[بديعه أحمد على]

مساء الورد على الجميع

أحب اقول حاجه انى كنت باحضر تسجيلات الوالده فى الاذاعه الكويتيه و سمعت صوتها زمان على الطبيعه، مهما كانت نقاوه التسجيل او دقه المايكروفون صدقونى يا جماعه الصوت على الطبيعه بيفرق جامد كنت باحس بهيبه لما ادخل الاستوديو و اسمعها و كان جسمى كله بينمل من قوه الصوت و حلاوته و انا طفله

ما بالكم "و مع الفارق طبعا" صوت كوكب الشرق العظيمه ام كلثوم على الطبيعه؟ كانت لما تغنى و حد يحضر لها حفله على الهوا ممكن يتعب من الصوت من قوته و من حلاوته خاصه الفنان اللى فاهم فى الاصوات ممكن يمرض مره قالت لى ان الفنان الكويتى الجميل "عبد المحسن المهنا" رحمه الله عليه حضر حفله لام كلثوم و اصيب بالرعشه و الحمى لهذه الدرجه كانت قوه و جمال صوت ام كلثوم رحمها الله

أى مطرب او مطربه حتى لو مش عربى حيفهم الكلام ده، مثلا فى فرنسا كان من المعتزم اقامه حفله للفنانه الفرنسيه الجميله مارى ماتيو و حضور ام كلثوم لفرنسا قرروا اصحاب المسرح الغاء حفله مارى و شالو البوستر بتاعها من مقدمه المسرح ليضعو بوستر ام كلثوم، طبعا موقف اثار حيره مارى ماتيو و قررت تروح تشوف مين دى اللى شالو صورتها علشانها و مين اللى كل دول راحو يسمعوها و حضرت الحفله و ختمت بالعشره انهم كلهم عندهم حق و ان ده صوت غير عادى بالرغم من انها مش فاهمه الكلام لكن الصوت فعلا يتعب اى فنان مرهف فاهم يعنى ايه صوت نادر اصيل قوى و عظيم زى صوت كوكب الشرق ام كلثوم رحمه الله عليها

و قالت لى امى ان المايكروفون اللى قدام ام كلثوم ده مش لتكبير الصوت ده للتسجيل بس و لازم يكون بعيد عنها بمسافه محسوبه و الا ينشرخ من الصوت و فعلا قريت مره مقاله او بحث عن ام كلثوم و قريت انه فى هندسه الصوت اقوى مايكروفون تسجيل ممكل يسجل 500 او 600 ذبذبه تقريبا و ده كان كافى لكل الفنانين تقريبا الا ام كلثوم صوتها (التربلات او الذبذبات) و لسوء حظنا كان صوت ام كلثوم يحتضن اكتر من 1500 يبقى مهما سمعنا و مهما قلنا عظمه احنا اتحرمنا من سماع الصوت الحقيقى الكامل للفنانين العظام دول

احب أهديكم اربع اغانى تم العثور عليهم وسط الشرايط للفنانه بديعه صادق
اشغل قلبك بغرام تانى
هدانى مره منديل و طرحه
مبروك يا امى (اغنيه لعيد الام)
أهلا يا عيدنا (أغنيه العيد)
توزيع احمد على لكن التأليف و التلحين كالعاده طاهر مش كاتبهم لكن مسيرهم يظهروا
مع تحياتى و تحيات بديعه صادق و ارجو انهم ينالوا الرضا

إشغل قلبك بغرام تانى

اختكم
بديعه أحمد على