجميل ان الموسيقى كانت لايف يعنى التسجيل بيبقى الفرقة مع المطرب ... وفيه حاجتين لو تسمع مذهب فى يوم وليلة مثلا اولا تلقى الكمنجات مصاحبة للغناء ودى بتعمل سلطنة للمطرب وتبطين مهم جدا للصوت وثانيا الايقاع تلاقيه مش ماشى بسرعة واحدة .. يعنى التطريب انى بغنى جملة وفى الجملة اللى بعدها ممكن ايقاع يقعد شعرة او يسرع شعرة يعنى ما ينفعش الرتم بوكس الثابت السرعة ... لأنه فى اللحن ده حاسس انو شىء ثابت السرعة وعامل زى ما يكون بيشد وردة من ايدها وبيجرى يعنى هى مش متفرغة للتطريب ولكن مركزة انها تلحق الزمن وبالطبع مافيش تحتها كمنجات لأن الشريط مافيهوش كمنجات اصلا ... ومن اخطر المميزات فى الزم الجميل ان الللزمات اللى بتفصل بين شطرات الغناء لازم تكون جميلة وسهلة عشان تبقى مفهومة من عامة الشعب لكن لما تكون حاجات عفاريتى فو اوى تتخطف وتحت تتخطف او لزمة معقدة ممكن اى واحد بيغنى ما يعرفش يفهمها او يحفظها وهنا مش حايحس حجمها اد ايه ولما يغنى ممكن يكسر الزمن يعنى ممكن يديها اقصر او اطول من حجمها وهنا اكون خربت اللى بيغنى .. رجاء اللى يحب يرد عشان عدم استهلاك الصفحات يقتبس اسم الاغنية فقط ولو عندكم تعليقات انا تحت امركم مع اطيب تحياتى