يا حبيبي
يا حبيبي قلبي ده اللي انت ناسيه
واللي بعته و اللي ياما لعبت بيه
راح يحبك حتي آخر دقة فيه
حتي آخر دقه فيه يا حبيبي يا حبيبي
كل يوم قلبي بيسألني عليك
كل يوم بيزيد في لهفة وشوق إليك
بدو يتملي بنورك
أمله يطمن علي الحب ف عينيك
فوت وشوف القلب ده تكسب ثواب
اللي منيته ووريته العذاب
واللي حالف مهما حيطول الغياب
راح يحبك حتي آخر دقه فيه
حتي آخر دقه فيه يا حبيبي يا حبيبي
يا حبيبي فين حكاياتنا الطويلة فين
فين ليالينا وأمانينا الجميلة فين يا حبيبي
فين زمان والحب لسه في أوله
واللي فات كله كأنه حلم ليلة
قوللي ياللي كل يوم بيزيد في بعدك
فوتني ونسيت خلاص أيامي عندك
ولا حتصون زي قلبي اللي وعدك
راح يحبك حتي آخر دقه فيه
حتي آخر دقه فيه يا حبيبي يا حبيبي
لو في بعدك عني راح تبقي سعيد
قوللي ما تعشمش قلبي من جديد
كل أملي تقضي أيامك هنا
وانت جنبي ولا وانت هناك بعيد
بس أفهم انكتب لي إيه ف حبك
لاجل اكون عارف حكايتي ويا قلبك
قوللي ما تخافش ده انا قلبي اللي حبك
راح يحبك حتي آخر دقة فيه
حتي آخر دقة فيه يا حبيبي يا حبيبي
صلاح فايز
يا ولاد بلدنا
يا ولاد بلدنا يوم الخميس.. حكتب كتابى وابقى عريس
الدعوه عامه وحتبقى لمه.. وحيبقى ليا فى البيت ونيس
يا يا ولاد بلدنا
حاكتب كتابى ع الحلوه زوبه.. وافقت عليا من غير خطوبه
وابوها قاللى ليه السؤال.. وانت فى بلدنا زينة الرجال
انا اشتريتك لما لاقيتك.. كسيب وعتره وحمش فى بيتك
ومادام عايزها وحتبقى جوزها.. الغالى لاجلك يبقى رخيص
اكتب عليها يوم الخميس
حاعملها ليلة ولا كل ليلة.. وحتبقى قصة بين كل عيلة
وحاجيب عوالم ومغنى ليها.. والزفه تبقى فرجة يوميها
وحاروش سكر وريحان معطر.. دا انا زوبه عندى بالدنيا واكتر
وحاقيم وليمة غالية وقيمة.. ويوميها حارقص كمان واهيص
دا انا يوم هنايا يوم الخميس
صلاح فايز
ياللى افتكرت وجيت تانى
ياللى افتكرت وجيت تانى ياما كنت خايف تنسانى
ياما كنت خايف ياما كنت خايف تنساني خايف
ياما الظنون سبقت فكرى سبقت فكري
ياما البعاد حرك اوهام حرك اوهام
والعمر كان كان بيفوت بيفوت يجرى
بيفوت يجرى لما بقيت اطوى الأيام اطوى الأيام
كان قلبى بيسابق عمرى علشان تروح وتجينى أوام وتجينى أوام
وما بين ظنونى وأشجانى ياما كنت خايف
ياما كنت خايف تنسانى خايف
ساعة ما كانت روحى تميل ويطير جناح الشوق يناجيك
كان كل شىء فى الدنيا جميل
والسحر يفيض منك وإليك
حتى النسيم كان ييجى عليك
ليلة ما اقوله يمسى عليك يمسى عليك
وما بين هيامى ووجدانى ياما كنت خايف
ياما كنت خايف تنساني خايف
ياللى افتكرت وجيت تانى يكفانى هجران وقسية
هجران وقسية
كتر البعاد ده خلانى حاخدك واشيلك فى عينيه
حاخدك واشيلك فى عينيه
المره دى جيتلى تانى مين عارف المرة الجاية
مين عارف المرة الجاية
انا كنت خايف انا كنت خايف تنسانى خايف
حسين السيد
ياللي انت بعيد
ياللي انت بعيد ..والنار بتزيد.. والقلب شبكته ونسيته..
طال بعدك ليه ؟.. ونويت على ايه ؟
ياخوفي لاتنسى اللي هويته
ياللي انت بعيد
*****
انا اللي قلبي عمره ما مال الا لما شافك يا حبيبي
سلم سلامه ساعتها وقال: لقيت منايا ونصيبي
وعنيك ياجميل ..بعتت مراسيل.. وفهمت كلامها ولاغيته
اه ولاغيته
*****
كان البعاد ..شهرين اتنين.. حلفت ترجع بعديهم..
من يومها فاتوا كام شهرين ؟ عديت بقلبي ثوانيهم
إبعث لي وقول ..بعدك حيطول ..ولاَّ حتعود للي جافيته
اه اللي جافيته
*****
قالوا حبيبك جاي قريب ..ياهل ترى حيصون وعده ؟
ماليش سواه في الدنيا حبيب ..يواسي نار قلبي فبعده
خايف الأيام ..تطوي الأحلام ..وتضيع أملي اللي بنيته
اه اللي بنيته
*****
بينك وبيني ياروحي بلاد !! وازاي اعيش من غير روحي ؟
ياما خلفت ميعاد وميعاد ..غير اللقا يشفي جروحي
واللي بقاسيه ..ع الناس باداريه .. ويبان للعين مهما داريته
اه مهما داريته
*****
ياللي انت بعيد ..والنار بتزيد.. والقلب شبكته ونسيته..
طال بعدك ليه ؟.. ونويت على ايه ؟
ياخوفي لاتنسى اللي هويته
ياللي انت بعيد
حيرم الغمراوي