[عادل صموئيل]

اخوتى الاحباء
بالرغم من انى النهاردة فى الصمت اللى قبل الاتخابات يعنى كلنا متوترين ومش قادرين حتى نشرب يعنى مصر فى لحظة فارقة بين اما تعود مصر ::: مصر بلا تعليق او تضيع مصر وبلا تعليق
بس الجدل اللى اتكلمتوه على اغنية اهواك خلانى ارد
انا على فكرة كنت متردد ادونها من اكتر من سنة عشان التشابك الحوارى
انا عزفتها مع عبد الحليم شخصيا وسماعى كانت زى ماقلت بدون نوتة وعزفتها وسط الفرقة الماسية ,,, وعزفتها وكان عبد الوهاب موجود ... يعنى لو اخطأ عبد الحليم مش حايخطىء عبد الوهاب ومش حاتخطىء الفرقة الماسية
بس كان المحك الاول صوت عبد الحليم .. ان قلت ان اى فرقة حتحاول تعزفها حايطلع نشاز وحصلت فعلا اول ما عزفناها طلع ( مصايب ) عبد الحليم وقف الفرقة وعبد الوهاب كان موجود بعدين غناها اكتر من عشرين مرة متتالية
وخلال العشرين مرة دول كنا اكيد ماسكين الكمنجات واصابعنا بتحسس على النغمات ... وابتدينا نعزف معاه بعد المرة العشرين والرقيب المفزع والصعب جدا جدا عبد الوهاب بيسمع بمنتهى الصرامة الأول كان قاعد مش مستريح بعدين اعتدل فى جلسته بعدين اخيرا ابتسم ..... وللعلم وللذكرى والتاريخ خلال النصف ساعة العصيبة دى ما اتكلمناش فى المقامات ولا كل اللكام اللى انتم قلتوه ... ( طبعا مش جهلا لا من عبد الحليم ولا عبد الوهاب ولا من الفرقة الماسية ولا منى هنا ) ولكن الكوبليه ده بيحتاج احساس ... يعنى انت لوعايز تعزفه انا كتبت شىء وغيرى قال كلام آخر ..
انت بإحساسك حاول تعزفها اختار السكة اللى تعجبك وتعجب الناس اللى تسمع
واكرر الكلمة اللى كررتها مراراً الموسيقى العربية وبالذات مع المعالقة بتخرج عن القوالب او القواعد الاكاديمية
يعنى اقول لكم على كلمة جديدة ... لو ملحن ضعيف او متوسط عمرو ما حايخرج عن القواعد الاكاديمية اولا لن طبعا الفرق بين العادى والعملاق ان العملاق بيبقى خياله واسع لكن العادى بيبقى محدود ... ثانيا اقول لكنم على سر خطير جدا جدا
الملحن العادى او المغمور لو عمل حاجة شاذة او غريبة على الاذن ممكن ماحدش يقبلها , لكن الملحن العملاق لو معلها كنا بنتقبلها ... لذلك لو فيه ملحن عملاق وعايز يعمل عبقريات بينتظر على عبقرياته لحد ما يتشهر
حاجة تانية ... فى مشكلة كوبليه اهواك ده لو اللحن مش تلحين عبد الوهاب وعبد الوهاب سمعه والسنباطى سمعهوحد تانى من الكبار زى عبد الحليم نويرة
ممكن كل واحد من الثلاثة يقول تحليل شكل والثلاثة صح
وفى النهاية اكرر احنا فى الفرقة الماسية عزفناها زى ما انا كاتب وللعلم ان الفرقة الماسية لو حصلت وان عازف عزف مرة واحدة غلط تانى يوم بيبقى مش فى الفرقة ... لأن العازف اللى بيعزف غلط بيفسد على الاقل عزف عازفين اللى على يمينه واللى على يساره ... واخطر شىء فى الموسيقى النغمات الشرقية بمعنى انا لو عزفت المىء نص بيمول مش مضبوطة وجنبى عازف عزفها مضبوطة العازف الردىء بيشد العازف الجديد مش العكس يعنى العازف الحلو مش بيشد العازف الردىء ولكن العازف الردىء هو اللى بيلخبط اذن العازف الجيد
مع اطيب تحياتى