[عادل صموئيل]

احبائى
اقدم لكم اليوم اغنية من العيار التقيل ( جدا جدا ) طلبتوها من اكتر من سنة وانا كنت متردد لنها من النوع اللى ما ينفعش يتكتب , لأنه اكبر من الكتابة ومن التدوين ومن القواعد , لكن مع اصراركم اقدمها لكم

الكرنك
والاغنية دى ماتمرش دون توضيحات , يعنى اول توضيح انها من قسم من اغانى عبد الوهاب اللى من المستحيل ان حد يقدر يغنيها , يعنى شىء عامله عبد الوهاب لنفسه , عند المقطع بتاع انا هيمان , هو بيعمل تقاسيم انا ماكتبتهاش لعدة اسباب , اول سب ان التقاسيم ما تتكتبش , هى مش تدوين موسيقى ولكن سكك , يعنى المطرب بيرسم لنفسه خريطة , يبدأ من مقام ايه ويروح فين وفين , ونفس المطرب لو غنى الاغنية عشر مرات كل مرة التقاسيم بتختلف , لأنها ارتجالية , يعنى حتى ما ينفعش هو نفسه يكرر اللى قاله , وزى ما انتم عارفين انى لما بعزف اى لحن بتخيل الملحن قدامى ولما اكتب بتخيل الملحن قدامى , ولو عيد الوهاب دلوقتى رجع وحب يدون الاغنية دى عشان يغنيها انا من حفظى لعبد الوهاب كان مش حايخلينى اكتب التقاسيم بتاتاً , يعنى حايخلينى اكتبها زى ما انا كاتبها هنا , وفى البروفة حايفهم الفرقة انه حايعمل تقاسيم فى المكان ده , وطبعا ضرورى قبل ماتفكر تعزف النوتة ترجع للحن عشرات المرات لأنه مش قرائة حروف , ولكن روح , حاتلاحظوا حاجة مهمة فى اللزمات الصغيرة اللى بيترد على التقاسيم او بتسد الفراغات , انك حاتسمع الفرقة مش محددة فى حاجة يعنى كل واحد بيقول حاجة , ودى لما كنت بعزف معاهم الملحن بيقول اشغوا ( دى كلمة مصرية قديمة يعنى انتشروا او زنوا , بنبقى زى صوت الحشرات بتاعة الغيط او الحقل بالليل , يعنى انت سامع اصوات كتير بس مش عارف ايه بالتحديد اللى بيعملها او ايه مع ايه , وهنا الفرقة بتونس المطرب او بتعمل نغمات فى خلال المقام اللى المطرب واقف عنده , فيه حاجة خطيرة فى عبد الوهاب , انا من معاشرتى له 20 سنة شخصيا وعشرين سنة قبل ما ادخل الوسط الفنى , ان عبد الوهاب لو ابتدا يقسم عمرك مها كنت قدير انك تتخيل هو رايح على فين , بمعنى انه لو بدأ من رى وعمل مى نص بيمول وداخل على الفا اى واحد عادى يتخيل انه حايروح على البياتى ... لكن تميز عبد الواحد انه بياخدك لى مقام من المستحيل انك تتخيله , وانا شخصيا رحت مع عبد الوهاب قعدات كتير جدا و يعنى هو وانا وعازف رق فقط , انا كنت لسه صغير جدا وكان فيه عازفين كبار جدا واحسن منى واكتر خبرة , هو كان بيختارنى لأن العازف الكبير بيحب يبين نفسه , يعنى زى ما قلت فى المثل ده لو عبد الوهاب اعطى الاحساس بالبياتى كان العازف الكبير ممكن يسحبه على باقى البياتى ويضيع الخيال اللى فى مخ عبد الوهاب , لكن انا شخصيا كان احساسى ان الاستاذ عبد الوهاب زى هرم خوفه , وانا جنبه نملة , وبالطبع مش انا اللى اوجهه يقول ايه , ولكنه ماسك العود وانا بتابعه , بعمل له حاجة زى خلفية او ارضية , دى كانت بتريحه جدا , الحاجة الاخطر ان عبد الوهاب لما ببسخن ويفتح ممكن فى تقسيمة زى دى بياخد ساعة ... وفى تسجيل الكرنك التقسيمة خمس دقائق فقط لأنه كان زمان مقيد بزمن الاسطوانة الحجارى , يعنى قبلما بيسجل اللحن بلإسبوع لازم حد يمسك له ساعة ويحدد يقعد فى كل جزء اد ايه كام ثانية , ودى بالطبع كانت بتعمل له تحجيم لطاقته .... بعكس رياض السنباطى كان حظه حلو انه لما كان بيسجل اغنية كان بيمسك العود ويقسم , على ايام الشرائط .... يعنى يقسم براحته ده رياض السنباطى , يعنى ممكن الاغنية 40 دقيقة فيها عشر دقائق تقاسيم .... وانا هنا بديكم فكرة عن عبد الوهاب يعنى انت لو بحثت هنا فى قسم اغانى عبد الوهاب على اغنية تكون عمرك ماسمعتها , واسمعها كتير ذاكرها ... حاتكتشف ان اى جملة لو سمعت نصها الاول مش ممكن حاتتخيل نصها التانى ولا حتى شبه اللى حايعمله عبد الوهاب ... مع ان فى اى مطرب تانى سهلة جدا تعرفها , وانا طالب فى الكلية كان من ضمن دروس القواعد الموسيقية بناء الجملة اعطيكم مثال يعنى جملة فى سلم دو الكبير او مقام عجم على دو ... الجملة 8 موازير ... القواعد الثابتة بتقول الجملة سؤال وجواب , يعنى اربع موازير ولازم تقفل على الدرجة الخامسة يعنى صول , والاربع موازير التالية لازم تقفل على الاساس يعنى دو ...
عبد الوهاب كسر كل القواعد دى ... ممكن يقفل الجملة على حرف مش ممكن تتخيله و او بيسحبك بالحرف ده على مقام تانى , يعنى لما حد يقول لك عبد الوهاب الاسطورة مش من فراغ , حاجة تانى خطيرة جداً .... انا فى محطة روتانا زمان بيجيبوا حفلات لفرقة الموسيقى العربية المصرية .. حفلات حديثة يعنى العازفين شباب من الجداد . شفت لحن همسة حائرة للمطرب السورى صفوان بهلوان ... المطرب حلو لكن الفرقة زفت ,,, او تحت الزفت ب 30 درجة . طبعا انا بخبرتى بعرف ايه العيب , ان اللحن مكتوب نوتة , والشباب اللى بيقارا بيقرا النوتة اللى قدامه , وشكله عمره ما سمع اللحن اصلا , يعنى انا هنا فى المنتدى عزفت همسة حائرة والجندول , مش عايز اقول انا شاطر لكن انا حافظ , يعنى اى اغنية من دول شرط اساسى انك عشان تعزفها انك تكون فيه علاقة بينك وبين الاغنية مش اقل من 30 سنة ,,, وحتى العازفين العظام اللى عزفوا الاغانى دى فى زمنها وهم اللى سجلوها قعدوا يحفظوا فيها شهر , يعنى بتبقى بالنسبة لنا زى البيت اللى انت ساكن فيه ... تقدر توصل له من عشرين طريقمختلف
طبعا انا آسف للإطالة وما اطمعش ان كتير منك يقدروا يعزوفوها بس حاولوا .... يعنى لو مبتدىء منك عزف منها جملتين اكون فى منتهى السعادة
فيه ملحوظة : حد منك قال انه شافها نوتة قبل كده وفيها غلطات كتير , وانا هنا بقدر الامكان حاولت اتفادى اى غلطات لأن عبد الوهاب فى النوعية دى من الاغانى الصعبة بتسمع حاجة وتكتبها تراجع تطلع حاجة تانية امسحها واكتبها تانى كذا مرة لحد ما احس انها حلوة كده وعمرى طبعا ما حوصل للكمال
وملحوظة تانية فى التقاسيم انا للعلم كتبت منها 3 سطور بعد عناء شديد لكن مسحتهم حسيت ان من المستحيل تتكب
مع اطيب تحياتى