احبائى
اقدم للأخ العزيز المجتهد احمد الاهلاوى
حانة الاقدار من درجة الراست
عملية التحويل من درجة لأخرى اسمها الاكاديمى transpormition وفى السوق اسمها ترانسبور فى البرامج الموسيقية اسمها change pitch وكلمة بيتش يعنى درجة الركوز ودرجة الركوز يعنى الدرجة اللى بينتهى عندها السلم او المقام
عملية تغيير الدرجة دى على البرنامج فى حالة لما يكون المقطوعة الموسيقية غربية او مقام مثل الغربى مافيهوش ربع تون
بتاخد ثوانى مهما كان اللحن طويل
لكن لما بيكون اللحن فيه مقام شرقى او بيقلب لمقام شرقى فى الطريق او حتى بيحصل فيه لمس لمقام شرقى دى بتاخد وقت شوية وحتاجة خبرة ودقة وقوة ملاحظة لأن لو نغمة مثلا فى الاصل فا نصف دييز ونزلت اللحن تون بتبقى مى البرنامج بينزل علامة النصف دييز الموجودة زى ماهى لأنها دخياة عليه مش فى البرنامج ومن هنا لازم انا اتدخل اغيرها اخليها مى نصف بيمول ده مثلا يعنى
يعنى فى الغربى او المقامات اللى مثل الغربى البرنامج بيحول كل حاجة انت تضع الدليل الجديد فقط
لكن فى المقامات اللى فيها شرقى لازم بنغير حاجات كتير
ورجع بى الخيال لأيام زمان ايام الفرقة الماسية ايام الكتابة بالقلم الرصاص ..
كانت عملية التحويل عملية فى منتهى الدة والخطورة واللى يعملها لازم يكون خبير جدا جدا ... لأنو اولا بيكتب النوتة تانى بينزل كل نغمة يعنى لو مثلا بننزل النوتة تون وهو بينقل بينزل كل نغمة كلمة يعنى المى تبقى رى لكن الخطورة فى علامات التحويل لازم ياخد بالو حرف حرف
وتأملت فى موضوع التكنولوجيا .... انا جيلى والاجيال اللى قبلى بتخاف او بتاخد موقف من التكنولوجيا شوية
بعكس الاجيال الحالية متعودة ع التكنولوجيا لأنهم اتولدوا لقوها بقت هى القانون بتاعهم
من ضمن تحفظاتى على التكنولوجيا زمان ايام الآلات البدائية .. يعنى الآلات الموسيقية الشرقية التقليدية العود والكمان والناى والقانون .. واجهزة التسجيل والصوت البدائية ... كل المجموعة دى كانت هى اللى بتظهر المطرب من اللى مش مطرب .. والفنان من اللى مش فنان .. والفنان العادى من العملاق لن الموضوع انك انت تطلع كل اللى عندك
لكن التكنولوجيا النهاردة شوية مؤثرات بتخلى الفرخة المسلوخة تبقى طاووس .. يعنى 90 % من اللى على الساحة النهاردة لو طلعوا ايام عبد الحليم كان الجمهور ضربهم بالاحذية
مرة الاخ العزيز ملحن مصرى سألنى سؤال مهم جدا قال لى ازاى اعمل الحان بمستوى شغل زمان
قلت لو اعمل اللحن وتخيل انك حاتعزفه على فرقة من بتوع زمان يعنى كام كمنجة معاهم عود وقانون وناى وطبلة ورق ... هنا المقدمة الموسيقية لو جملتين فقط لازم يكونوا جملتين حلوين اوى لأن الخبط والرزع والتوزيع والعك اللى بيتعمل دلوقتى ماهو الا عملية تجميل او تزويق بيادرى على رداءة الجملة اذا كان فيه جملة اصلا
يعنى زمان اكن الملحن بيسمع المطرب اللحن اول مرة ع العود طبعا بيبان اذا كان حلو ولا وحش لكن دلوقتى الملحن بيسمع اللحن على الاورج وقبل ما يعزف الجملة بيشغل الايقاع والتصفيق والحركات القرعة كلها اللى على الاورج
( كانو العمالقة زمان بيسموها عدة النصب ) بإختصار يعنى ياسلام لو ناخد من التكنولوجيا الحلو بتاعها فقط
يعنى انا اللحن ده عملته فى خمس دقائق لو زمان كنت عملتو فى يومين يعنى اقعد اشتغل لحد ما اتعب واكمل تانى يوم
زى المتخلفين اللى بيروحوا اوروبا وامريكا مش بياخدوا منهم الحاجات الحلوة ولكن بيقلدوهم فى اللبس الغبى
مع اطيب تحياتى