قصيده بعد الفطار
من صلاح جاهين الى بيرم التونسى
بعد الفطار
عينى غفلـت حبتيـن ، بعـد الفطــار
كل عام وانتـم بخيـر رمضـان كـريم
عينـى غفلت ، م التعب طـول النهـار ،
والمجـاهده ، والمناهده ، وسين وجيـم ،
لحظــه والتانيــه ، وبعد اللحظتيـن ،
جـانى احسـاس إن حـد دخـل قعـد ،
وابتـدا يسبـح ، وابص بنـص عيـن ،
نص قلبـى انسـر ، والنص ارتعــد .
شفت بيـرم .. أيوه بيـرم .. أيوه هوه ..
لبـده مصـــرى ، جلابيـه مغربـى ،
شمله شامى ، سبحـه من أرض النبـوه .
حـد مايعـرفش بيــرم والنبـــى ؟..
شفت بيـرم ، بالصديـرى اسكندرانـى ،
شفته ، متلفـع بشـال من العـــراق ،
والحزام يمنى ، وعطر الايد سـودانى ..
حـد ما يعـرفش بيــرم يا رفـاق؟ ..
- ضحـكته المـره اللى بتنقط عســل .
قلت : خيـر إنشـالله . قال : فين الديوان.
فين " ديوان بيرم " . مابطلتوش كسل ؟ ..
قلت لـه : معلهش . قـال معلهش إيـه !
وناتـايـه عن بلــدنا يـا ولــد ؟ ..
البعيد عن عينهـا ، يا حسـرة عليـه ..
يا بلـدنا ، يا حلـوه ، آه منـك بلــد !
قلت له: راح نحتفـل بــك. قاللى : لا ،
احتفـالكــوا وفــروه علـى نفسكـو .
قلـت له: ح نشيـد بفضـلك. قاللى هـا ،
فضـلى فين ، إذا كنتو ناسيين درسكـو ؟
قلت له: علمنـا: بيـرم قاللى : شـوف ،
الميـاتـــم فى الأزقـــه ملطعـه ،
أنا مش عايز كراسى صفـوف صفـوف
أنـا .. صفُّـوفى حـروف المطبعـة