المساعد الشخصي الرقمي

مشاهدة النسخة كاملة : الكمان


حليم الشرق
17/10/2007, 20h25
لكمان هو آلة وترية ذات أربعة أوتار: ومن أشهر الآلات التي أستخدمت في الموسيقى الكلاسكية و يوصف صوتها بأحن أصوات الآلات الموسيقية. الكمان أرقى وأنبل الآلات الوترية ذات القوس، وهو الأكثر تعبيراً بينها كلها. وقد زاحمت هذه الآلة وأسرتها سائر الآلات الوترية، وأصبحت لها السيادة عليها منذ أكثر من قرنين، ولا تزاحمها في تلك السيادة آلة أخرى غير البيانو. إلا أن هذا الأخير لم يستطع أن يضعف من مركز آلة الكمان أو أن ينال من سيادتها، ذلك أن البيانو والكمان آلتان لا تتضاربان، فلكل منهما خصوصيته.

'== من الرباب إلى الكمان == من أقدم أنواع الكمان آلة الـ"Rebec" أو الـ"Rubébe" المشتق من الرباب العربي. والرباب وصل إلى أوروبا عن طريق القسطنطينية باتجاه الأندلس وصقلية، وأخذ بالتطوّر. فقد عرفت هذه الآلة الكثير من التعديل في ما يختص بصناعتها وتقنية العزف عليها (وضعية القوس، الشكل الخارجي، عدد وقوة شد الأوتار، الفتحات...) ، إلى أن اتخذت شكلها الحالي في القرن السادس عشر، وكان ذلك في إيطاليا الشمالية.

[تحرير]
مكانة الآلة وأهميتها

تعد هذه الآلة من أكثر الآلات الوترية تعبيراً لأن بإمكانها تجسيد كل التعابير الإنسانية (و يرى البعض أنها تعبر عن أرق المشاعر والأحاسيس حتى أقوى الانفعالات كالغضب واليأس) ؛ وذلك بسبب تعدد تقنيات العزف عليها، مما يعطيها قوة تعبير خارقة. وقد لاقـت آلة الكمان رواجاً عظيماً لدى كل الشعوب لا سيما بعد أن منحها الموسيقار الإيطالي منتفردي السيادة على آلات الأوركسترا في الأوبرات وغيرها، وأصبحت الفرق الموسيقية تعتمد عليها، حتى بات عدد آلات الكمان (ورفيقاتها) في الفرق السمفونية يبلغ نحو نصف المجموع الكلي للآلات جميعها. وأصبح الرباعي الوتري في موسيقى الحجرة يعتمد على أسرة هذه الآلة، كما أن للكمان رصيداً هائلاً عبر التاريخ من المؤلفات العظيمة الخالدة، فقلّما نجد مؤلّفاً موسيقياً عظيماً لم يكتب أعمالاً لهذه الآلة أو أسرتها (باخ، بيتهوفن، موزار، باغانيني) ، وتشارك أسرة الكمان في كل السمفونيات كونها عنصراً أساسياً في الأوركسترات السمفونية. إن أول من أدخل الكمان بشكله الحالي على الموسيقى العربية هو العازف أنطوان الشوّا والد سامي الشوّا المعروف بـ"سلطان الكمان"، وذلك في أواخر القرن التاسع عشر، وقد أخذ الكمان بالازدهار في الموسيقى العربية بعدما دخل في التخت الشرقي، ولا يزال حتى الآن مستعملاً في أكثر الفرق العربية. وهنالك مؤلفون عظماء كانوا بالأساس عازفي كمان أو فيولونسيل مثل مارسيل خليفة وتوفيق الباشا وغيرهم.

[تحرير]
صناعة الكمان

تتوقف جودة الكمان على جودة خشب الصندوق المصوّت، وإتقان الصنعة ومراعاة دقة مقاييس النسب بين القطع المكوّن منها. وكلما تقدمت آلة الكمان في الاستعمال أصبح خشبها أكثر مرونة وأصبحت الأصوات الصادرة عنها أرق وأحلى (بعكس البيانو) ، وبات ثمنها أغلى. تُصنَع آلة الكمان وأسرتها من خشب الصنوبر، ويخزّن الخشب قبل تصنيعه إلى أن يجف تماماً، حتى لا تتغير نسب الأبعاد التي صنعت عليها أجزاء الصندوق المصوّت، والتي يجب أن تظلّ دائماً على النحو الذي ضبطها عليه الصانع بحيث لا تؤثر فيها عوامل الحرارة أو البرودة أو الجفاف أو الرطوبة. ويتم دهن الآلة بطبقات عدة من الطلاء Vernis) ) الذي يؤثر تأثـيراً مـهماً على نوعية الصوت وقماشته. تمـيّزت في صناعة الكمان منطقة كريمـونا الإيطالية معقل صناعـة الآلات الموسيقية وكانت أسرة آماتي "Amati" وغارنيري "Guarneri" من أهم الأسر التي اشتهـرت بصناعـة هـذه الآلات، خصوصـاً في القرن السابع عشر. إنما الأشهر على الإطلاق حتى الآن أسرة ستراديفاري "Stradivari" التي بفضلها بلغت صناعة الكمان أوج الكمال في أوائل القرن الثامن عشر، كما وأنه حتى الآن لم يستطع صانعو الآلات بلوغ ما بلغته هذه الأسرة من جودة تصنيع الكمان، خصوصاً في ما يتعلق بالطلاء الذي يغطي الآلة والذي لم يتمكن أحد حتى الآن من معرفة تركيبته. والجدير بالذكر أن آلات ستراديفاري المتبقـية حتى اليـوم، تعـرض في أعظـم المتاحف وتباع القطـعة منها بالمـزادات بمـلايين الدولارات.

:crazy::mdr:

ehsassat
22/09/2009, 20h52
شكــــــرا
علي المعلومات القيمة

عمار جاسم
15/03/2015, 18h58
شكراً على المعلومات واتمنى لك التوفيق

Sahar Essam
02/02/2016, 23h33
تسلم ايدك على الموضوع المميز للاله المميزه
و اللي بحبها حب جنوني
و حلم تعلمها كان حلم الطفوله و للاسف ما قدرتش احققه الا من كام شهر بس
و الحمد لله في تقدم مستمر و ملحوظ
اتمنى المزيد من المواضيع و خصوصا لو في كيفية القيام بالتكنيكات و الزخارف المختلفه للاله

mariam mohamed
06/02/2016, 17h48
:emrose::emrose::emrose:تسلم ايدك على الموضوع المميز للاله المميزه
و اللي بحبها حب جنوني
و حلم تعلمها كان حلم الطفوله و للاسف ما قدرتش احققه الا من كام شهر بس
و الحمد لله في تقدم مستمر و ملحوظ
اتمنى المزيد من المواضيع و خصوصا لو في كيفية القيام بالتكنيكات و الزخارف المختلفه للاله

عادل صموئيل
06/02/2016, 19h53
احبائى
طبعا مش معقول حد يتكلم عن الكمان وانا موجود وما اضيفش معلومات
الكمان آلة لها سحر خاص مش فقط فى عزفها ولا صوتها ولكن لها اسرار خطيرة فى صناعتها .. وكانت فى اوربا بتنتجها اسرات شهيرة .. ذكر عنهم الاخ حليم الشرق .. لكن الموضوع فيه اسرار اخطر من كده بكتير .. يعنى اول سر نوع الخشب اللى بتتعمل منه الكمان ... ده سر يعنى ممكن يكون صنوبر او مش صنوبر خالص .. او جايز الاسرات دى سابت الناس تقول صنوبر عشان حاجة كده زى الاسرار العسكرية ان يتركوا الناس تشك فى حاجة لكن الحقيقة تانية خالص .. كانت الاسرة دى بتكون بكامل افرادها ابا عن جد شغلتهم صناعة الكمان .. اول خطوة الخشب .. كان الصانع بيروح الغابة .. ولشجار الغابات فى اوربا مئات الانواع .. النوع اللى بيقطع منه سر .. يعنى انت لو خليت اكبر خبير فى الخشب دلوقتى يشوف الكمان مش ممن حايعرف ده نوعه ايه . ( وجدير بالذكر كمان الفرسة والعمود ) يعنى انا حياتى فيها اكتر من خمسين سنة كمنجة كتير سألت ناس بتشتغل فى الاخشاب الفرسة دى نوع خشبها ايه .. كان رد واحد ماوردش علينا حاجة زى كده .. الصانع ده كان بعد ما يقطع الخشب من الشجر بيروح الورشة .. بيقطعه الى قطع عاملة زى الاورمة بتاعة اللحمة .. يعنى سمكها فى حدود 3 او 4 سم .. يعنى ظهر الكمنجة من طرفه الاعلى الى عمق االتجويف او الانحناء .. بعدين بتيجى اخطر واهم مرحلة ... ودى ايضا سر جدا .. الخشب بيبقى مشبع بالرطوبة او سوائل الشجرة .. كيف انه يجففها بحيث يمتص منها الرطوبة نهائيا ... ممكن يكون بيدخلها فرن ما او بيضع عليها مادة زى الملح تمتص الرطوبة او بيمعل لها اى نوع من المعالجة او من الجنان اقول لك بيقرا عليها تعويذة سحرية .. طبعا كمان بتاخد وقت اد ايه على ما يتم تجفيفها من الرطوبة .. وانت لو علمت ان الصانع بيصنع كمنجة واحدة فقط فى السنة ولازم يكون عازف ماهر جدا كمان .. الصناعة بتحتاج صير طويل جدا .. بعدين بييجى يعمل ظهر الكمنجة بيبقى احيانا قطعة واحدة واحيانا قطعتين ملزوقين لزق جيد جدا .. بيبتدى يفحر بألة دقيقة جدا حتى يخلى الظهر من قطعة سميكة من الخشبا الى ما يشبه الطبق يعنى الشكل اللى انتم شايفينه ... طبعا بتاخد وقت دول .. بعدين بيعمل الوجه بنفس الطريقة .. ثم الجوانب .. بيكونوا 6 قطع ... بيكون عنده جاهز المراية بالرقبة ويبتدى يركب الكمنجة .. وبعد ما يتم تركيب الكمنجة بكل احتياجاتها ... بعزف عليها .. ممكن ما تعجبوش لن فى مخه شىء محدد .. ممكن يفط قطعة من الخشب الجانبى ويستبدلها بقطعة اخرى .. يفضل كده لحد ما الكمنجة بالنسبة له بتوصل لدرجة الكمال بعدين يبتدى يدهنها .. والدهان ايضا مش زى الموبيليا يعنى تركيبة فى منتهى الدقة والخطورة لأن اختلاف الكمان عن العود او المندولين او الجيتاران التانيين ممكن يدهنوا جمالاكا زى بتاعة الموبليا اما الكمان لو ادلهان مش هو ال 100% ممكن يكتم جزء من صوت الكمنجة ولاحظوا انى قلت انو عزف عليها قبل الدهان .. المهم بعد ما الكمنجة تكتمل 100 % بيكون لزق عليها تيكيت من الداخل وممضى وعليه صنة الصنع ... هنا لسه الكمنجة مالهاش قيمة .. يعنى هو عملها فى حوالى سنة .. عشان يبعها وتجيب السعر اللى تسواه يعنى يعرضها ويطلب رقم كبير ويحصل عليه .. لازم الكمنجة تتعتق زى النبيذ لمدة مش اقل من 20 سنة ... يعنى يضعها فى شنطة ويشيلها فى مكان كويس .. ويعمل غيرها ... الطريف فى الموضوع ان اى صانع شهير بيمعل فى حياتى مش ممكن اكتر من 30 إلى 50 كمنجة .. وبيموت ويتركهم كثروة لأولاده اللى بيبعوهم بعد كده بسعر فادح واللى هم كمان بيعملوا كمنجات يتركوهم لأولادهم .. الصنعة انقرضت فى كا مكان فى العالم ( اقصد الكمان اليدوى ) لأن تخيل لما صانع فنان اجره على جدا جدا .. بيعمل الكمنجة فى سنة يتقاضى كام على شغله .. طبعا لو حتى عملها اليوم حايبقى اجره مش اقل من 3 مليون جنيه .. مش جتجيب السعر ده لأنها جديدة لو انتظر عليها عشرين سنة تجيب وتجيب يعنى .. النهاردة الكمنجات بتتعمل فى مصانع .. يعنى فى الصين مصانع الخشب بيدخل من ناحية يطلع من الناحية التانية كمنجات .. يعنى بيقاس طاقة المصنع الانتاجية ب 300 كمنجة فى اليوم او اكتر .. بس احنا كعازفين بنقول عليها قباقيب لن صوتها طبعا زفت .. هى تنفع للتعليم وفى المدارس .. يعنى مافيهاش كل الكلام اللى انا قلته .. بتاع طردالركوبة والكلام ده.ز ده كمان بيعملوا مصيبة لسرعة الانتاج عشان يعملوا البومبيه بتاع الكمنجة يعنى الانحناء بيقطعوا الخسب بسمك 3 مللى ( زى الابلاكاش يعنى ) بعدين بيدخلوه على جهاز بيملاه بخار ماء عشان بدعكد ه يتحط فى مكبس يطلع بومبيه كده فى ضغطة واحدة بعدين يدخلوها فرن تطلع بخار الماء .. فيه ملحوظة ان اى حاجة بتتحط على الكمنجة ممكن تكتم صوتها بعكس العود مثلا يعنى مازال عندنا فى شارع محمد على كذا ورشة بيعموا عود تقدر تشترى عود من اول 300 جنيه وحسب المبلغ اللى ممكن تدفعه تاخد عود احلى وبيشتغل من اول يوم .. يعنى مثلا لو دفعت 5000 جنيه ممكن العود كله يترصع بالصدف مالوش علاقة بكفاءة الصندوق الرنان
ام الاخت العزيزة اللى سألت عن التمارين التكنيكية والحليات اللى بتتعمل بالاصابع .. الاول لازم توصلى لدرجة من التمكن فى العزف السادة الاول ... يعنى مايطلعش منك او صباع خاسس او زايد .. اسمها تظبيط الاصابع او تثبيت اماكن الاصابع بعد كده الحليات تيجى لأنها كذا حاجة .. اقصد ما ينفعش مثلا اطرز فستان قبل ان يكتمل تقصيلى ,,حتاما اطيب تحياتى وتحت امركم فى اى اسئلة

عادل صموئيل
08/02/2016, 01h05
انا كتبت الموضوع بتاعى ومنتظرطبعا تعليقات منكم او اسئلة
لكن بخصوص الاخت سهر عصام
عشان تسمعى كلام من استاذ متخصص حسألك الاول سؤال
هل انتى بتتعلمى الكمنجة غربى ( يعنى مضبوطة صول رى لا مى ) ولا شرقى ( صول رى صول رى )
لأن الشرقى والغربى بيختلفوا كتير
يعنى اول حاجة التكنيكات .. لو غربى فيه كتاب اسمه ليتل سيفشك ده فيه بداية التكنيك الغربى
اما لو شرقى ممكن كتاب الكمان العربى تأليف الاستاذ يسرى قطر .. وممن تلاقى هنا ف المنتدى حاجات زى كده بس خلى بالك لأن كتاب التكنيك بيختلف فى الشرقى عن الغربى
اما بالنسبة للعزف فيه معلومات مهمة جدا
فى الغربى الحليات والزخارف وحركة القوس طالع او نازل وكام نوتة مربوطة مع بعض كلها بتبقى مكتوبة فى النوتة .. والعازف الغربى لازم يلتزم بيها .. يعنى لو انتى طالبة فى كلية موسيقية وفيه نوتة مثلا تتكون من خمس اسطر .. انتى مذاكراها وحاتمتحنى فيها .. لو الجزء ده عليه عشر درجات مثلا .. الممتحنين بيبصوا على كذا حاجة .. طبعا اول حاجة النغمات كلها سليمة يعنى لو صباعك خس او زاد فى نغمات بيتخصم درجات .. لو فيه حلية ما ماعملتيهاش بيتخصم درجات .. حركة القوس يعنى مثلا هنا طالع وانتى عملتيه نازل بيتخصم درجات .. لو اتسلطنتى وانسجمتى وعملتى حلية من عندك مش مكتوبة فى النوتة بيتخصم درجات .. طبعا مش بعقدك يعنى بس نظام الغربى كده ... يعنى لو جبنا مقطوعة موسيقية وجبنا حسن عشر عازفين كمان فى العالم وزى ماقلت لك مكتوب في النوتة كل الحليات وحركة القوس والشدة والضعف .. وسجلنا لكل واحد فيهم المقطوعة .. وجينا نسمع حنلاقى مفيش اختلاف بينهم لأنهم ملتزمين بالنوتة 100% .. وطبعا محظور يقول حاجة من عنده لا زيادة ولا نقصان طيب ازاى بتتحسب مهارة العازف الشاطر اوى .. حاجتين اولا انه ممكن يعزف مقطوعة صعبة جدا جدا جدا ماحدش كتير فى العالم يقدريعزفها .. او فى كونشيرتو كمنجة المؤلف بيترك حتة كده خمس دقائق للعازف بيطلع فيه مهارته الخاصة .. يعنى ياخد من تيمة الكونشيرتو ويعمل عليها شغل من عنده هو .. وهنا بيختلف .. بمعنى ان طول الكونشيرتو كل عازفى العالم بيقولوه زى بعض نقل مسطرة لكن الاختلاف بينهم فى الجزء اللى بقول عليه واسمه كادينزا .. يعنى انا ممكن اسمع 3 تسجيلات لكونشيرتو بيتهوفن بيختلفوا فى ايه ؟ فى الكادينزا بتاعة العازف دى

اما الشرقى بيختلف .. الشرقى بيعتمد على الطرب والتطرييب .. يعنى النوتة مكتوبة زى ما بتشوفى النوت بتاعتى مثلا ( وانا عزفت فى الفرقة الماسية عشرين سنة ) وفى فرقة الموسيقى العربية .. مش بنكتب الحليات إلا لما يكون المحلن عايزها كده محددة يعنى .. لكن الحليات بتطلع من ذوق العازف نفسه .. مش بنكتب حركة القوس برضه عشان ما اقيدش العازف ممكن هو لو استاذاوى يعنى بيبقى ذوقه احلى من المكتوب .. الخلاصة .. ان لو كتبنا جملة موسيقية حلوة .. وجبنا احسن واحلا عشر عازفين كمنجة شرقى فى مصر وكل واحد عزفها حتلاقى كل واحد عزفها ببصمته .. يعنى الحليات بتختلف من صباع لصباع .. ومن ذوق لذوق .. يعنى ممكن واحد عزفها وعمل حلية فى المازورة الاولى .. واحد تانى عمل حلية فى المازورة التانية او الرابعة مثلا وهكذا .. لذلك لو نرجع للتاريخ زمان .. كان فيه عازف خطير بس غربى 100% اسمه انور منسى ... وعازف خطير شرقى 100% .. اسمه احمد الحفناوى .. عبد اولهاب لو فيه صولو كمنجة امتى بيجيب منسى وامتى بيجيب الحفناوى ... حسب طبيعة الصولو .. يعنى فيه صولو بيحتاج الكمنجة مضبوطة غربى وتكنيك غربى 100% زى مثلا النهر الخالد او ماليش امل فى الدنيا دى .. كان بيجيب انور منسى يقوله ... فيه صولو محتاج الشرقى زى كل صولوهات الكمنجة فى اغانى ام كلثوم كان بيجيب الحفناوى .. عشان نفهم موضوع الحليات اوى انا اقول مثال .. لو واحد اتعلم سواقة العربية .. اول حاجة لازم يتعلم يسوق كويس 100% .. بعدين لما يتمكن يتعلم الشقاوة .. لأنه وهو لسه مش متمكن لو اتشاقا ممكن يشيل اى حاجة قدامه او يعمل حوادث ,,, فى الكمنجة الاول لازم نتمرن لحد ما تبقى الاصابع مضبوطة 100% .. وحركة القوس سليمة 100% بعدين نتعلم الحليات .. يعنى مثلا فيه حلية انك تهزى صباعك لقدام ووارا اسمها فايبريشن .. دى لازم الصباع ينزل على نغمة مى مثلا ويبقى ثابت اوى ( وطبعا لازم اليد اليسرى تبقى طرية مش متخشبة ) هنا لما بتحركى بيبقى طرف الصباع عند الضافر لازم فى نغمة مى ولما يتحرك لقدام وورا بيتحرك من فوقيعنى باقى الصباع لو مش متمكن الصباع حايتحرك كلو يعنى يخرج من المى ويرجع لها طبعا يبقى نشاز .. فيه مثلا حلية تانية اسمها تريل .. يعنى الصباع الاول بيضغط على نغمة مى ( اللى هى اساس الجملة الموسيقية ) وبالصباع التانى بنلمس فا بسرعة جدا ... بس دى محتاجة تمرينات كتير لوحدها عشان تبقى ناعمة اوى ومش مفتعلة يعنى .. طبعا حاجات كتير .. لما حد يرد ويسأل نكمل كلام
مع اطيب تحياتى

عادل صموئيل
08/02/2016, 12h34
ردا على سؤال الاخ العزيز ابو حمزة ..

الكمنجات كلها مقاس واحد عالمى يعنى ..لكن الاختلاف مش فى المقاسات ولكن فى الحجم .. يعنى فيه كمنجة بيتعلم عليها الطفل .. وكمنجة للى اكبر وهكذا ... الكمنجة اللى بيعزف عليها الشخص البالغ اسمها كمنجة كاملة .. زى الكمنجة بتاعتى .. اما باقى الاحجام اصغر حجم اسمكها كنجة ربع .. يعنى حجمها صغير لطفل اقل من 6 سنوات وطبعا فيها كل مميزات الكمنجة الكاملة والقوس بيبقى نصف الطول .. الكلام ده طبعا للتلاميذ فى الكونسيرفاتوار اللى بيتعلموا الكمنجة منذ 4 او 5 سنوات بعد سنتين لما جسمه بيكبر بيحتاج يغيرها بكمننجة نصف ... ثم كمنجة ثلاث ارباع .. ثم الكمنجة الكاملة .. طبعا بيفضل حايا ان بيستعمل فى ال 3 نقلات دول كمنجات من الصينى الرخيصة .. يعنى حرام يشترى كمنجة غالية وهو مش حايتعملها اكتر من سنتين وممكن لما ييجى يبعها عشان يجيب الاكبر ما يلاقيش زبون يقدرها وهنا يخسر كتير ... لكن لما يكبر ويبقى عازف متمكن ممكن يصطاد كمنجة حلوة وساعتها ممهما دفع هى فى حد ذاتها ثروة قيمتها بتزيد كل يوم ... لأن الكمنجات اليدوية زى ما انا قلت خلاص صناعتها انقرضت .. وانا لما بتكلم عن الكمنجات اليديوة يعنى انا عندى كمنجة .. قيمتها بتقدر بكام واحدة زيها فى كل الكرة الارضية .. لأن لو من 270 سنة كانوا 500 مثلا .. فيه حوادث بتحصل بتنقص عدد الكمنجات .. انت شفت فيلم تيتانيك ؟كان عليها فرقة صغيرة فيها 3 كمنجات غرقوا ... ويوم ما الاوبرا المرية اتحرقت راح فيها اكتر من عشرين كمنجة وهكذا ... كل ده بيرفع سعر الكمنجة القيمة ..
اما الكمنجات اشهر انواعها الاسترادى فاريوس والاماتى واللوتييه .. بس برضو كان فيه زمان كوبى منهم .. يعنى صانع بيعجبه شكل كمنجة اماتى يعنى فيه حاجة اسمها الفليتو ودول الخطين الاسودين المرسومين على صندوق الكمنجة فيه صانع تانى بيعملهم خط واحد او حاجات فى الشكل فبيكتب اسمها نقلا عن ستراديفاريوس مثلا وسنة الصنع ... واحنا كان عندنا فى مصر خواجة اسمو ماركو فى الثلاثينيات كان بيعمل كمنجات عمل 30 كمنجة اسمها كمنجة ماركو ... ودى الناهردة لو اتوجدت يعنى حد مثلا عازف توفى واسرته عايزين يبيعوها ... لو عرفوا يعرضوها صح ممكن تعدى اكتر من مليون ونصف جنيه مصرى.. ولو عرفوا يعرضوها صح الصح .. يعنى يصوروها ويتصلوا بسمسار كمنجات من بتوع ايطاليا حاتعدى اوى اوى يعنى لأن قيمتها اكتر من قيمة طيارة اير باص .. لنالمصنع بتاع اير باص شوف بينتج كام طيارة فى السنة ( مش موضوع الفلوس طبعا ) ولكن الكمنجة دى اللى بيعملوها ماتوا واحنا بنتداول اللى فاضل منهم
وطالما حضرتك بتحب الكلام عن الكمنجة .. حقول لك على سر .. طبعا زى ما انا قلت فيه فى الصين مصانع بتعمل كمنجات لكن زى ما قلت برضه دى للعليم او قباقيب .. فيه فى كل مجال ناس بيحاولوا يعملوا الاجود .. يعنى مثلا فى السيارات .. احسن عربية المرسيدس بس لحد عشر سنوات كان صوت موتورها عالى طبعا ساعتها كانت ركوبة الملوك .. جم العباقرة بتوع اليابان اخترعوا موتور مش بيطلع صوت .. يعنى النهاردة تركب عربية حديثة تلاقى وهى ماشية صوت الموتور كأنه مطفى .. دى قلبت صناعة السيارات فى العالم .. اضطرت مرسيدس تحاول تقلدهم عشان ماتركبش عربية آخر موديل وتحس انها كراكة بالنسية لليابانى .. المهم وآسف للإطالة .. لما جم خبراء فى اليابان قالوا عايزين نعمل كمنجات حلوة .. فكروا عن اسرار الخشب القديم ... قالوا ننسى الخشب نهائيا لأنه موضوع مش مجدى ... فكروا فى انتاج الكمنجة الكهربائية .. يعنى الكمنجة الخشب 90% منها الصندوق الرنان .. هم توصلوا لمادة من الالومنيوم يتعمل منها صندوق الكمنجة .. بس مش رنان .. عملوا لها فرسة فيه 4 ميكروفونات دقيقة جدا تحت كل وتر ميكروفن .. ويتاخد منها كابل لثقب فيه جانب الكمنجى تحط فيه شيلد يروح للأمبليفاير.. اللى ممكن تظبط المفاتيح فيه وتطلع احلا صوت ممكن ... بعدين اخترعوا نفس الامكانيات الكهربائية دى فى كمنجةبدون صندوق رنا اصلا .. يعنى هيكل فقط شبه الهيكل العظمى بتاع السمكة ... طبعا كلام الشكلين دول ما يدخلوش فى ذمتى بجنيه .. ممكن ينفعوا فى فرق الجاز لكن فننا لازم الكمنجة الاصلية
بتختلف الكمنجة الاصلية كمان ان المراية والمفاتيح بتاعتها بتبقى خشب ابانوس .. وده ناعم زى الحرير وصلب زى الحديد .. بتتميز المراية انها بتقعد مدى الحياة لأن المراية الخشب الاقل جودة بتتفحر تحت الوتر من ضغط اصابعك على الوتر وبييجى وقت لازم تتغير ... واخطر حاجة المفتاح الابنوس انو بيمسك مكانه .. يعنى عمره ماتنزل تلاقى وتر اترخى .. لأن الكمنجة من ضمن عفاريتها انك لو رخيت كل الاوتار بعدين ضبطتهم تانى بتاخد يوم ع الاقل على ماتركز .. لذلك الكمنجة الحلوة هى اللى كل يوم تيجى تشتغل عليها تلاقها مضبوطة .. قد تحتج لشعرة دقيقة اذا كانفيه تكييف عالى اوحرارة ..
ام عن عازف الكمنجة بعزف شيللو او كونترباص .. دى حالات واحد فى الالف .. يعنى يكون بيعزف فى الكلية دارس كونترباص وبيعزف كمنجة مع نفسه يعنى صديقى عبد الحكم عبد الرحمن بتاع الفرقة الماسية كان الاول بيعزف كمنجة بعدين قلب كونترباص فى الكلية .. المشكلة ايه .. ان عندك فى الكمنجة التون بيبقى بينهم واحد سم .. يعنى بين الف والصول واحد سم يكن فى الشيلو اوسع كتير يعنى عشان تقول جملة موسيقية لازم تاخد كذا بوزيسيون عشاناصابعك تطول الحروف .. كمان الكونترباص المسافات اوسع كتير
اللى بيحد الصولو اولا المحلن بيحس ان الجملة حلواتها انها تكون كمنجة .. او حاجة اخطر ... فيه سلالم حسب طبيعة الآلة يعنى مثلا البيانو لحد 4 بيمول عادى مفيش مشكلة .. لكن الكمنجة مثلا على وتر صول الدو دييز او النصف دييز ضعيفة مش زى الدو ناتوريل ... وهنا لو الصولو لازم الملحن يختار لو الآلة اللى تلمع فى كل رف ما يبقاش حرف فيها ضعيف .. وصلت ؟ او مثلا فيه آلات نفخ مساحتها اوكتاف ونص ما اختار لها صولو اكتر من مساحتها . السؤال اللى بعده اجابته برضو فى السؤال السابق .. يعنى حلواة الصولو من حسن توظيف الآلة .. يعنى ادينى صولو مثلا بياتى على الرى اجننك لكن لو بياتى ع الدو مش حايتقال بالاباع لأن فيه النصف دييز انا حقولها بس مش بتمكن المى نصف بيمول ... لكن ممكن الناى يقولها وهو مغمض .. ليه لأنه عنده كذا عقلة بيستعمل عقلة تانية تقول المطلوب
عازف الكمان فى رسالة من تحت الماء فى المقدمة كان محمد مصطفى علىالكمان الكهربائى .. وده عمل الصولو من عنده يعنى هو عمل تنويع ومهارة على الجملة بتاعة الموجى اما فى الكوبليه الاخير طبعا عمنا كلنا احمد الفناوى
اتمنى ان اكون وفقت ومع اطيب تحياتى

abo hamza
08/02/2016, 13h27
تسلم إيدك أخي الغالي الأستاذ الجميل عادل صموئيل على تفضلك وتكرمك بالرد سريعا وهذا ليس بغريب عليكم بالإجابة بكل ما لديكم من معلومات كي ينهل منها الجميع - نأمل المزيد من الشروحات لكل ما تعتقد انه ممكن يفيد الجميع للثقافة العامة

ألف تحية وتقدير لشخصكم الكريم :emrose: إن منتدى سماعي للطرب العربي الأصيل يفخر بوجود قامة وهامة فنية تتمثل بكم - إن وجودكم بيننا هو مكسب كبير وإضافة للمنتدى

مع تحياتي

:emrose::emrose::emrose:

Sultan hamied
28/04/2016, 00h24
الف الف شكر علي المعلومات.. انا عيني حرقتي من كثر القرائه.. أشكرك جدا علي المعلومات الجميلة
تحياتي