[mody anwar]

المشاركة الأصلية كتبت بواسطة إيمانيات

مشكلة والدي في حياته و مماته الخلط بينه و بين الملحن
الكبير عبد العظيم عبد الحق ، رحم الله كلاهما

أختى الفاضلة إيمان كريمة العظيم العبقرى عبد العظيم محمد (رحمة الله ورضوانه عليه) أختلف مع حضرتك فى موضوع الخلط بين الموسيقار عبدالعظيم عبد الحق و المرحوم والدك فالفرق بينهما كبير جدا مع إحترامى للموسيقار عبد العظيم عبد الحق لكن ألحانه وأسلوبه مختلفان تماما عن أسلوب الوالد (رحمة الله عليه) فألحان عبد العظيم عبد الحق تكاد تتشابه كلها وهذا ربما يعود إلى أن معظمها ذات طابع دينى أما العبقرى عبد العظيم محمد فلا أستطيع أن أصف ألحانه أو أقول أن لها طابع معين من أى نوع فليس بينها أغنية تشبه غيرها بل كل أغنية تمثل عملا جديدا مميزا يفاجئنا بعبقريته وإن كان يمكن أن أصف أسلوبه فى التلحين فيمكن وصفه بأنه أسلوب تصويرى أو تعبيرى تقوم فيه الموسيقى بترجمة الكلمات والتعبير عنها وتصويرها بشكل رائع حتى تكاد الموسيقى تتحدث بدلا من الكلمات وتكاد ترى المطرب وما يحدث له وكأنه فيديو كليب وأروع مثال على هذا هو أغنية دوامة للرائعة (نازك) والتى يتجلى فيها الأسلوب التصويرى للأغنية بطريقة عبقرية تجعلنى لا أمل من سماع هذه الأغنية آلاف المرات الأغنية دى أول مرة سمعتها خلت جسمى يقشعر بصراحة مش عارف أعبر عن روعتها لأنى مش خبير فى الموسيقى لكن أذكر إن الموسيقار عمار الشريعى (الله يرحمه) عمل لها تحليل موسيقى يوصف بيه جمالها فى برنامجه الجميل غواص فى (بحر النغم) سمعت الحلقة دى من حوالى أكتر من 15 سنة لكن فاكرها لدلوقتى والأغنية دى كانت السبب الرئيسى فى إعجابى بالعبقرى الراحل ومتابعتى لأى شىء من أعماله بمجرد ما أسمع إسمه ألاقى حواسى كلها تركز مع الأغنية عشان أشوف الراجل العبقرى ده هيعمل إيه, وبعدها سمعت أغنية (فى قلبى غرام) للمطرب الجميل محمد عبد المطلب ومش قادر أوصف إنبهارى بجمالها لأنى قبل ما أسمع الأغنية دى كنت أعتبر عبد المطلب مجرد مطرب شعبى لا أكثر لكن لما سمعتها لقيته بيغنى عاطفى بشكل مش معقول محدش قدّم عبد المطلب بالشكل الرائع ده زى عبد العظيم محمد شىء مش معقول تلاقى صوته فى حالة صعود وهبوط متفق مع الكلمات الجميلة بشكل مستحيل حد يقدر يعمله بالجمال ده يعنى بجد الأغنية دى صنعت من عبد المطلب مطرب عاطفى رائع
ومن حوالى خمس أو ست سنين سمعت أغنية عند بيت الحلو للمطرب الرائع (كمال حسنى) من ألحان العبقرى عبد العظيم محمد إنبهرت بيها وزاد إعجابى بعبقرية عبد العظيم محمد فى الأغنية دى وخصوصا نهاية الكوبليه التانى لما بيقول (بيصالحنى لما تبقى راضى عنى ويخاصمنى لما تحرمنى رضاك) وشوفوا إزاى لحّن كلمة (رضاااااااااك) وهو بيختم الكوبليه بشكل مذهل, الكلام عن إعجابى بعبقرية عبد العظيم محمد شرحه يطول, أعتذر عن التطويل وسوف أرفع مع المشاركة أغنية كمال حسنى عند بيت الحلو نسخة مختلفة عن الأغنية الموجودة فى الموقع ومختصرة عنها شوية لكن رائعة أما بالنسبة لأغنية دوامة فأنا لقيت حلقة (غواص فى بحر النغم ) اللى بيحللها فيها عمار الشريعى هنا فى المنتدى وده الرابط بتاعها إسمعوها واحكموا بنفسكم
http://www.sama3y.net/forum/showpost...6&postcount=38