[عادل صموئيل]

المشاركة الأصلية كتبت بواسطة ashraf4mmm

أستاذي العزيز عادل صموئيل مساء الخير
أولا عايز أشكرك على ذوقك وفضلك وتعبك في تدوين أغنية الليالي
وثانيا ربنا يستر على مصر الأيام ده أنا في غاية القلق، ادعوا لمصر ربنا يعديها على خير ونخلص من الجهلاء والأغبياء
وثالثا أنا نازل الاجازة يوم 12 يوليو وحتى نهاية أغسطس وأتمنى اني اشوفك يا استاذ عادل أنت وباقي الزملاء الأعزاء

ياريت أ عاصم يتكرم ويرتب لنا موعد نلتقي فيه

تحياتي لك يا أستاذ عادل وأشكرك مرة تانية

أشرف محفوظ

الاخ العزيز اشرف
بعد التحية وانت وحشتنا اوى
طبعا انا ارحب بالعوة ولكن الكلام عنها لسه بدرى نظرا للظروف الفظيعة اللتى تمر بمصر ,, وانا دارس التاريخ جدا يعنى بجد عمر ما مصر اتعرضت لمحنة زى دى من ايام خوفو لحد قبل 25 يناير
يعنى اول الحروب الشهيرة ( او القلاقل ) فى تاريخ مصر كانت مع الهكسوس والخلاف الطير ان الهكسوس دول ناس جايين من الخارج يعنى مش مصريين ,,, يعنى شكلهم ولغتهم ولونهم وكل حاجة فيهم مختلفة ,, يعنى العدو شكله واضح امامك ... لكن الخطير والغريب واللى عمره ماحصل على مر العصور ان العدو يبقى مستخبى بيننا فى وسطنا .. وواحد اخونا وابن عمنا ولغته وشكله ولونه زينا ... الهكسوسى لو شفته حاتحترس منو لن لو علامة مميزة فلو شفته حتاخد حذرك .. اما العدو النهاردة واحد مننا من دمنا اخونا وابن عمنا وواكلين وشاربين فى طبق واحد وممكن تستأمنه يقف جنبك وما تاخدش بالك من طعنة الغدر ,,, فى كل مكان الاطراف اللى بتتصارع تلاقى الفصيلين المتصارعين لبسهم مختلف يعنى زى لاعبى الكورة فصيل لابس فانلة خضرا ضد فصيل لابس فانلة صفرا .. كل فصيل عارف مين اللى معاه ومين اللى ضده .. حتى زمان فى مجلة ميكى واحنا صغيرين اتعلمنا واتربينا ان عصابة القناع الاسود لابسين فانلات مقلمة بالعرض ولابسين على عينيهم قناع يميزهم عن اللى مش اشرار ..
لكن النهاردة ماحدش عارف مين وفين وكام وايه .... ناس بتحارب بالقلم وناس بتحارب بالصواريخ والمصيبة ان اللى بيحاربوا بالصواريخ بيقولوا انهم دعاة السلام واللى بيحاربوا بالقلم هم اللى عايزين اراقة الدماء .. انا قربت اتجنن عايز حاجة تقلل مستوى التفكير .. يعنى حقنة ولا مصل يخلى الواحد اللى بيفكر يبقى مخه زى مخ الحمار او التور لكن المصيبة ان الحمار كمان بيفكر وكائن ذكى جدا ... اكتشفتها ... عايزين مصل يخلى مخنا زى ذاكرة السمك سمتوا عن ذاكرة السمك ؟ ربنا خلق السمك وعمل له ذاكرة بتتمسح كل خمس دقائق ... عشان نعرف نصطاده ... يعنى ربنا لو كان خلق السمك بذاكرة زى الطيور مثلا قابلنى لو عرفت تصطاد بسرياية
لو صياد طيور ببندقية ضرب طلقة وطير اتصاب ووقع .. تلاقى الطيور اختفت لمدة طويلة من المنطقة .. ولو شافوا واحد معاه بندقية يختفوا فورا او لو شجرة مليانة عصافير عاملين دوشة سقف بإيدك سقفة جامدة تلاقى الطيور تتكتم للتمويه عشان تحس ان الشجرة فاضية .. لكن السمك تنزل السنارة تصطاد سمكة بعدها السمك بينسى وييجى ع السنارة او المراكب اللى بتدخل عرض البحر وترمى الشباك والسمك بيشوفها اللى بينجو من الشبكة بعد خمس دقائق بينسى الموضوع .. وعادى تيجى المركب اللى بعدها وترمى الشبكة وتصطادهم
عايز مصل ينسينى اللى قاله فلان امبارح عشان النهاردة لما يقول كلام تانى ما انزعجش والكلام كتير
المهم انا اشكرك على الدعوة الكريمة كما اشكرك على الدعوة بتاعة السنة الماضية لكن مش حانقدر نتكلم غير بعد ما يمر يوم 30 يونيو والايام اللى بعده ونشوف حانروح على فين لنى شايف البلد على حافة هاوية سحيقة ربنا وحدة هو اللى يشاء تقع فيها او تخرج منها .. والمشكلة ان العملية مافيهاش درجات فى الالوان يعنى اما اسود او ابيض
لن خلال السنتين اللى فاتوا اللى وصلنا للوضع المفزع ده هو درجات الالوان المختلفة
مع اطيب تحياتى عادل صموئيل