[عادل صموئيل]

احبائى
اقدم لكم نوتة اغنية ام كلثوم وزكريا احمد

حلم

الاغنية دى بتمثل عصر من الغناء وعصر من التلحين اسمه عصر المشايخ , والاغانى اللى من النوع ده بتعتمد على 40% لحن و60% اداء مطرب , لذلك بتحتاج مطرب قدير جدا جدا , يعنى من اهم الاغانى اللى ماحدش قدر يغنيها غير ام كلثوم , وللتوضيح انت لما تشوف اغنية مثلا زى امل حيتى فى اى مقطع تلاقى اللحن محدد يعنى المازورة مثلا فيها 4 نوار محددين والمطرب مقيد بيهم ولو حب يعمل عُربة بتبقى محددة جدا , والمطرب ما يعملش عرب كتير ( زى اصالة ) عشان مايفسدش اللحن , لكن فى الحان المشايخ تلاقى المازورة فيها سكتات وده بيدى المطرب القدير امكانية انه ممكن يملا السكتات يعنى يطول فيها ويقصر ويملا المازورة بما يحلو له , واما كلثوم بالذات كانت لما بتسخن وتتسلطن لازم تعمل تقاسيم من عندها , ولو تلاحظوا انها ماكانتش بتقسم كتير إلا فى الحان زكريا احمد لأن طبيعة اللحن بتديها امكانية تقول وتطلع كل اللى جواها , يعنى مرة فى اغنية اهل الهوى قالت اول جملة بعدين كان مزاجها عالى كملت اللحن كله من عندها , وده مش من فراغ , يعنى كان بيت زكريا احمد عبارة عن صالون غنائى وكان بيجتمع فيه عشان الفن ويغنوا كل يوم للصبح وكتير كانت ام كلثوم بتسهر معاهم وتغنى , وهنا كان الغنا مش محدد بوقت يعنى ممكن يمسكوا اغنية زى دى ويقعدوا يجودوا فيها للصبح , انت لو سمعت زكريا احمد تلاقى نفس الاغنية ممكن وهو بيغنى بيضيف كلام , الكلام ده ممكن بيكسر الوجة والميزان , مثلا اغنية شوف الزهور واتعلم , قال شوف الزهور يا بنى آدم واتعلم , كلمة يا بنى آدم تكسر الميزان لأنها دخيلة على اللحن , وهنا بييجى دور مهم لضابط الإيقاع , مع انها كلمة فجائية لكن بيقدر يظبط الايقاع بحيث انها تبان تجوديدة مش غلطة , وهنا لازم اتكلم عن النجم الخفى وراء اجادة الاغانى دى وهو عازف الرق الشهير ابراهيم عفيفى , كان راجل عجوز فطرى مش اكاديمى , ولكن ما جاش حد زيه عازف رق فى العالم العربى وهو السبب فى ظهور عازفى الرق العظام اللى تتلمذوا على يديه حسن انور وحسين معوض ومحمد العربى , التميز الخطير لإبراهيم عفيفى انه استلم ام كلثوم وهى عندها 16 سنة , كانت لسه بتتعلم وهو كان كبير ,, كان لما تغلط بيشتمها وياما اخدت منه شلاليت , وكان بيشتمها وهى على المسرح كتير ( بس طبعا ماحدش من الجمهور كان بياخد باله ) المطرب اللى من نوعية ام كلثوم بيبقى عنده طاقة عالية جدا ... يعنى خمسين الف فولت , واى طاقة فى الدنيا لازم تتحجم , يعنى اى مفتعل نوورى اهم جهاز فيه التحكم والسيطرة على الطاقة لأنها لو خرجت عن السيطرة تضيع الدنيا , وام كلثوم كانت كده , يعنى المطرب القدير بيبقى عنده بالدراسة والخبرة انه ممكن يلعب بطلاقة فى 47 مقام
وهنا ييجى النجم التانى محمد عبده صالح عازف القانون يعنى كان بيديها السسك عشان ماتتوهش , يعنى يديها لا بيمول مثلا , وهى تروح منها لكل المقامات القريبة وهو طول الوقت محوط عليها او محجمها , او ابراهيم عفيفى ,كان حافظها يعنى لما تخرج عن الوحدة بيحس انها فاهمة هى فين وتعدل نفسها او محتاجة حد يرجعها , كان فى وسط المازورة بيديها تكوك عشان ما تتزنقش وفجأة فى مكان مناسب يديها 2 دوم ترجع للوحدة , وقالت عنه ارباهيم عفيفى بيسترنى .... والطريف ان ام كلثوم انا شفتها فى بيتها لما تكون مع نفسها , لازم تسمع ام كلثوم كل يوم ساعتين , كانها مستمعة وتنقد نفسها , وكانت لما تسمع حاجة ماتعجبهاش تشتم نفسها بنفس الشتائم اللى كان بيشتمها بيها ابراهيم عفيفى , وكانت لما تسمع حاجة حلوة تمدح نفسها انا سمعتها بتقول الله عليكى ياسومة ياللى مفيش منك وعظمة ياست طبعا اللحن ده من الصعب ان اى حد يغامر ويكتبه بس من حسن حظكم انى بعزفه من اكتر من 30 سنة يعنى حافظه , حافظ اساه مش التجويد اللى مش ممكن يتكتب , وانت لو شفت النوتة حتلاقيه سهل كده ممكن ماتتخيلش انه سهل كده , بس هو محتاج مش قراءة حروف محتاج نشغل السماعى شوية يعنى تحفظ اللحن من التسجيل اوى بعدين تسترشد بالنوتة اكيد حايطلع حلو
مرفق الاعلان بتاع الحفلة الخميس 4 ديسمبر سنة 1947
مع اطيب تحياتى