المساعد الشخصي الرقمي

مشاهدة النسخة كاملة : هدية قيمة اقدمها لأحبائى المدونين


عادل صموئيل
04/07/2013, 19h32
احبائى
كل الناس اللى بيستعملوا برامج التدوين الموسيقى بتصادفهم مشاكل فى تدوين الموسيقى العربية منها العلامات الشرقية وحاجات كتير حسب براعة المدون , ولكى يتوفر لك انك تضيف اى شىء مش موجود فى البرنامج بتكتبه عن طريق اضافة فونت او خط جديد .. بالطبع توجد فونتات كتير موسيقية احنا بنحاول نستعملها لكنها لا تكفى الاحتياجات او مافيهاش كل ما نحتاجه .. ولو لاحظتم النوت اللى انا بدونها تلاقى فيها حاجات كتير زيادة عن امكانيات البرنامج وعلى الاصح انى حاولت خلال العشر سنوات الماضية انى ما اخليش اى شىء ناقص فى التدوين بمعنى خليت كل الشغل على الكمبيوتر مهما كان مستحيل يعنى العلامات الشرقية سواء العارضة او التى فى الدليل ,, والادليب وعلامة اللازمة وانها تكون زى ما اتعدونا عليها فى السوق يعنى يبقى فيها زاوية من اليمين واليسار ,, والمرجعات اللى فى وسط الادليب لأن البرنامج مش بيعمل مرجع إلا فى اول وآخر مازورة طبيعية .. لكن انا لما بدون الادليب بيبقى مازورة مش طبيعية ولو احتجت اضع مرجع فى اى مكان فى هذه المازورة كان لازم طريقة وهى ادخال المرجع عن طريق فونت خارجى
الى كل المدونين للموسيقى اقدم لكم اغلى هدية فونت ADEL SAMUEL والفونت ده انا صممته بمجهودى المتواضع وفضلت اطور فيه واصلح فيه سنوات طويلة لحد ما وصل لأعلى درجة اتحدى بيه اى فونت موسيقى فى العالم ,, يعنى انا بالطبع شفت كل الفونتات الموسيقية .. مالقيتش فيهم فونت كامل من كله .. وفيه مشاكل خطيرة بيبقى الفونت عليه علامات لكن مش بيكتبها كلها .. ومن اخطر مشاكلهم ان العلامات بتكون على الفونت مبعثرة بطريقة تخليك عمرك ما تقدر تحفظ العلامات مكانها فين يعنى مثلا انت لما تكون عايز علامة نوار تلاقيها على حرف على الكيبورد واللغة عربى مثلا ,, ولو عايز كروش تلاقيها على لغة انجليزى وحرف بعيد جدا مع شيفت .. انا فى الفونت بتاعى ركزت تركيز شديد ان كل العلامات المرتبطة ببعض تكون جنب بعض بحيث انى اقدر فى ظرف اسبوع من استعمال الفونت انى اكون حفظت اماكنهم لأنى فى وسط التدوين ذهنى بيكون مشغول بعملية التدوين نفسه ولما احتاج حاجة من الفونت اكتبها بسهولة بدون تعطيل
اقدم لكم الفونت فى ملف مضغوط .. وعشان المعلومات ما تتبعثرش سأقدم الشرح تباعا فى نفس الموضوع وتحت امركم طبعا فى اى اسئلة
مع اطيب تحياتى

عادل صموئيل
04/07/2013, 19h37
احبائى

قدمت لكم الفونت والآن الى الدرس الاول
مرفق ملف وورد

عادل صموئيل
04/07/2013, 20h00
احبائى
من اهم مميزات الفونت ADEL SAMUEL زى ماقلت ان فيه كل احتياجات المدون يعنى انا الاول صممته بعدين قعدت ازوده كل احتياجاتى ومن اهمها مثلا
كيف تكتب تمرين ايقاعى اسفل لحن مكتوب على انكور .. الموضوع ده ممكن يلاحظوه مدرسين الموسيقى فى وزارة التربية والتعليم يعنى فى المسابقات كنا بنكتب النوتة بتكون كذا سطر ولازم تحتها فى الجزء الفاضى الإيقاع بتاع اللحن وميزانه .. وطبعا لأن المدرس لازم بيلتزم باللحن والايقاع .. فى الاول كنا بنكتب اللحن على انكور والإيقاع بنكتبه بالقلم
لكن انا بعد ما صممت الفونت بتاعى بقيت اكتب الموضوع ده بالبرنامج
الايقاع بيتكون من حاجتين اولا الميزان بيبقى زى ما انتم عارفين رقمين فوق بعض يعنى مثلا 3 على 4 .... عملت فى الفونت الرقم الاعلى لما تضغط على الرقم فى لوحة المفاتيح
يعنى تخلى اللغة انجليزى ومقاس الخط 24 وتكتب 3 وتعمل Shift وتكتب 4
تتكتب ال 4 تحت ال 3 وهكذا فى جميع الموازين المعروفة يعنى الرقم اللى انت عايزه فوق تضغط ع الرقم واللى تحت تعمل Shift يعنى مثلا لو عايز 3 على 8 تضغط 3 وشيفت 8
وهكذا بالنسبة للميزان
اما بالنسبة للإيقاع العلامات الايقاعية منها العلامة القائمة بنفسها مثل النوار والبلانش
كل العلامات الايقاعية تبدأ من حرف a يعنى الروند و s البلانش وهكذا
وطبعا العلامة لو الراس لتحت تضغط الحرف عادى ولو عايز الراس فوق تضغط العلامة مع شيفت
لما نيجى للعلامات المشبوكة زى علامة تاتى مثلا بتتكون من كروش اولها وكروش آخرها
موجودين تكتب دى بعدها دى ولو عايز برضو الرأس من فوق تضغط شيفت
علامة ال تا فا تى فى بتتكون من 3 حاجات الدوبل كروش اللى فى اول العلامة ثم التالى مرتين ثم الدوبل كروش اللى فى آخر العلامة وهكذا
بعدين خطى النهاية
افضل طريقة لأحسن استعمال للفونت انك تجيب ورقة وترسم فيها مربعات بشكل حروف الكى بورد منطقة الارقام والحروف
وتكتب عليها الارقام والحروف بعدين تفتح الفونت على انكور وتعمل مقاس الخط 24
وتجرب حرف حرف بيكتب ايه وتكتبو على الورقة فى اعلى المربع بعدين تضغط شيفت وتاخدهم حرف حرف وتكتب اللى بيطلع اسفل المربع
بمعنى ان مربع g فى النص تكتب الحرف ده بلون ما بعدين تشوف ايه الحرف الموسيقى اللى عليه بعدين تكتبه فوق بعدين تضغط شيفت واللى يطلع تكتبه تحت
حاتتعب اول مرة لكن حتلاقى عندك خريطة الفونت بس اكيد حتلاقى شىء يستاهل تعبك
يعنى انت حاتتعب نص ساعة انا تعبت فى تصميمه شهور مع الاستعمال انت حاتفظ مكان العلامات اللى بتحتاجها وتلاقيها فورا
احب نجرب وانا تحت امركم فى اى سؤال
وان شأء الله حقدم لكم شروحات تانية تفيدكم اكتر
مع اطيب تحياتى

عادل صموئيل
04/07/2013, 21h13
احبائى

بعد ما اتكلمنا على استعمال الفونت فى كتابة العلامات الشرقية العارضة
اليكم كيف تكتب العلامات الشرقية فى الدليل

طبعا دى اجتهادات لأن البرنامج مصمم غربى اصلا وصعب جدا ان حد ممكن يبرمج برنامج ممكن يكتب دليل شرقى لن الدليل فى المقامات الغربية بينتج من ان البرنامج بيغنى السبع نغمات الاساسية والبيمول والدييز بتاعهم
والدليل بيبقى اما دو الكبير او بيمولات لحد 7 بيمول ودييزات لحد 7 دييز
لكن المقامات الشرقية مش اقل من 47 مقام ولكى يتم برمجة برنامج ممكن يكتبهم ويغنيهم صعب جدا محتاج مؤسسة خبراء بس انا ممكن اقول لهم يعملوها ازاى يعنى يبقى فى البرنامج خاصيتين الاولى الدليل بالطريقة الموجودة والثانية انو يديك العلامات البيمول والنص بيمول والدييز والنصف دييز وانت تكون الدليل لكن بالطبع البرنامج مش ممكن يغنيه الا اذا دخلنا نغمة النص دييز والنصف بيمول على قاعدة بيانات البرنامج
اليكم اجتهاداتى فى ملف الوورد

wissameter
05/07/2013, 10h41
إضافات رائعة أستاذ عادل. أنا نزّلت الفونت عندي. مشكور على مشاركتك لنا هذه المعلومات القيّمة. إن شاء الله لازم ندخّل التطوير اللازم على الأنكور حتى نمكّنه من لعب العلامات الشرقيّة أيضا.

عادل صموئيل
05/07/2013, 15h27
اخى العزيز
اولا اشكرك واتمنى انك تعمل كل اللى قلت عليه يعنى تعمل خريطة الفونت زى ماقلت عشان تقدر تستعمله فى اقصى امكانياته واكرر انا استعملت كل الفونتات الموسيقية فى العالم وكانت كلها عيوب انها محدودة جدا يعنى لازم تستعمل على الاقل عشر فونتات منهم وبرضو حاجات ناقصة
لذلك ان بعد ما صممت الفونت ابتديت احصر كل احتياجاتى بالطبع فيه حروف انا سرقتها من فونتات اخرى ولكن اهم شىء فيه حروف مش موجودة فى اى فونت اضطريت انى اصممها وانفذها بنفسى واخدت منى وقت مضنى ومنها علامات جوانب اللزمة الموسيقية والموجودة على j و k والعلامتين دول مش موجودين فى اى فونت فى العالم لنهم بالطبع كلها فونتات اجنبية والاغربيين ماعندهمش لزمات او كتابة للزمات مع ان فى النكور ممكن تعمل نفس الشكل يعنى تحدد الازمة ولكن تحت النغمات مش من فوق ودى ماتنفعش لسبب
انا عزفت فى الفرقة الماسية وكان زميلى الاستاذ الكبير نصر عبد المنصف وهو من اكبر اساتذة التدوين فى العالم العربى وهو اللى ابتكر علامة الازمة دى بالاضافة الى علامات كتير .. وكان كل الموسيقيين العرب بييجوا مصر يسجلوا على الفرقة الماسية ومنها انتقلت طريقتنا فى التدوين الى العالم العربى كله لذلك انا لما بدون لازم ما اعملش حاجة مخالفة يختلف عليها اى موسيقى فى العالم
واحب اقول ملحوظة انا بالطبع اكاديمى يعنى متخرج من كلية التربية الموسيقية فى الزمالك بالقاهرة .. فى الدراسة الاكاديمة طبعا لازم تدرس كل حاجة مع ان معظم اللى بتدرسه مش بيستعمل فى السوق منهم علامة النصف بيمول بشكليها يعنى لها شكل بيمول مقلوبة شبه حرف d لكن المتداول عند الجميع علامة البيمول وفيه شرطة
واكتشفت ان بعض الفونتات الموسيقية بتعمل اللى شبه d وانا بالطبع مش ممكن استعملها لأنهامش متداولة او كتير مش بيستعملوها حاجة عاملة زى العملة النقدية المصطلحات الموسيقية لازم تكون مثل الدولار اى دولة فى العالم تصرفه مش عملة محلية مالهاش قيمة فى اى دولة اخرى

مع اطيب تحياتى

عادل الغامدي
18/05/2015, 07h37
صباح النور والسرور

يعطيك العافيه اخي عادل مشكور على هذا الجهد

عود قديم
17/10/2015, 20h43
السلام عليكم
ألف شكر استاذنا الجليل, هذا ما يطلق عليه الخلق و الابداع, تحايل ذكي على برنامج أجنبي ليتجاوب مع التدوين الشرقي, قمة العطاء و السخاء من المايسترو عادل,
بارك الله فيك و أكثر من أمثالك و جعل الله عملك القيم في ميزان حسناتك و أرجو من جضرتك الاستمرار في عطائك الذل لا يقدر بثمن,
أخوك محمد

عادل صموئيل
31/01/2016, 15h47
احبائى

انا آسف مادخلتش المكان ده من وقت طويل .. بسبب مشغواباتى لكن طبعا اشكر كل من حس انى قدمت حاجة .. لأن بالفعل اللى اضطرنى انى اخترع الفونت ده واصممه لأنى فى كل الفونتات الموسيقية واللى بنضيف بيها اشياء على البرامج الغربية اصلا لتمكننا من ترويضها عشان نكتب عليها موسيقى شرقية ومع انها بالعشرات لكن ما لقيتش فيها احتياجاتى .. طبعا شوية شطارة وبحث كتير واكتشفت ان فيه برامج لتصميم الفونتات ...
فيه اخ عزيز كتب ياريت نعمل تطوير فى البرنامج بحيث انه يعزف لنا النغمة الشرقية .. هو فيه برامج بس ممكن تنفع لكن معايا انا ما اقتنعتش بيها وانا افضل لما اكتب انى اقرأ الجملة الشرقية بعينى ... ومكتفى انا والمتلقين بنوتاتى اللى بتوصل لهم ورقة النوتة بكده .. السبب انها عملية عويصة ومعقدة جدا جدا ... وعشان تفهمونى اوى حاحكى لكم حكاية الاورج الشرقى انه فى الاول طبعا لما كان غربى واحتاجوا يضيفوا له الربع تون دخله جواه وعملوا كوبرى بحيث يديك نغمة بحساب الذبذبة تبقى فى المنتصف المسافة بتاعة النصف تون .. يعنى المى بيمول مثلا ذبدبتها كذا عملوا المى نص بيمول تبقى نصف البعد يعنى .. لكن كان فيه مشكلة فى منتهى الخطورة مع الملحنين العظام ... هى ان الغربى انت لما تبتدى من نغمة دو وتطلع اوكتاف كروماتيك يعنى من دو دو دييز ( اللى هى مى بيمول ) رى انت بتصعد نصف تون محسوب ومحدد بين كل نغمات الاوكتاف يعنى مسافة اى نصف تون واحدة فى جميع السلالم .. لكن عندنا فى الشرقى الصميم لو شفت نغمة مى نصف بيمول ... مش هى هى فى الراست والبياتى .. فى الراست بتبقى زايدة شعرة او كوما وفى البياتى بتبقى خاسة كوما ... ومن هنا ما ينفعش تحط زرار يدينى مى نصف بيمول وتقول هى خلاص كده .. مش حاتقنع لا عبد الوهاب ولا السنباطى يبقى كده ماعملناش حاجة ,, توصلو ان العازف بيفتح الادورج ويجيب مفك رفيع وييجى على البوطة بتاعة المى نصف بيمول دى ويزودها او يخسسها ونسمع دو رى مى فا .. ويفضل يخسس او يزود لحد ما يطلع جنس راست محدد 100% لكن كده انا لو حقول جملة بياتى مش حاتبقى برضو مضبوطة ... جم فى اليابان واللى هم بينتجوا الاورج وبيتنافسوا كل يوم عشان تطويره اكتشفوا السر وهم عشان عباقرة مش من فراغقالوا ما تيجوا نجيب احسن عازف اورج فى مصر ونشوف كل احتياجاته ايه ونعملها .. وفعلا استضافوا عمار الشريعى ... زكانت الاورجات الحديثة اللى انت شايفها واهم حاجة فيها عملوا بيتش للسيكاه بتزود او تخسس النغنة زى ما انت عايز من فوق بدل ماتفتح الاورج من الداخل وتخربه ..
وعشان مايعملوا برنامج تدوين يخدم الشرقى كده .. لازم يستضيفوا حد خبير اوى فى الموسيقى الشرقى وخبير فى البرنامج وللعلم احسن برنامج تدوين انكور وانا جربت كل البرامج .. لأن اصعب حاجة فى الموضوع هى الدليل .. يعنى ازاى تكتب دليل مقام من اكتر من 47 مقام .. انت لما بتيجى تختار الدليل موجود من واحد بيمول الى 7 بيمول والدييزات ... لكن الدليل الشرقى وكمان فيه مقامات اساسية ومقامات مصورة كل ده بنستخدمه طول الوقت
ارجو ان تكون الرسالة وصلت وتحياتى

هيثم الشوملي
10/06/2016, 08h22
الاستاذ الدكتور عادل صموئيل
السلام عليكم
انا عضو جديد في هذا المنتدى وحتى الان انا اتعلم كيفية استعمال الايقونات المختلفة

هل تستطيع يا استاذي ان توجهني وترشدني لكيفية تنزيل برنامج انكور للتنويت
وكلي شكر لك
هيثم الشوملي:emrose:

مساعد محمد
26/09/2016, 14h50
الموضوع جدا رائع وكبير ومستغرب جدا من قلة الردود !!!
الف شكر لك استاذ عادل على ماقدمت من مجهود

الله يعطيك الصحه والعافيه يارب :emrose: